കേരള രാഷ്ട്രീയത്തിലേക്ക് കുഞ്ഞാലിക്കുട്ടി മടങ്ങി വരുമ്പോൾ

എന്നും അധികാര രാഷ്ട്രീയത്തിൻ്റെ ഭാഗത്തായിരുന്നു കേരളത്തിലെ മുസ്ലീം ലീഗ്. അധികാരമില്ലാതെ അധികനാൾ നിൽക്കാൻ സാധിക്കാത്ത പാർട്ടി. മുസ്ലീം എന്ന മത നാമത്തെ കൃത്യമായി വിപണനം ചെയ്ത്, കേരളത്തിലെ മുസ്ലിം മതത്തിൻ്റെ മുഴുവൻ കുത്തക മുഴുവൻ തങ്ങൾക്കാണെന്ന് മുന്നണികളെയൊക്കെ വിശ്വസിപ്പിച്ച് നേട്ടം കൊയ്യുന്ന പാർട്ടി. ദേശീയ പ്രസിഡൻ്റിനെക്കാൾ അധികാരവും പദവിയും പ്രാധാന്യവും ഒരു സംസ്ഥാന പ്രസിഡൻ്റിന് കൽപിച്ചു നൽകിയിരിക്കുന്ന കക്ഷി.മലപ്പുറത്തെ ഒരു കുടുംബത്തിന് മാത്രം ലീഗിൻ്റെ നേതൃത്യം പരമ്പരാഗതമായി കൈമാറുന്നതിന് പിന്നിലുമുണ്ടൊരു തന്ത്രം. ആത്മീയ നേതാക്കൾ കൂടിയായ ഈ കുടുംബക്കാർക്ക് വിശ്വാസികൾക്കിടയിലുള്ള സ്വാധീനവും ബഹുമാനവും രാഷ്ട്രീയ വിലപേശലിന് ഉപയോഗിക്കാമെന്ന ലളിതമായ ചിന്ത.മതേതരത്വത്തിൻ്റെ മുഖമാണ് ലീഗ്, ലീഗ് ഉള്ളതുകൊണ്ടാണ് മത സംഘർഷങ്ങൾ കേരളത്തിൽ ഉണ്ടാകാത്തതെന്നൊക്കെ പറച്ചിലുമുണ്ട്. ബാബറി മസ്ജിദ് തകർക്കപ്പെട്ട കാലത്ത് ലീഗ് കൈക്കൊണ്ട നിലപാട് ഇതിനുദാഹരണമായി പലരും പറയാറുണ്ട്. അതു പോലും അധികാരത്തിൽ നിന്ന് വിട്ടു നിൽക്കാനുള്ള മടി കൊണ്ട് സ്വീകരിച്ചതാണെന്ന് പിന്നീട് ലീഗിലുണ്ടായ രാഷ്ട്രീയ നീക്കങ്ങളും പിളർപ്പും തെളിയിച്ചു. ഏറ്റവുമൊടുവിൽ തുർക്കിയിലെ ഹാഗിയ സോഫിയ കത്തീഡ്രൽ വിഷയത്തിൽ സ്വീകരിച്ച മൗലികവാദ നിലപാട് മതേതരത്വം എന്നത് ലീഗിൻ്റെ പുറംപൂച്ച് മാത്രമാണെന്ന് തെളിയിക്കുന്നതായി.ഇത്രയും പറഞ്ഞത് ലീഗിൻ്റെ നിലപാടുകളുടെ പ്രത്യേകതകൾ വ്യക്തമാക്കുന്നതിന് വേണ്ടിമാത്രമാണ്‌

