മൂന്നുകോടി കവിഞ്ഞ്​ കോവിഡ്​ രോഗികള്‍; മരണം 9.5 ലക്ഷം

ജനീവ/ മോസ്​കോ: ഒമ്ബതുമാസമായി ലോകത്തെ വരിഞ്ഞുമുറുക്കിയ കോവിഡ്​ മഹാമാരി കൂടുതല്‍ രൂക്ഷമാകുന്നു. ലോകത്താകമാനമുള്ള കോവിഡ്​ രോഗികളുടെ എണ്ണം മൂന്നുകോടി പിന്നിട്ടു. 3.04 കോടി രോഗികളില്‍ 9.52 ലക്ഷം പേരാണ്​ മരണ​െപ്പട്ടത്​. 2.20 കോടി പേരുടെ രോഗം മാറി. 68.75 ലക്ഷം രോഗികളും 2.02 ലക്ഷം മരണവും റിപ്പോര്‍ട്ട്​ ചെയ്​ത അമേരിക്കക്കുപിറകില്‍ 52.15 ലക്ഷം രോഗികളും 84,404 മരണവും സംഭവിച്ച ഇന്ത്യ രണ്ടാം സ്ഥാനത്താണ്​. 44.57 ലക്ഷം രോഗികളും 1.35 ലക്ഷം മരണവും സംഭവിച്ച ബ്രസീല്‍ മൂന്നും 10.91 ലക്ഷം രോഗികളും 19,195 മരണവുമുള്ള റഷ്യ നാലാമതുമാണ്​. ചൈനയില്‍ ഉദ്​​ഭവിക്കുകയും വുഹാനില്‍ പടര്‍ന്നുപിടിക്കുകയും ചെയ്​ത വൈറസ്​ പിന്നീട്​ യൂറോപ്പിലും ലാറ്റിനമേരിക്കയിലും ദക്ഷിണേഷ്യയിലും വ്യാപിക്കുകയായിരുന്നു. അതേസമയം, കോവിഡ്​ വീണ്ടും രൂക്ഷമായതിനെ തുടര്‍ന്ന്​ സ്​​െപയിന്‍, ഫ്രാന്‍സ്​, ഇംഗ്ലണ്ട്​ എന്നീ യൂറോപ്യന്‍ രാജ്യങ്ങള്‍ വീണ്ടും ലോക്​ഡൗണ്‍ ഏര്‍​െപ്പടുത്തുന്നതും പരിഗണിക്കുന്നുണ്ട്​.

ലോകത്തിന്​ പ്രതീക്ഷ നല്‍കിയ കോവിഡ്​ വാക്​സിന്‍ 'സ്​പുട്​നിക്​ 5' പാര്‍ശ്വ ഫലങ്ങളുണ്ടാക്കുന്നതായും ജീവിതകാലം മുഴുവന്‍ പ്രതിരോധ ശേഷി നല്‍കില്ലെന്നും അധികൃതര്‍ വ്യക്​തമാക്കി. വാക്​സിന്‍ നല്‍കിയവരില്‍ 14 ശതമാനം പേര്‍ക്ക്​ പനി, ശരീരവേദന തുടങ്ങിയവ അനുഭവപ്പെട്ടതായി റഷ്യന്‍ ആരോഗ്യമന്ത്രി മിഖായേല്‍ മുറാഷ്​കോ വ്യക്​തമാക്കി. 300ലധികം സന്നദ്ധ പ്രവര്‍ത്തകര്‍ക്കാണ്​ ഇതിനകം കുത്തിവെപ്പ്​ നല്‍കിയത്​. 40,000 പേര്‍ക്ക്​ കുത്തിവെപ്പ്​ നല്‍കാനാണ്​ ലക്ഷ്യം. വാക്​സിന്‍ കുത്തിവെപ്പ്​ നല്‍കി 24 മണിക്കൂറിനകമാണ്​ ചെറിയരീതിയിലുള്ള ശാരീരിക പ്രശ്​നങ്ങള്‍ അനുഭവ​പ്പെട്ടതെന്ന്​ മന്ത്രി പറഞ്ഞു. വെക്​ടര്‍ വികസിപ്പിച്ച 'സ്​പുട്​നിക്​ -5ന്​ ആറുമാസത്തെ പ്രതിരോധശേഷിയേ ഉറപ്പുനല്‍കാനാകൂവെന്ന്​ സൂണോട്ടിക്​ ഡിസീസസ്​ ആന്‍ഡ്​ ഫ്ലൂ വകുപ്പ്​ മേധാവി അലക്​സാണ്ടര്‍ റിഷികോവ്​ പറഞ്ഞു. 21 ദിവസങ്ങള്‍ക്കിടയിലുള്ള വാക്​സിന്‍ കുത്തിവെപ്പിലൂടെ ജീവിതകാലം മുഴുവന്‍ കോവിഡ്​ പ്രതിരോധ ശേഷി ഉറപ്പാക്കാനാകില്ലെന്നും അദ്ദേഹം വ്യക്​തമാക്കി.

അതേസമയം, ഇന്ത്യയില്‍ അധികൃതരുടെ അനുമതി കിട്ടിയാല്‍ ഡോ. റെഡ്ഡീസ്​ ലബോറട്ടറീസിന്​ 10 കോടി വാക്​സിന്‍ ഡോസുകള്‍ കൈമാറുമെന്ന്​ റഷ്യന്‍ ഡയറക്​ട്​ ഇന്‍വെസ്​റ്റ്​മെന്‍റ്​ ഫണ്ട്​ വ്യക്​തമാക്കി.