ഗ്രീസിലെ ട്രെയിൻ അപകടം: മരണം 43 ആയി; രാജ്യത്ത് മൂന്ന് ദിവസത്തെ ദുഃഖാചരണം; ധാർമിക ഉത്തരവാദിത്വം ഏറ്റെടുത്ത് ഗതാഗത മന്ത്രിയുടെ രാജി

ഗ്രീസ്: ഗ്രീസിൽ അതിവേഗ പാസഞ്ചർ തീവണ്ടി, ചരക്ക് ട്രെയിനുമായി കൂട്ടിയിടിച്ചുണ്ടായ അപകടത്തിൽ ആകെ മരണസംഖ്യ 43 ആയി ഉയർന്നു. അപകടത്തെ തുടർന്ന് ഗ്രീസ് മൂന്ന് ദിവസത്തെ ദേശീയ ദുഃഖാചരണം പ്രഖ്യാപിച്ചു. രാജ്യത്തെ ഏറ്റവും വലിയ റെയിൽ അപകടമാണിത്.

നൂറുകണക്കിന് ആളുകളുമായി പോകുന്ന അതിവേഗ പാസഞ്ചർ ട്രെയിൻ എതിരെ വന്ന ചരക്ക് ട്രെയിനുമായി കൂട്ടിയിടിച്ചതോടെ നിരവധി പേർക്ക് പരിക്കേൽക്കുകയും ചെയ്തിരുന്നു. അപകട കാരണം സങ്കേതിക തകരാർ അല്ല, മറിച്ച് പ്രധാനമായും മനുഷ്യ പിഴവിലേക്ക് വിരൽ ചൂണ്ടുന്നത് എന്നാണ് പ്രധാനമന്ത്രി കിരിയാക്കോസ് മിറ്റ്സോതാകിസ് വ്യക്തമാക്കിയത്.

ചരക്ക് തീവണ്ടി മണിക്കൂറിൽ 160 കിലോമീറ്റർ വേഗത്തിലും പാസഞ്ചർ ട്രെയിൻ 140 കിലോമീറ്റർ വേഗത്തിലുമായിരുന്നുവെന്നാണ് കരുതപ്പെടുന്നത്. തുടർന്ന് ഏഥൻസിൽ നിന്ന് 321 കിലോമീറ്റർ വടക്ക് ലാറിസ പട്ടണത്തിന് സമീപം അദ്ദേഹം ട്രെയിനുകൾ കൂട്ടിയിടിച്ചു. ഏഥൻസിൽ നിന്ന് ഗ്രീസിന്റെ വടക്കൻ നഗരമായ തെസ്സലോനിക്കിയിലേക്ക് പോകുകയായിരുന്നു പാസഞ്ചർ ട്രെയിൻ.

പാസഞ്ചർ ട്രെയിനിൽ 342 യാത്രക്കാരും 10 ജീവനക്കാരുമാണ് ഉണ്ടായിരുന്നത്. ചരക്ക് ട്രെയിനിൽ രണ്ട് ജീവനക്കാരാണ് ഉണ്ടായിരുന്നത്.

43 പേർ മരിച്ചതായി അധികൃതർ അറിയിച്ചു. ചിലരുടെ നില ഗുരുതരമായി തുടരുന്നതിനാൽ എണ്ണം ഉയരാനും സാധ്യതയുണ്ട്. തീവണ്ടിയിൽ ഉണ്ടായ തീപിടുത്തം അകത്ത് കുടുങ്ങിക്കിടക്കുന്നവരെ തിരിച്ചറിയുന്നതിനോ എത്രപേർ മരിച്ചുവെന്ന് നിർണ്ണയിക്കുന്നതിനോ ബുദ്ധിമുട്ടുണ്ടായതായി അധികൃതർ പറഞ്ഞു.

