കത്വ: ജമ്മു കാശ്മീരിലുണ്ടായ ഇരട്ട സ്‌ഫോടനത്തിനിടെ ഒരു ദിവസത്തെ ഇടവേളയ്ക്ക് ശേഷം രാഹുല്‍ ഗാന്ധി നയിക്കുന്ന ഭാരത് ജോഡോ യാത്ര പുനരാരംഭിച്ചു. ജമ്മു കശ്മീരിലെ കത്വ ജില്ലയിലെ ഹിരാനഗര്‍ മോറില്‍ നിന്നുമാണ് യാത്ര വീണ്ടും ആരംഭിച്ചത്. സ്‌ഫോടനങ്ങളുടെ പശ്ചാത്തലത്തില്‍ കനത്ത സുരക്ഷയാണ് യാത്രയ്ക്ക് ഒരുക്കിയിട്ടുള്ളത്.
വൈകുന്നേരത്തോടെ യാത്ര ചക് നാനാക് ഗ്രാമത്തിലെത്തും. തിങ്കളാഴ്ച വിജയ്പൂരില്‍ നിന്ന് യാത്ര പുനരാരംഭിച്ച് ജമ്മുവിലെ സിദ്രയിലേക്ക് പോകും. യാത്രയുടെ സുരക്ഷ ഉറപ്പാക്കാന്‍ പൊലീസും സിആര്‍പിഎഫും മറ്റ് സുരക്ഷാ ഏജന്‍സികളും കനത്ത ജാഗ്രത പുലര്‍ത്തുന്നുണ്ട്.
രാഹുല്‍ ഗാന്ധിക്ക് പ്രത്യേക സുരക്ഷാ ക്രമീകരണങ്ങള്‍ ഒരുക്കിയിട്ടുണ്ടെന്ന് ഉദ്യോഗസ്ഥര്‍ പറഞ്ഞു. ശനിയാഴ്ച നര്‍വാള്‍ മേഖലയിലുണ്ടായ ഇരട്ട ബോംബ് സ്ഫോടനങ്ങളില്‍ ഒമ്പത് പേര്‍ക്ക് പരിക്കേറ്റതിന്റെ പശ്ചാത്തലത്തില്‍ ജമ്മു കശ്മീരിലുടനീളം സുരക്ഷ വര്‍ധിപ്പിച്ചിട്ടുണ്ട്.
സംഭവത്തില്‍ വിവിധ ഏജന്‍സികള്‍ ചേര്‍ന്ന് അന്വേഷണം ഊര്‍ജ്ജിതമാക്കി. കസ്റ്റഡിയിലെടുത്ത ആറ് പേരെ പൊലീസ് ചോദ്യം ചെയ്തു വരികയാണ്. എന്നാല്‍ ഇവര്‍ക്ക് ഏതെങ്കിലും സംഘടനകളുമായി ബന്ധമുണ്ടോ എന്ന കാര്യം വ്യക്തമല്ല. സ്‌ഫോടനത്തിന് പിന്നില്‍ എന്തെങ്കിലും ഭീകര സംഘടനകള്‍ക്ക് ബന്ധമുണ്ടോയെന്നും പൊലീസ് സ്ഥിരീകരിച്ചിട്ടില്ല.
സംഭവ സ്ഥലത്ത് സൈന്യവും എന്‍ഐഎയും ഇന്നലെ പരിശോധന നടത്തിയിരുന്നു. എന്‍ഐഎ പ്രാഥമിക വിവര ശേഖരണവും നടത്തിയിട്ടുണ്ട്. അന്വേഷണം എന്‍ഐഎയ്ക്ക് കൈമാറിയേക്കും.
ഇന്നലെ രാവിലെ പത്തിനും പതിനൊന്നരയ്ക്കും ഇടയിലാണ് രണ്ട് സ്‌ഫോടനങ്ങള്‍ നടന്നത്. നര്‍വാളിലെ ട്രാന്‍സ്‌പോര്‍ട്ട് നഗറിലെ ഏഴാം നമ്പര്‍ യാര്‍ഡിലാണ് സ്‌ഫോടനം. ട്രക്കുകളുടെ കേന്ദ്രമായ ഇവിടെ നിരവധി വര്‍ക്ക് ഷോപ്പുകള്‍ പ്രവര്‍ത്തിക്കുന്നുണ്ട്. രാവിലെ അറ്റകുറ്റപ്പണിക്കായി എത്തിച്ച ഒരു കാറാണ് പൊട്ടിത്തെറിച്ചത്. അരമണിക്കൂറിന് ശേഷം മറ്റൊരു കാറിലും സ്‌ഫോടനം നടന്നു.
പരിക്കേറ്റവര്‍ക്ക് അന്‍പതിനായിരം രൂപ സഹായധനം ജമ്മു കശ്മീര്‍ ലഫ് ഗവര്‍ണര്‍ പ്രഖ്യാപിച്ചിട്ടുണ്ട്. ആസൂത്രിതമായ സ്‌ഫോടനമെന്നാണ് പൊലീസ് പറയുന്നത്. ഐഇഡി ഉപയോഗിച്ചാണ് സ്‌ഫോടനം നടത്തിയത്. നേരത്തെ റിപ്പബ്ലിക് ദിനത്തിനു മുന്‍പ് ആക്രമണസാധ്യതയുണ്ടെന്ന് രഹസ്യാന്വേഷണ വിഭാഗത്തിന്റെ മുന്നറിയിപ്പുണ്ടായിരുന്നു.
രാഹുല്‍ ഗാന്ധിയുടെ ഭാരത് ജോഡോ യാത്ര ജമ്മുവിലൂടെ കടന്നു പോകുന്നതിനിടെയാണ് സ്‌ഫോടനമുണ്ടായത്. എന്നാല്‍ ഭാരത് ജോഡോ യാത്ര നിര്‍ത്തില്ലെന്ന് കോണ്‍ഗ്രസ് വ്യക്തമാക്കിയിട്ടുണ്ട്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.