പമ്പാതീരത്ത് ആവേശത്തുഴയെറിഞ്ഞ് ‘മുത്തശ്ശി’; അവധിവിവാദങ്ങളെ കാറ്റിൽപ്പറത്തി കുട്ടനാട് മൂലം വള്ളംകളിയിലേക്ക്‌

തെക്കേക്കര: വള്ളംകളിയിലെ മുത്തശ്ശിയായ ചമ്പക്കുളം മൂലം വള്ളംകളിക്ക് ഇന്ന് പമ്പാനദിയിൽ ആവേശകരമായ തുടക്കം. വള്ളംകളി ദിനത്തിലെ പ്രാദേശിക അവധിയെച്ചൊല്ലിയുള്ള വിവാദങ്ങളോ പ്രതിസന്ധികളോ ഒന്നും കുട്ടനാട്ടുകാരുടെ നെഞ്ചിലെ തുടിപ്പിനെ ഒട്ടും ബാധിക്കാറില്ലെന്ന് തെളിയിക്കുന്നതാണ് പമ്പാതീരത്തെ ഇന്നത്തെ കാഴ്ചകൾ. നാടിന്റെ ഈ ജലമാമാങ്കത്തിൽ പങ്കുചേരാനും ആവേശത്തുഴയെറിയാനും ലോകത്തിന്റെ വിവിധ ഭാഗങ്ങളിൽ നിന്നുള്ള ജനസാഗരമാണ് ഇന്ന് കുട്ടനാട്ടിലേക്ക് ഒഴുകിയെത്തുന്നത്.

അമ്പലപ്പുഴ ക്ഷേത്ര ഐതിഹ്യവും ചമ്പക്കുളം വലിയ പള്ളിയുടെ ചരിത്രവും മാപ്പിളശ്ശേരി തറവാടിന്റെ മതസൗഹാർദ്ദവും ഒന്നാകുന്ന പമ്പയുടെ ഓളങ്ങളിൽ ഇനി ആവേശപ്പോരാട്ടത്തിന്റെ നിമിഷങ്ങൾ.

ഏകദേശം 400 വർഷത്തിലേറെ പഴക്കമുള്ള പരമ്പരാഗത ജലമേളയായ ചമ്പക്കുളം മൂലം വള്ളംകളിക്ക് പിന്നിൽ മനോഹരമായ ഒരു ചരിത്രമുണ്ട്. എ.ഡി 1599-ൽ (കൊല്ലവർഷം 774) അമ്പലപ്പുഴ ക്ഷേത്രത്തിൽ പ്രതിഷ്ഠിക്കാനുള്ള ശ്രീകൃഷ്ണ വിഗ്രഹം കുറിച്ചി കടുവാക്കുളത്തുനിന്നും വള്ളത്തിൽ കൊണ്ടുവരുന്നതിനിടയിലാണ് ചരിത്രപ്രസിദ്ധമായ ആ സംഭവം നടക്കുന്നത്.

യാത്രയ്ക്കിടയിൽ രാത്രിയായതിനെ തുടർന്ന് ചെമ്പകശ്ശേരി രാജാവിനും സംഘത്തിനും യാത്ര തുടരാനായില്ല. അന്ന് ചമ്പക്കുളത്തെ പ്രശസ്തമായ ക്രൈസ്തവ കുടുംബമായ മാപ്പിളശ്ശേരി തറവാട്ടിലാണ് വിഗ്രഹത്തിന് കാവലൊരുക്കി രാജാവും സംഘവും രാത്രി വിശ്രമിച്ചത്. മാപ്പിളശ്ശേരിയിലെ കാരണവർ ഇട്ടി തൊമ്മൻ വിഗ്രഹത്തിന് മുന്നിൽ ഭദ്രദീപം തെളിയിച്ച്, രാജാവിനും സംഘത്തിനും വിഭവസമൃദ്ധമായ സൽക്കാരവും ഒരുക്കി ആദരിച്ചു.