എന്തുകൊണ്ട് കുഞ്ഞാലിക്കുട്ടി

മുസ്ലീം ലീഗ് - യു ഡി എഫ് രാഷ്ട്രീയത്തിലെ തന്ത്രജ്ഞൻ ആണ് കുഞ്ഞാലിക്കുട്ടി.ആരെയും വളർത്താനും തകർക്കാനും കഴിവുള്ളകിങ് മേക്കർ. യുഡിഎഫിലെ രണ്ടാമത്തെ വലിയ കക്ഷിയുടെ നേതാവാണെങ്കിലും എൽഡിഎഫ് നേതൃത്വത്തിലെ പലരുമായും അടുത്ത ബന്ധമുള്ളയാൾ. ബിജെപിയുടെ നേതാക്കളിൽ പലരുമായും സൗഹൃദം സൂക്ഷിക്കുന്ന നേതാവ്. മുസ്ലീം സമൂഹത്തെ ബാധിക്കുന്ന എത്ര വലിയ പ്രശ്നങ്ങൾ ഉണ്ടായാലും സാധാരണ പ്രതികരണത്തിനപ്പുറം സി പി എം ,ബി ജെ പി നേതാക്കൾക്കെതിരെ അതിരൂക്ഷമായ വിമർശനമോ കടുത്ത വാക്കുകളോ കുഞ്ഞാലിക്കുട്ടിയിൽ നിന്ന് ഉണ്ടാകാറില്ല. നരേന്ദ്രമോദിക്കെതിരെ പോലും കാര്യമായ വിമർശനം കുഞ്ഞാലിക്കുട്ടിയിൽ നിന്ന്ഉണ്ടായിട്ടില്ല എന്നത് യാദൃശ്ചികം മാത്രമാണെന്ന് കരുതാൻ വയ്യ.

സാധാരണ മുസ്ലീം ലീഗിൻ്റെ നേതൃ യോഗങ്ങൾ ചേരുമ്പോൾ തീരുമാനങ്ങൾ യോഗത്തിൽ കാര്യമായി ഉണ്ടാകാറില്ല.ഉചിതമായ തീരുമാനം കൈക്കൊള്ളാൻ പാണക്കാട് തങ്ങളെ ചുമതലപ്പെടുത്തി എന്നതാണ്‌ പുറത്തു വരുന്ന അറിയിപ്പ്.പക്ഷേ യാഥാർത്ഥ്യം അതല്ല. തീരുമാനം എടുക്കാൻ കുഞ്ഞാലിക്കുട്ടിയെ ചുമതലപ്പെടുത്തി എന്നു പറയുന്നതിനു പകരമാണ് പാണക്കാട് കുടുംബത്തിലെ തങ്ങളെ ചുമതലപ്പെടുത്തി എന്നു പറയുന്നത്. തീരുമാനം എടുക്കുന്നത് കുഞ്ഞാലിക്കുട്ടിയാണെങ്കിലും അത് പാണക്കാട് തങ്ങളുടേതായി പുറത്തു വരുമ്പോൾ അണികളുടെ എതിർപ്പും ഒഴിവാക്കാനാകും എന്ന മെച്ചമുണ്ട്.

സംസ്ഥാന രാഷ്ട്രീയത്തിലേക്ക് മടക്കം

എൽ ഡി എഫ് കേരളത്തിൽ വൻ ഭൂരിപക്ഷത്തോടെ അധികാരത്തിലെത്തുകയും സംഘടനാപരമായി കോൺഗ്രസ് ദുർബലമാകുകയും ചെയ്ത ഘട്ടത്തിലാണ് ദേശീയ രാഷ്ട്രീയത്തിലേക്ക് മാറ്റം കുഞ്ഞാലിക്കുട്ടി ആഗ്രഹിച്ചത്. അതിനാണ് ലോക്സഭയിലേക്ക് പോയതും.യു പി എ അധികാരത്തിലെത്തിയിരുന്നെകിൽ ഘടകകക്ഷിയെന്ന നിലയിൽ ലീഗിന് കാബിനറ്റ് മന്ത്രി പദം ഉറപ്പായിരുന്നു. എം പി പദവിയിൽ സീനിയർ ഇ. ടി. മുഹമ്മദ് ബഷീറാണെങ്കിലും പാർട്ടിയെ നിയന്ത്രിക്കുന്ന കുഞ്ഞാലിക്കുട്ടി തന്നെ മന്ത്രിയാകുമെന്ന കാര്യം ഉറപ്പായിരുന്നു. പക്ഷേ തിരഞ്ഞെടുപ്പിൽ യുപിഎ ദയനീയമായി തകർന്നടിഞ്ഞു.

ഈ സാഹചര്യത്തിലാണ് കേരളത്തിലെ എൽഡിഎഫ് സർക്കാരിനെതിരെ സ്വർണക്കടത്ത് അടക്കമുള്ള ആരോപണങ്ങൾ ശക്തമായതും അടുത്ത തവണ യു ഡി എഫ് അധികാരത്തിൽ വരുമെന്ന പ്രചാരണം ശക്തമായതും. യു ഡി എഫ് അധികാരത്തിലെത്തിയാൽ ലീഗിനു വേണ്ടി വിലപേശൽ നടത്താൻ പറ്റിയ ആൾ എന്ന തിരിച്ചറിവിൽ നിന്നാണ് കേരള രാഷ്ട്രീയത്തിലേക്ക് കുഞ്ഞാലിക്കുട്ടിയെ മടക്കിക്കൊണ്ടുവരാൻ പാർട്ടി തീരുമാനിച്ചത്.

