പാലക്കാട്: അടൂരില്‍ നിന്നെത്തിയ തന്റെ മകന്‍ പാലക്കാടിന്റെ എംഎല്‍എ ആകാന്‍ പോകുന്നതില്‍ സന്തോഷമുണ്ടെന്ന് രാഹുല്‍ മാങ്കൂട്ടത്തിലിന്റെ അമ്മ ബീന. രാഹുലിന്റെ വിജയത്തില്‍ കുടുംബത്തിന്റെ സന്തോഷം മാധ്യമങ്ങളുമായി പങ്കുവയ്ക്കുകയായിരുന്നു അവര്‍.
'മകന്റെ ലക്ഷ്യങ്ങളെല്ലാം നേടികൊടുത്തത് അവന്റെ പ്രസ്ഥാനമാണ്. വിജയത്തില്‍ വളരെയധികം സന്തോഷിക്കുന്നു. കഷ്ടപ്പെട്ടതിന്റെ പ്രതിഫലം കിട്ടി. പാലക്കാട്ടെ ജനങ്ങള്‍ മകനെ ഹൃദയത്തിലേറ്റി. അവരോടാണ് നന്ദി പറയുന്നത്. പാലക്കാട്ടേയ്ക്ക് താമസം മാറുമെന്ന് പ്രതീക്ഷയില്ലായിരുന്നു. ഇനി പാലക്കാട്ടുകാരിയായി ജീവിക്കും.
രാഹുലിന് കുടുംബത്തിന്റെയും കൂട്ടുകാരുടെയും പിന്തുണയുണ്ടായിരുന്നു. ചെറുപ്പത്തില്‍ മകന്‍ പാര്‍ട്ടിയില്‍ പ്രവര്‍ത്തിച്ചപ്പോള്‍ എതിര്‍പ്പ് പ്രകടിപ്പിച്ചു. പിന്നീട് അവന്റെ താല്‍പര്യം രാഷ്ട്രീയമാണെന്ന് മനസിലാക്കിയതോടെ പിന്തുണയായി നിന്നു'- രാഹുലിന്റെ അമ്മ പറഞ്ഞു.
18,715 വോട്ടുകളുടെ റെക്കോര്‍ഡ് ഭൂരിപക്ഷത്തിലാണ് രാഹുല്‍ പാലക്കാട് വിജയിച്ചത്. ഷാഫി പറമ്പിലില്‍ നേടിയതിനെക്കാള്‍ നാലിരട്ടിയിലധികം ഭൂരിപക്ഷത്തോടെയാണ് രാഹുലിന്റെ വിജയം. ഫല പ്രഖ്യാപനത്തിന് തൊട്ടു മുന്‍പും വലിയ പ്രതീക്ഷയാണ് രാഹുല്‍ പ്രകടിപ്പിച്ചത്.
പിരായിരി പഞ്ചായത്തിലെ വോട്ടുകളാണ് രാഹുലിന് വലിയ ഭൂരിപക്ഷം നേടിക്കൊടുത്തത്. പിരിയാരിയില്‍ 6775 വോട്ടുകളാണ് നേടിയത്. പോസ്റ്റല്‍ വോട്ടുകളിലും ആദ്യ മണിക്കൂറുകളിലും മുന്നിലായിരുന്ന ബിജെപി സ്ഥാനാര്‍ത്ഥി സി. കൃഷ്ണകുമാറിനെ ആറാം റൗണ്ട് മുതലാണ് രാഹുല്‍ പിന്നിലാക്കിയത്. ഇടത് സ്ഥാനാര്‍ത്ഥി പി.സരിന്‍ വോട്ടെണ്ണലിന്റെ തുടക്കം മുതല്‍ മൂന്നാം സ്ഥാനത്തായിരുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.