കൊച്ചി: കുവൈറ്റ് വിഷമദ്യ ദുരന്തത്തില്‍ നാടു കടത്തപ്പെട്ട ബംഗളുരു സ്വദേശി സൂരജ് ലാമ മരിച്ചതായി സംശയം. കളമശേരി എച്ച്എംടിയ്ക്ക് സമീപമാണ് സൂരജ് ലാമയുടേതെന്ന്(58) സംശയിക്കുന്ന മൃതദേഹം കണ്ടെത്തിയത്. വിഷമദ്യ ദുരന്തത്തില്‍ ഓര്‍മ നഷ്ടപ്പെട്ട ലാമയെ കുവൈറ്റ് അധികൃതര്‍ കൊച്ചിയിലേക്ക് നാടുകടത്തുകയായിരുന്നു.
എന്നാല്‍ നാടുകടത്തിയ കാര്യം ലാമയുടെ കുടുംബത്തെ അധികൃതര്‍ അറിയിച്ചിരുന്നില്ല. ഓര്‍മ ശക്തി നഷ്ടപ്പെട്ട ആളായതിനാല്‍ നെടുമ്പാശ്ശേരിയില്‍ വിമാനം ഇറങ്ങിയ ലാമ പിന്നീട് വിമാനത്താവളത്തിന്റെ പരിസരത്തും തൃക്കാക്കര പരിസരത്തുമൊക്കെ അലഞ്ഞു നടക്കുകയായിരുന്നു. ഈ സമയത്ത് ലാമയെ ഒക്ടോബര്‍ എട്ടിന് തൃക്കാക്കര പൊലീസ് കണ്ടെത്തുകയും തുടര്‍ന്ന് കളമശേരി മെഡിക്കല്‍ കോളേജില്‍ പ്രവേശിപ്പിക്കുകയും ചെയ്തിരുന്നു.
ലാമ നാട്ടില്‍ ഉണ്ടെന്ന വിവരം പൊലീസാണ് കുടുംബത്തെ അറിയിച്ചത്. എന്നാല്‍ അദേഹത്തിന്റെ കുടുംബം അവിടെ എത്തുമ്പോഴേക്കും ലാമ ആശുപത്രിയില്‍ നിന്നും പൊയിരുന്നു. ഓര്‍മ ശക്തി നഷ്ടപ്പെട്ട ഒരാളെ ആശുപത്രിയില്‍ പ്രവേശിപ്പിച്ചിട്ടു പോലും അധികൃതരില്‍ നിന്നും അദേഹത്തിന് കാര്യമായ പരിഗണന കിട്ടിയിരുന്നില്ലെന്ന വിമര്‍ശനങ്ങള്‍ ഉയര്‍ന്നിരുന്നു.
ഒക്ടോബര്‍ പത്തിനാണ് കളമശ്ശേരി ആശുപത്രിക്ക് അടുത്തുള്ള സിസിടിവിയില്‍ നിന്ന് ലാമയുടെ ദൃശ്യങ്ങള്‍ കിട്ടുന്നത്. പിന്നീട് ലാമയുടെ കുടുംബം ഇവിടെയെത്തി അന്വേഷണം നടത്തുകയും നെടുമ്പാശേരി പൊലീസില്‍ പരാതി നല്‍കുകയും ചെയ്തു.
എന്നാല്‍ നല്‍കിയ പരാതിയില്‍ അന്വേഷണമൊന്നും നടക്കാതെ വന്നപ്പോള്‍ ലാമയുടെ മകന്‍ സാന്റന്‍ ലാമ ഹൈക്കോടതിയില്‍ ഹേബിയസ് കോര്‍പ്പസ് ഹര്‍ജി സമര്‍പ്പിച്ചു. വിഷയത്തെ വളരെ ഗൗരവമായി തന്നെ ഹൈക്കോടതി പരിഗണിക്കുകയും സംസ്ഥാന സാമൂഹ്യനീതി വകുപ്പിനെ കക്ഷി ചേര്‍ത്ത് പ്രത്യേക അന്വേഷണ സംഘത്തെ രൂപം നല്‍കണമെന്ന് നിര്‍ദേശിക്കുകയും ചെയ്തു.
ഹൈക്കോടതി നിര്‍ദേശ പ്രകാരം ആലുവ എഎസ്പിയുടെ നേതൃത്വത്തില്‍ അന്വേഷണം നടത്തുന്നതിനിടയിലാണ് ഇന്ന് രാവിലെ കളമശേരി എച്ച്എംടി കമ്പനിക്ക് സമീപത്തുള്ള ആളൊഴിഞ്ഞ ഭാഗത്ത് കാട്ടിനുള്ളില്‍ ലാമയുടേതെന്ന് സംശയിക്കുന്ന മൃതദേഹം കണ്ടെത്തിയത്.
പ്രത്യേക അന്വഷണ സംഘത്തിന്റെ ഭാഗമായി അഗ്‌നിരക്ഷാ സേനാംഗങ്ങളെയും നിയോഗിച്ചിരുന്നു. മൃതദേഹം അഴുകിയ നിലയിലായതിനാല്‍ ശാസ്ത്രീയ പരിശോധനകള്‍ക്ക് ശേഷം മാത്രമേ മൃതദേഹം ലാമയുടേതാണോയെന്ന് ഉറപ്പിക്കാന്‍ കഴിയുകയുള്ളൂ.
ഓഗസ്റ്റ് ആദ്യം കുവൈറ്റിലുണ്ടായ മദ്യദുരന്തത്തില്‍ ഇന്ത്യക്കാര്‍ ഉള്‍പ്പെടെ 23 പേര്‍ മരിച്ചിരുന്നു. കുവൈറ്റില്‍ ഹോട്ടല്‍ ബിസിനസ് നടത്തിയിരുന്ന സൂരജ് ലാമയും മദ്യ ദുരന്തത്തില്‍ അകപ്പെട്ട് ആശുപത്രിയിലായവരിലൊരാളാണ്. ഒക്ടോബര്‍ നാലിന് ബന്ധുക്കളെ പോലും അറിയിക്കാതെ പരിചയക്കാര്‍ പോലുമില്ലാത്ത കൊച്ചിയിലേക്ക് സൂരജ് ലാമയെ കയറ്റി വിടുകയായിരുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.