അബുദാബി: ദുബായ് ഗ്ലോബൽ വില്ലേജിന്റെ 28-ാം സീസണിലേക്കുളള വിഐപി ടിക്കറ്റുകൾ വിറ്റുപോയത് റെക്കോർഡ് വേഗത്തിൽ.1750 ദിർഹം മുതൽ 7,000 ദിർഹം വരെയായിരുന്നു ടിക്കറ്റിന്റെ വില. ഒക്ടോബർ 11 മുതലാണ് ഗ്ലോബൽ വില്ലേജിന്റെ പുതിയ സീസണിന് തുടക്കമാകുക. ഇന്ന് രാവിലെ പത്ത് മണിക്കാണ് വിഐപി ടിക്കറ്റുകളുടെ വിൽപ്പന ആരംഭിച്ചത്. 11.21 ആയപ്പോൾ മുഴുവൻ ടിക്കറ്റുകളും വിറ്റുപോയിരുന്നു.
എല്ലാ വിഐപി പാസുകളും വിറ്റുപോയതായും 28-ാം സീസണിൽ ഏവരേയും സ്വാഗതം ചെയ്യുന്നതിനായും ഗ്ലോബൽ വില്ലേജ് അധികൃതർ സമൂഹമാധ്യമത്തിലൂടെ അറിയിച്ചു. സിൽവർ, ഗോൾഡ്, പ്ലാറ്റിനം, ഡയമണ്ട് എന്നിങ്ങനെ നാല് തരം ടിക്കറ്റുകളാണുള്ളത്. ഡയമണ്ട് വിഐപി പാസുകൾ 7000 ദിർഹത്തിനും പ്ലാറ്റിനം പാസുകൾ 2950 ദിർഹത്തിനുമാണ് ലഭ്യമാക്കിയത്. ഗോൾഡൻ പാസിന് 2250 ദിർഹം, സിൽവർ പാസുകൾക്ക് 1750 ദിർഹം എന്നിങ്ങനെയാണ് മറ്റ് നിരക്കുകൾ.
വിർജിൻ മെഗാസ്റ്റോർ വെബ്സൈറ്റ് വഴിയാണ് ടിക്കറ്റുകളുടെ ബുക്കിംഗും വിൽപ്പനയും നടന്നത്. വിഐപി പാക്കേജ് സ്വന്തമാക്കിയവരിൽ നിന്ന് തെരഞ്ഞെടുക്കപ്പെടുന്ന ഒരാൾക്ക് 28-ാം സീസണിന്റെ സ്മരണയ്ക്കായി 28,000 ദിർഹം സമ്മാനമായി നൽകും. ഒട്ടേറെ പുതുമകളാണ് ഇത്തവണ ഗ്ലോബൽ വില്ലേജ് കാണികൾക്കായി ഒരുക്കിയിരിക്കുന്നത്. ഓരോ വർഷവും ലോകത്തിന്റെ വിവിധ ഭാഗങ്ങളിൽ നിന്ന് ദശലക്ഷക്കണക്കിന് സന്ദർശകരാണ് ഗ്ലോബൽ വില്ലേജിൽ എത്താറുള്ളത്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.