സതീശന് പൂര്‍ണ്ണ പിന്തുണയെന്ന് ആന്റണി; തീരുമാനം സ്വാഗതം ചെയ്ത് വയലാര്‍ രവി

ന്യൂഡല്‍ഹി: വി.ഡി സതീശനെ പ്രതിപക്ഷനേതാവായി തെരഞ്ഞെടുത്ത തീരുമാനം കോണ്‍ഗ്രസിന്റെയും യുഡിഎഫിന്റെയും ശക്തമായ തിരിച്ചുവരവിന് സഹായകരമാകുമെന്ന് മുതിര്‍ന്ന കോണ്‍ഗ്രസ് നേതാവ് എ.കെ ആന്റണി. പ്രതിപക്ഷനേതാവായി തിരഞ്ഞെടുക്കപ്പെട്ട വി.ഡി സതീശനെ അഭിനന്ദിച്ച ആന്റണി പൂര്‍ണ പിന്തുണയും വാഗ്ദാനം ചെയ്തു.

വി.ഡി സതീശനെ പ്രതിപക്ഷനേതാവായി നിയമിച്ച കേന്ദ്ര തീരുമാനത്തെ സ്വാഗതം ചെയ്യുന്നുയെന്ന് മുതിര്‍ന്ന കോണ്‍ഗ്രസ് നേതാവ് വയലാര്‍ രവിയും പ്രതികരിച്ചു. തലമുറമാറ്റം എന്നത് യഥാസമയം നടക്കേണ്ട പ്രക്രിയയാണെന്നും അങ്ങനെയുള്ള മാറ്റത്തിലൂടെയാണ് ഞാനുള്‍പ്പെടെയുള്ള ഇന്നത്തെ നേതാക്കള്‍ വളര്‍ന്നതെന്നും രവി ഓര്‍മ്മിപ്പിച്ചു. കാര്യങ്ങള്‍ നന്നയി പഠിച്ചു സഭയില്‍ അവതരിപ്പിക്കുവാനുള്ള സതീശന്റെ കഴിവ് വളരെ പ്രശംസനീയമാണെന്നും വയലാര്‍ രവി പറഞ്ഞു.

ക്രിയാത്മക പ്രതിപക്ഷത്തിന് നേതൃത്വം നല്‍കാന്‍ സതീശന് കഴിയുമെന്ന് എഐസിസി ജനറല്‍ സെക്രട്ടറി കെ.സി വേണുഗോപാലും പ്രതികരിച്ചു. കാലഘട്ടത്തിന് അനുയോജ്യമായ തീരുമാനമാണ്. പാര്‍ട്ടിയിലെ എല്ലാവരും തീരുമാനം അംഗീകരിക്കുമെന്നും അദ്ദേഹം പറഞ്ഞു.