കണക്കുകളുടെ കളി

കേരള നിയമ സഭയിൽ ഇപ്പോഴുള്ള കക്ഷി നിലയനുസരിച്ച് യു ഡി എഫിൽ കോൺഗ്രസിന് 21, മുസ്ലീം ലീഗിന് 18, കേരള കോൺഗ്രസിന് (പിളരുന്നതിന് മുൻപ് ) 5, ജേക്കബ് വിഭാഗത്തിന് ഒന്ന് എന്നിങ്ങനെയാണ് കക്ഷി നില. പിളർന്ന കേരള കോൺഗ്രസിലെ മൂന്നു പേർ മാത്രമാണ് യുഡി എഫിൽ. കോൺഗ്രസും ലീഗും തമ്മിൽ എം എൽ എ മാരുടെ എണ്ണത്തിലുള്ള വ്യത്യാസം 3 മാത്രമാണ്.സംസ്ഥാനത്ത് ചില ജില്ലകളിൽ കോൺഗ്രസിന് നിലവിൽ ഒരു എം എൽ എ പോലുമില്ലാത്ത സാഹചര്യമുണ്ട്. ചിലയിടങ്ങളിൽ ഒറ്റ എം എൽ എ മാത്രവും. എന്നാൽ മലബാറിൽ ലീഗിൻ്റെ ശക്തി കേന്ദ്രങ്ങളിൽ കോൺഗ്രസിന് കാര്യമായി സ്വാധീനം ചെലുത്താനുമാകുന്നില്ല.അടുത്ത തിരഞ്ഞെടുപ്പിൽ യു ഡി എഫ് അധികാരത്തിൽ വരുന്ന സാഹചര്യം ഉണ്ടായാൽ കോൺഗ്രസിനും ലീഗിനും കിട്ടുന്ന സീറ്റുകൾ കേരളത്തിലെ മുഖ്യമന്ത്രിയെ നിർണയിക്കുന്നതിൽ പ്രധാന ഘടകമാകും.ലീഗിൻ്റെ സീറ്റുകളുടെ എണ്ണം ഇപ്പോഴുള്ളതിനെക്കാൾ കൂടുകയും നേരിയ വ്യത്യാസം മാത്രമാണ് കോൺഗ്രസിൻ്റെ സീറ്റുകളുമായി ഉണ്ടാകുന്നതെങ്കിൽ വലിയ വിലപേശലിനാകും യു ഡി എഫ് രാഷ്ട്രീയം സാക്ഷ്യം വഹിക്കുക. ഉപമുഖ്യമന്ത്രി പദം ലീഗിന് നൽകേണ്ടി വരുമെന്നത് തീർച്ച.

ഒരു പക്ഷേ മുഖ്യമന്ത്രി പദം നിശ്ചിത കാലയളവിൽ വീതം വയ്ക്കുക എന്ന നിർദേശം പോലും മുസ്ലീം ലീഗ് മുന്നോട്ടു വച്ചേക്കാം. അധികാരം നിലനിർത്താൻ വേണ്ടി കോൺഗ്രസിന് ഇതിന് വഴങ്ങേണ്ടിയും വന്നേക്കാം. അങ്ങനെയെങ്കിൽ സി എച്ച് മുഹമ്മദ് കോയയ്ക്കു ശേഷം ഒരു മുഖ്യമന്ത്രി ലീഗിൽ നിന്നുണ്ടാകും.ലീഗ് നേതാക്കളായിരുന്ന സി എച്ചും അവുക്കാദർകുട്ടി നഹയും ഉപ മുഖ്യമന്ത്രിമാരായും പ്രവർത്തിച്ചിട്ടുണ്ട്.അങ്ങനെയൊരു സാധ്യത വന്നാലും കുഞ്ഞാലിക്കുട്ടിയല്ലാതെ മറ്റൊരു ചോയിസ് ലീഗിലില്ല. കുഞ്ഞാലിക്കുട്ടിയുടെ കേരള രാഷ്ട്രീയത്തിലേക്കുള്ള മടങ്ങിവരവ് ഒന്നും കാണാതെയല്ല എന്നു ചുരുക്കം.

കെ.വി.മനു