ന്യൂഡല്‍ഹി: ഉത്തരേന്ത്യയില്‍ അതിശൈത്യവും മൂടല്‍മഞ്ഞും ശക്തമാകുന്നു. ഡല്‍ഹിയില്‍ വായുമലിനീകരണത്തിനൊപ്പം മൂടല്‍മഞ്ഞും രൂക്ഷമായതിനാല്‍ ഗതാഗത സംവിധാനങ്ങള്‍ എല്ലാം തന്നെ പ്രതിസന്ധിയിലാണ്. രാജ്യതലസ്ഥാനം കൂടാതെ ഉത്തര്‍പ്രദേശ്, ഹരിയാന എന്നിവിടങ്ങളിലും പുകമഞ്ഞുള്ളതിനാല്‍ ഒച്ചിഴയുന്ന വേഗത്തിലാണ് വാഹനങ്ങള്‍ക്ക് സഞ്ചരിക്കാന്‍ കഴിയുന്നത്.
ഡല്‍ഹി വിമാനത്താവളത്തിലെ സര്‍വീസുകളെയും കനത്ത മൂടല്‍മഞ്ഞ് ബാധിച്ചു. കാലാവസ്ഥാ വ്യതിയാനത്തെത്തുടര്‍ന്ന് വിമാന സര്‍വീസുകള്‍ പലതും താത്കാലികമായി നിര്‍ത്തിവച്ചതായി ഇന്‍ഡിഗോ അറിയിച്ചു. ദൃശ്യപരത കുറഞ്ഞതിനാല്‍ മുന്‍കരുതലിന്റെ ഭാഗമായാണ് നടപടി. എയര്‍ ഇന്ത്യയുടെ സര്‍വീസുകളും താമസിച്ചാണ് എത്തിയത്. ഉത്തരേന്ത്യയിലെ മുഴുവന്‍ വിമാനസര്‍വീസുകളെയും പുകമഞ്ഞ് ബാധിച്ചിട്ടുണ്ട്. മോശം കാലാവസ്ഥ കാരണം 400ലധികം സര്‍വീസുകളാണ് വൈകിയതെന്നാണ് കണക്ക്.
കഴിഞ്ഞ ദിവസം ഉത്തരേന്ത്യയില്‍ ട്രെയിന്‍ ഗതാഗതവും സ്തംഭിച്ചിരുന്നു. 24 ട്രെയിനുകള്‍ താമസിച്ചും 13 സര്‍വീസുകള്‍ പുനക്രമീകരിച്ചുമാണ് സര്‍വീസ് നടത്തിയത്. വെള്ളിയാഴ്ച ദിവസം ഡല്‍ഹി നഗരത്തിലെ കൂടിയ താപനില 21.2 ഡിഗ്രി സെല്‍ഷ്യസും കുറഞ്ഞ താപനില 7 ഡിഗ്രി സെല്‍ഷ്യസുമാണ് രേഖപ്പെടുത്തിയത്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.