'സ്വര്‍ഗത്തെ' വരവേല്‍ക്കാന്‍ ഓസ്‌ട്രേലിയ; പെര്‍ത്തിലും ബ്രിസ്‌ബെയ്‌നിലും ആദ്യ ഷോയുടെ എല്ലാ ടിക്കറ്റുകളും വിറ്റഴിഞ്ഞു

പെര്‍ത്ത്: സി.എന്‍ ഗ്ലോബല്‍ മൂവീസ് ടീമിന്റെ ആദ്യചിത്രമായ 'സ്വര്‍ഗ'ത്തിന് ഓസ്‌ട്രേലിയയില്‍ വന്‍ വരവേല്‍പ് നല്‍കാനുള്ള ഒരുക്കത്തിലാണ് പ്രവാസി മലയാളികള്‍. മലയാളികള്‍ ഏറെയുള്ള നഗരങ്ങളായ പെര്‍ത്തിലും ബ്രിസ്‌ബെയ്‌നിലും സിനിമയുടെ ആദ്യ ഷോയുടെ എല്ലാ ടിക്കറ്റുകളും വിറ്റഴിഞ്ഞു.

പെര്‍ത്തിലെ ഇന്നലൂ ഇവന്റ് സിനിമാസില്‍ (Event Cinemas - Innaloo) ഇന്ന് രാത്രി ഒന്‍പതിനാണ് ആദ്യ ഷോ. തുടര്‍ന്ന് മൂന്ന് ദിവസങ്ങളിലും (നവം: 9, 11, 12) രാത്രി ഒന്‍പത് മണിക്ക് ഷോയുണ്ടായിരിക്കും. പെര്‍ത്തില്‍ ഒരു തീയറ്ററിലെ ബുക്കിങ് പൂര്‍ണമായതോടെ ഇവിടെത്തന്നെ രണ്ടാമതൊരു തീയറ്ററില്‍ കൂടി ഇന്ന് രാത്രി 8.50-ന് ചിത്രം പ്രദര്‍ശിപ്പിക്കുന്നുണ്ട്.

ക്വീന്‍സ് ലന്‍ഡിലെ ബ്രിസ്ബെയ്നിലുള്ള മൗണ്ട് ഗ്രാവറ്റ് ഇവന്റ് സിനിമാസിലും (EVENT CINEMAS MT GRAVATT) 'സ്വര്‍ഗത്തിന്റെ' ആദ്യ ഷോയുടെ ടിക്കറ്റുകള്‍ വിറ്റുതീര്‍ന്നു. ഇന്നു രാത്രി ഒന്‍പതിനാണ് ആദ്യ ഷോ. തുടര്‍ന്നുള്ള മൂന്നു ദിവസങ്ങളിലും ഷോയുണ്ടായിരിക്കും. നവംബര്‍ 9 ശനിയാഴ്ച്ച വൈകുന്നേരം അഞ്ച്, ഞായര്‍ വൈകുന്നേരം അഞ്ച്, ചൊവ്വാഴ്ച്ച രാത്രി ഒന്‍പത് എന്നിങ്ങനെയാണ് പ്രദര്‍ശന സമയം.

വിക്ടോറിയയില്‍ സണ്‍ഷൈന്‍ വില്ലേജ് സിനിമാസ് (Village Cinemas Sunshine), ന്യൂ സൗത്ത് വെയില്‍സില്‍ വുലങ്ങോങ് ഗാല സിനിമാസ് (Wollongong Gala Cinema), ലിവര്‍പൂള്‍ ഇവന്റ് സിനിമാസ് (Event Cinemas Liverpool) എന്നിവിടങ്ങളിലാണ് ഷോയുള്ളത്. സൗത്ത് ഓസ്‌ട്രേലിയയില്‍ ഇവന്റ് സിനിമാസ് മാരിയോണിലാണ് (Event Cinemas Marion) സ്വര്‍ഗം പ്രദര്‍ശിപ്പിക്കുന്നത്.

കുടുംബ ബന്ധങ്ങളിലെ ഇഴയടുപ്പവും വൈകാരിക മുഹൂര്‍ത്തങ്ങളും ഹൃദയസ്പര്‍ശിയായി അവതരിപ്പിക്കുന്ന ചിത്രത്തെ ഓസ്ട്രേലിയയിലെ മലയാളികളും ഏറെ ആകാംക്ഷയോടെയാണ് കാത്തിരിക്കുന്നത്. 