66 പേരെ ആശുപത്രിയിൽ പ്രവേശിപ്പിച്ചതായും ആറുപേരെ തീവ്രപരിചരണ വിഭാഗത്തിൽ പ്രവേശിപ്പിച്ചതായും അവർ വ്യക്തമാക്കി. അപകടത്തിൽപെട്ടവരിൽ പലരും വാരാന്ത്യ അവധി കഴിഞ്ഞ് വീട്ടിലേക്ക് മടങ്ങുന്ന യൂണിവേഴ്സിറ്റി വിദ്യാർത്ഥികളാണെന്ന് കരുതപ്പെടുന്നു.

ചരക്ക് ട്രെയിനിലെ രണ്ട് ഡ്രൈവർമാരും പാസഞ്ചർ ട്രെയിനിലെ രണ്ട് ഡ്രൈവർമാരും ഉൾപ്പെടെ എട്ട് റെയിൽവേ ജീവനക്കാർ മരിച്ചവരിൽ ഉൾപ്പെടുന്നു. അപകടത്തെ "ചിന്തിക്കാൻ പോലും കഴിയാത്ത ദുരന്തം" എന്നാണ് മിറ്റ്സോതാകിസ് വിശേഷിപ്പിച്ചത്.

അതിനിടെ അപകടത്തിന്റെ ധാർമിക ഉത്തരവാദിത്വം ഏറ്റെടുത്ത് രാജ്യത്തെ ഗതാഗത മന്ത്രി രാജിവെച്ചു. അപകടത്തിൽ മരണമടഞ്ഞ ആളുകളുടെ ഓർമ്മയോടുള്ള ആദരവിന്റെ അടിസ്ഥാന സൂചകമായി താൻ സ്ഥാനമൊഴിയുകയാണെന്ന് വ്യക്തമാക്കിക്കൊണ്ടാണ് കോസ്റ്റാസ് കരമാൻലിസ് രാജിവച്ചത്. 21-ാം നൂറ്റാണ്ടിന് അനുയോജ്യമല്ലാത്ത ഒരു റെയിൽവേ സംവിധാനം നന്നാക്കിയെടുക്കുന്നതിൽ രാജ്യം പരാജയപ്പെട്ടതിന്റെ ഉത്തരവാദിത്തം ഏറ്റെടുക്കുകയാണെന്നും അദ്ദേഹം പറഞ്ഞു.

മാത്രമല്ല അപകടത്തിന് പിന്നാലെ സ്റ്റേഷൻ മാസ്റ്റർ അറസ്റ്റിലുമായി. സിഗ്നലിംഗ് ചുമതലയുള്ള ലോക്കൽ സ്റ്റേഷൻ മാസ്റ്ററിനെതിരെ അശ്രദ്ധമൂലം കൂട്ടമരണങ്ങൾ ഉണ്ടാക്കി, അശ്രദ്ധമൂലം ഗുരുതരമായ ദേഹോപദ്രവം ഉണ്ടാക്കി എന്നീ വകുപ്പുകളിൽ കേസെടുത്തിട്ടുണ്ടെന്ന് പോലീസ് പറഞ്ഞു.

എന്നാൽ ആരോപണങ്ങളെ 59 കാരനായ സ്റ്റേഷൻ മാസ്റ്റർ നിഷേധിച്ചു. സംഭവത്തിൽ തനിക്ക് യാതൊരു ഉത്തരവാദിത്വവും ഇല്ലെന്നും സാങ്കേതിക തകരാറാണ് അപകടത്തിന് കാരണമെന്നും സ്റ്റേഷൻ മാസ്റ്റർ വാദിച്ചു.

അതേസമയം ഗ്രീക്ക് റെയിൽവേയോട് സർക്കാരുകൾ വർഷങ്ങളായി കാണിച്ച അനാദരവാണ് ദാരുണമായ ഈ സംഭവത്തിന് കാരണമെന്നാരോപിച്ച് രാജ്യത്തെ റെയിൽവേ ജീവനക്കാർ പണിമുടക്ക് പ്രഖ്യാപിക്കുകയും ചെയ്തിരുന്നു.