കുരിശിന്റെ വിശുദ്ധ പോള്‍: സ്ഥിരോത്സാഹിയായ സുവിശേഷകന്‍

അനുദിന വിശുദ്ധര്‍ - ഒക്ടോബര്‍ 20

ജെനോവ റിപ്പബ്ലിക്കിലെ ഒവാഡ എന്ന സ്ഥലത്ത് 1694 ജനുവരി മൂന്നിനാണ് കുരിശിന്റെ വിശുദ്ധ പോള്‍ ജനിച്ചത്. ലൂക്ക-അന്ന മരിയ എന്നിവരായിരുന്നു മാതാപിതാക്കള്‍. ഇവരുടെ പതിനാറ് മക്കളില്‍ രണ്ടാമനായിരുന്ന പോള്‍ ബാല്യം മുതല്‍ ക്രിസ്തുവിനു വേണ്ടി സ്വയം സമര്‍പ്പണത്തിന്റെ ഉദാത്ത മാതൃകയായിരുന്നു. ബാല്യകാലം മുതലേ പോളും കൂട്ടുകാരും സന്യസ്ഥ വസ്ത്രം ധരിച്ചാണ് കഴിഞ്ഞിരുന്നത്.

ലോംബാര്‍ഡിയിലെ ക്രെമോലിനോയില്‍ ആണ്‍കുട്ടികള്‍ക്കായി ഒരു സ്‌കൂള്‍ നടത്തിവന്ന ഒരു പുരോഹിതനില്‍ നിന്നാണ് പോള്‍ പ്രാഥമിക വിദ്യാഭ്യാസം നേടിയത്. പതിനഞ്ചാമത്തെ വയസില്‍ സ്‌കൂള്‍ വിട്ട് കാസ്റ്റെല്ലാസോയിലെ വീട്ടിലേക്ക് മടങ്ങി. ആദ്യകാലങ്ങളില്‍ തന്റെ വീടിനടുത്തുള്ള പള്ളികളില്‍ വേദപാഠം പഠിപ്പിച്ചു. പത്തൊമ്പതാം വയസില്‍ പ്രാര്‍ഥനാ ജീവിതത്തിലേക്കുള്ള പരിവര്‍ത്തനം പോള്‍ അനുഭവിച്ചു.

വിശുദ്ധ ഫ്രാന്‍സിസ് ഡി സെയില്‍സ് എഴുതിയ 'ദൈവസ്‌നേഹത്തെക്കുറിച്ചുള്ള ഉടമ്പടി' വായിച്ചും കപ്പുച്ചിന്‍ ഓര്‍ഡറിലെ പുരോഹിതരില്‍ നിന്ന് ലഭിച്ച നിര്‍ദ്ദേശങ്ങള്‍ സ്വീകരിച്ചും ദൈവത്തെ ഏറ്റവും എളുപ്പത്തില്‍ കണ്ടെത്താമെന്ന് അദ്ദേഹത്തിന് ബോധ്യമായി.

ഇരുപത്തിയാറു വയസുള്ളപ്പോള്‍ പ്രാര്‍ത്ഥനാനുഭവങ്ങളുടെ ഒരു പരമ്പര തന്നെ പോളിന് ഉണ്ടായി. സുവിശേഷ ജീവിതം നയിക്കുന്നതും യേശുവിന്റെ അഭിനിവേശത്തില്‍ വെളിപ്പെടുത്തിയ ദൈവസ്‌നേഹത്തെ പ്രോത്സാഹിപ്പിക്കുന്നതുമായ ഒരു സമൂഹം രൂപീകരിക്കാന്‍ ദൈവം തന്നെ ക്ഷണിക്കുന്നുവെന്ന് ഇതോടെ പോളിന് വ്യക്തമായി.

ഒരു സൈനികന്റെ ജീവിതം തന്റെ വിളി അല്ലെന്ന് മനസിലാക്കിയ പോള്‍ 1715 ല്‍ വെനീഷ്യന്‍ റിപ്പബ്ലിക്കിനെ ഭീഷണിപ്പെടുത്തുന്ന തുര്‍ക്കികള്‍ക്കെതിരായ കുരിശുയുദ്ധത്തില്‍ പങ്കുചേരാന്‍ പിതാവിനെ സഹായിക്കുന്ന ജോലി ഉപേക്ഷിച്ചു. കുടുംബ ബിസിനസില്‍ സഹായിക്കാന്‍ അദ്ദേഹം മടങ്ങി. വീട്ടിലേക്കുള്ള യാത്രാമധ്യേ അദ്ദേഹം നോവെല്ലോയില്‍ എത്തി. 1716 അവസാനം വരെ മക്കളില്ലാത്ത ദമ്പതികളെ സഹായിച്ച് അവിടെ കഴിഞ്ഞു. അവര്‍ അവനെ അവകാശിയാക്കാന്‍ വാഗ്ദാനം ചെയ്‌തെങ്കിലും അദ്ദേഹം നിരസിച്ചു.