ലോകമെമ്പാടുമുള തിയറ്ററുകളില്‍ റിലീസ് ചെയ്യുന്ന ചിത്രത്തിന്റെ ഓസ്‌ട്രേലിയയിലെ ഓണ്‍ലൈന്‍ ബുക്കിങ്ങിനായി ചുവടെയുള്ള ലിങ്ക് സന്ദര്‍ശിക്കാം.

https://www.eventcinemas.com.au/Movie/Swargam#cinemas=24,68,64,59,58,44,61,89,65,30,28,53,43,56,36,92,5,94,15,21,87,62,7,96,48,17,93,85,19,79,50,55,22,38,82,71,74,73,72,75,18,49,77,86,23,91,66,34,47,63,83,26,52,37,69,81,9,90&date=2024-11-08

അജു വര്‍ഗീസിനും ജോണി ആന്റണിക്കുമൊപ്പം അനന്യ, മഞ്ജു പിള്ള ജോണി സിജോയ് വര്‍ഗീസ്, വിനീത് തട്ടില്‍, ഉണ്ണി രാജ, അഭിരാം രാധാകൃഷ്ണന്‍, രഞ്ജി കാങ്കോല്‍, മനോഹരി ജോയ്, തുഷാര പിള്ള, കുടശനാട് കനകം, സൂര്യ, മഞ്ചാടി ജോബി തുടങ്ങിയ വന്‍ താര നിര തന്നെ ചിത്രത്തില്‍ ഉണ്ട്.

മധ്യ തിരുവതാംകൂറിലെ ക്രൈസ്തവ പശ്ചാത്തലത്തില്‍ അയല്‍വാസികളായ രണ്ട് കുടുംബങ്ങളുടെ ജീവിതപശ്ചാത്തലമാണ് സിനിമയുടെ ഇതിവൃത്തം. പാലായിലെ കഠിനാധ്വാനികളായ ക്രൈസ്തവരുടെ ഇടയിലെ സ്‌നേഹവും സൗഹൃദവും കൂട്ടായ്മയും ദൈവവിശ്വാസവും കൂട്ടിയിണക്കിയാണ് ചിത്രം ഒരുക്കിയിരിക്കുന്നത്.

നല്ല കലാസൃഷ്ടികളും മികച്ച സിനിമകളും നിര്‍മിക്കുക എന്ന ലക്ഷ്യത്തോടെ പ്രവാസികളുടെ കൂട്ടായ്മയില്‍ രൂപംകൊണ്ട സിഎന്‍ ഗ്ലോബല്‍ മൂവീസ് ടീമിന്റെ ആദ്യ ചിത്രമാണ് 'സ്വര്‍ഗം'.

റെജിസ് ആന്റണിയാണ് സംവിധായകന്‍. ലിസി കെ ഫെര്‍ണാണ്ടസിന്റെ കഥയ്ക്ക് റെജിസ് ആന്റണിയും റോസ് റെജിസും ചേര്‍ന്നാണ് തിരക്കഥയും സംഭാഷണവും ഒരുക്കിയിരിക്കുന്നത്.

സന്തോഷ് വര്‍മ, ഹരിനാരായണന്‍, ബേബി ജോണ്‍ കലയന്താനി എന്നിവരാണ് ഗാനങ്ങള്‍ രചിച്ചിരിക്കുന്നത്. ബിജിബാല്‍, ജിന്റോ ജോണ്‍, ലിസി കെ ഫെര്‍ണാണ്ടസ് എന്നിവരുടേതാണ് സംഗീതം. പ്രശസ്ത ഗായകരായ വിജയ് യേശുദാസ്, കെ.എസ് ചിത്ര, ഹരിചരണ്‍, സുദീപ് കുമാര്‍, സൂരജ് സന്തോഷ്, അന്ന ബേബി എന്നിവരും ഒരുപറ്റം ഗായകരും ചേര്‍ന്നാണ് ഗാനങ്ങള്‍ ആലപിച്ചിരിക്കുന്നത്.