പിറ്റേന്ന് രാവിലെ വിഗ്രഹം അമ്പലപ്പുഴയിലേക്ക് കൊണ്ടുപോകാൻ നേരം, മാപ്പിളശ്ശേരിയിലെ കാരണവരും ചരിത്രപ്രസിദ്ധമായ ചമ്പക്കുളം കല്ലൂർക്കാട് സെന്റ് മേരീസ് ബസിലിക്ക പള്ളിയിലെ പുരോഹിതരും നാട്ടുകാരും ചേർന്ന് തങ്ങളുടെ വള്ളങ്ങളുമായി അകമ്പടി സേവിക്കുകയായിരുന്നു. ചമയങ്ങളോടെയും വഞ്ചിപ്പാട്ടിന്റെ ഈണങ്ങളോടെയും പമ്പാനദിയിലൂടെ രാജാവിനെയും വിഗ്രഹത്തെയും ആനയിച്ച ഈ യാത്രയുടെ ഓർമ്മ പുതുക്കലാണ് ഇന്നത്തെ ചമ്പക്കുളം മൂലം വള്ളംകളി.ഈ ചരിത്രപരമായ കൂട്ടായ്മയുടെ ഓർമ്മയ്ക്കായി രാജാവ് നൽകിയ തിരുവത്താഴത്തിന്റെ പങ്ക് ഇന്നും പള്ളിയിലെ പെരുന്നാളിനും മാപ്പിളശ്ശേരി തറവാട്ടിലും എത്താറുണ്ട്.

> നൂറ്റാണ്ടുകൾ കഴിഞ്ഞിട്ടും ഈ ബന്ധത്തിന്റെ കണ്ണികൾ അറ്റുപോയിട്ടില്ല. മൂലം വള്ളംകളിക്ക് മുന്നോടിയായി ഇന്നും അമ്പലപ്പുഴ ക്ഷേത്രത്തിൽ നിന്നുള്ള ഭാരവാഹികൾ മാപ്പിളശ്ശേരി തറവാട്ടിൽ എത്തി ആചാരപരമായ സ്വീകരണം ഏറ്റുവാങ്ങുന്നു. തറവാട്ടിലെ നിലവിലെ കാരണവർ ഇവർക്കായി പ്രത്യേക വിരുന്ന് ഒരുക്കുകയും ചെയ്യുന്നു. അതിനുശേഷമാണ് വള്ളംകളിയുടെ ഔദ്യോഗിക ചടങ്ങുകൾക്ക് തുടക്കമാകുന്നത്.

ഓളപ്പരപ്പിലെ ആവേശം

കേരളത്തിലെ വള്ളംകളി സീസണിന് ഔദ്യോഗികമായി തുടക്കം കുറിക്കുന്ന മേളയാണിത്. പമ്പാനദിയിലെ ഓളങ്ങളെ കീറിമുറിച്ച് ചുണ്ടൻവള്ളങ്ങൾ കുതിച്ചുപായുമ്പോൾ, അത് കേവലമൊരു കായിക മാമാങ്കം മാത്രമല്ലായി മാറുന്നു. ഒരു മുസ്ലിം വഞ്ചിപ്പാട്ടുകാരൻ പാടുന്ന വരികൾക്ക്, ക്രിസ്ത്യൻ തുഴച്ചിൽക്കാരൻ താളംപിടിച്ച്, ഹിന്ദു ദൈവത്തിന്റെ ഐതിഹ്യത്തെ നെഞ്ചിലേറ്റുന്ന കേരളീയ മതസൗഹാർദ്ദത്തിന്റെ ഏറ്റവും ഉദാത്തമായ നേർച്ചിത്രമാണ് ചമ്പക്കുളം കാട്ടിത്തരുന്നത്.

പള്ളിയും അമ്പലവും തറവാടും ചേർന്നൊരുക്കുന്ന ഈ കൂട്ടായ്മ കാലമെത്ര കഴിഞ്ഞാലും തകരാത്ത കേരളത്തിന്റെ മതേതര പാരമ്പര്യത്തിന്റെ വിളംബരം കൂടിയാണ്. ഇനി പമ്പയുടെ മാറിലെ ആവേശത്തുഴച്ചിലിലേക്ക് കണ്ണുനട്ട് ലോകം.