പിന്നീട് തന്റെ നിര്‍ദ്ദേശകനായ അലക്‌സാട്രിയായിലെ മെത്രാനായ ഗാസ്റ്റിനാരയോട് ആലോചിച്ച് യേശുവിന്റെ പീഡാസഹനത്തിന്റെ ആദരവിനായി ഒരു സന്യാസ സഭ സ്ഥാപിക്കാന്‍ തീരുമാനിച്ചു. താന്‍ ദര്‍ശനത്തില്‍ കണ്ടതു പോലെയുള്ള സന്യാസ വസ്ത്രം മെത്രാന്‍ ഇദ്ദേഹത്തെ ധരിപ്പിച്ചു. ആ നിമിഷം മുതല്‍ തന്റെ സഭയുടെ നിയമ പ്രമാണങ്ങള്‍ തയ്യാറാക്കുന്നതില്‍ അദ്ദേഹം വ്യാപൃതനായി. സഭയ്ക്ക് അംഗീകാരം നേടുന്നതിനായി 1721 ല്‍ പോള്‍ റോമില്‍ പോയെങ്കിലും ഫലമുണ്ടായില്ല.

അവസാനം 1741 ലും 1746 ലുമായി ബെനഡിക്ട് പതിനാലാമന്‍ അദ്ദേഹത്തിന്റെ സഭാ നിയമങ്ങളെ അംഗീകരിച്ചു. ഇക്കാലയളവില്‍ ഒബിടെല്ലോയ്ക്ക് സമീപം വിശുദ്ധന്‍ തന്റെ ആദ്യത്തെ ആശ്രമം സ്ഥാപിച്ചു. കുറച്ച് കാലങ്ങള്‍ക്കു ശേഷം അദ്ദേഹം റോമില്‍ വിശുദ്ധ ജോണിന്റെയും വിശുദ്ധ പൗലോസിന്റെയും പള്ളികളിലായി ഒരു വലിയ സന്യാസ സമൂഹത്തെ രൂപപ്പെടുത്തി.

അര നൂറ്റാണ്ടോളം പോള്‍ ഇറ്റലിയുടെ സ്ഥിരോത്സാഹിയായ സുവിശേഷകനായി തുടര്‍ന്നു. അതിമാനുഷമായ കഴിവുകളാല്‍ ദൈവം അദ്ദേഹത്തെ ധാരാളമായി അനുഗ്രഹിച്ചു. എന്നിരുന്നാലും ഒരു ദാസനായും പാപിയായുമാണ് അദ്ദേഹം സ്വയം വിശേഷിച്ചിരുന്നത്. 1775 ല്‍ തന്റെ 81-ാമത്തെ വയസില്‍ റോമില്‍ വെച്ച് പോള്‍ ദൈവത്തില്‍ നിദ്ര പ്രാപിച്ചു. 1867 ല്‍ പിയൂസ് ഒമ്പതാമന്‍ മാര്‍പാപ്പ അദ്ദേഹത്തെ വിശുദ്ധനായി പ്രഖ്യാപിച്ചു.

ഇന്നത്തെ ഇതര വിശുദ്ധര്‍

1. ആന്‍ഡ്രൂ

2. ഇംഗ്ലണ്ടിലെ അക്കാ

3. നോര്‍മന്റിയിലെ അഡലീന

4. ഈജിപ്തിലെ അര്‍ടേമിയൂസ്

5. ട്രോയെസ്സിലെ അഡെറാള്‍ഡ്

6. പേഴ്‌സ്യന്‍ ആബട്ടായ ബര്‍സബസ്

7. ഐറിഷ് ബിഷപ്പായിരുന്ന അയിടാന്‍.

'അനുദിന വിശുദ്ധര്‍' എന്ന ഈ പരമ്പരയുടെ മുഴുവന്‍ ഭാഗങ്ങളും വായിക്കുവാന്‍ ഇവിടെ ക്ലിക്ക് ചെയ്യുക.