മാർപാപ്പയുടെ സാന്നിധ്യത്തിൽ കത്തോലിക്കാ കോൺഗ്രസ് ഗ്ലോബൽ മീറ്റ്; ലോകത്തിന്റെ വഴികൾ റോമിലേക്ക്

ലോകത്തിന്റെ വിവിധ കോണുകളിൽ കഴിയുന്ന സീറോ മലബാർ വിശ്വാസികളുടെ ശ്രദ്ധ ഈ ഒക്ടോബറിൽ റോമിലേക്കാണ്. സീറോ മലബാർ സഭയുടെ ഔദ്യോഗിക അല്മായ സംഘടനയായ കത്തോലിക്കാ കോൺഗ്രസിന്റെ ഗ്ലോബൽ മീറ്റ് ഒക്ടോബർ 19 മുതൽ 23 വരെ റോമിൽ നടക്കും. ലോകത്തിന്റെ വിവിധ ഭൂഖണ്ഡങ്ങളിലായി 40 രാജ്യങ്ങളിൽനിന്നുള്ള പ്രതിനിധികൾ സംഗമത്തിൽ പങ്കെടുക്കും. യൂറോപ്പ്, ആഫ്രിക്ക, ഏഷ്യ, അമേരിക്കകൾ, ഓസ്ട്രേലിയ–ഓഷ്യാനിയ എന്നിവിടങ്ങളിൽനിന്നുള്ള പ്രതിനിധികൾ സംഗമത്തിനെത്തും.

ഇത്തവണത്തെ ഗ്ലോബൽ മീറ്റിന്റെ പ്രധാന സവിശേഷത ലിയോ പതിനാലാമൻ മാർപാപ്പയുടെ സാന്നിധ്യമാണ്. വിവിധ രാജ്യങ്ങളിൽനിന്നെത്തുന്ന പ്രതിനിധികൾക്ക് മാർപാപ്പയെ കാണാനും അദ്ദേഹത്തിന്റെ സന്ദേശവും ആശീർവാദവും സ്വീകരിക്കാനുമുള്ള അവസരമുണ്ടാകും. ലോകമെങ്ങും വ്യാപിച്ച സീറോ മലബാർ അല്മായ സമൂഹം കത്തോലിക്കാ സഭയുടെ ഹൃദയഭൂമിയായ റോമിൽ ഒത്തുചേരുമ്പോൾ മാർപാപ്പയുടെ സാന്നിധ്യം സംഗമത്തിന് പ്രത്യേക പ്രാധാന്യം നൽകുന്നു.

സീറോ മലബാർ സഭയുടെ മേജർ ആർച്ച് ബിഷപ് മാർ റാഫേൽ തട്ടിലിന്റെയും കത്തോലിക്ക കോൺഗ്രസ് ബിഷപ് ലെഗേറ്റ് മാർ റെമീജിയൂസ് ഇഞ്ചനാനിയിലിന്റെയും മാർഗനിർദേശത്തിലും ഗ്ലോബൽ പ്രസിഡന്റ് പ്രൊഫ . രാജീവ് കൊച്ചുപറമ്പിൽ, ഗ്ലോബൽ ഡയറക്ടർ റവ. ഫാ. ഡോ. ഫിലിപ്പ് കവിയിൽ,ജനറൽ സെക്രട്ടറി ഡോ. ജോസുകുട്ടി ജെ. ഒഴുകയിൽ, ജനറൽ കൺവീനർ ബെന്നി പുളിക്കക്കര എന്നിവരുടെ നേതൃത്വത്തിൽ വിവിധ ഭൂഖണ്ഡങ്ങളിലെയും രാജ്യങ്ങളിലെയും ഭാരവാഹികളും പ്രവർത്തകരും ഉൾപ്പെടുന്ന വലിയൊരു സംഘമാണ് ഒരുക്കങ്ങൾക്ക് ചുക്കാൻ പിടിക്കുന്നത്.

റോമിലെ സംഗമത്തിന്റെ വിജയത്തിനായി മാസങ്ങളായി വിവിധ തലങ്ങളിൽ ഒരുക്കങ്ങൾ പുരോഗമിക്കുകയാണ്.
വിവിധ രാജ്യങ്ങളിൽനിന്നുള്ള ബിഷപ്പുമാരും വൈദികരും അല്മായ നേതാക്കളും സംഗമത്തിൽ പങ്കെടുക്കും. ഇവർക്കൊപ്പം രാഷ്ട്രീയ, സാമൂഹിക, സാംസ്കാരിക മേഖലകളിലെ പ്രമുഖർ, ജനപ്രതിനിധികൾ, പ്രഫഷനലുകൾ, സംരംഭകർ, ബിസിനസ് രംഗത്തെ പ്രതിനിധികൾ എന്നിവരും റോമിലെത്തും.

കേരളത്തിൽ നിന്ന് ലോകത്തിലേക്ക്

കേരളത്തിന്റെ സാമൂഹിക-സഭാ ജീവിതത്തോട് എന്നും ചേർന്നുനിൽക്കുന്ന കത്തോലിക്കാ കോൺഗ്രസ്, സീറോ മലബാർ വിശ്വാസികളുടെ ആഗോള കുടിയേറ്റത്തിനൊപ്പം ഇന്ന് വിവിധ ഭൂഖണ്ഡങ്ങളിലേക്കും പ്രവർത്തനം വ്യാപിപ്പിച്ചിരിക്കുകയാണ്. ലോകത്തിന്റെ വിവിധ രാജ്യങ്ങളിൽ രൂപപ്പെട്ട സീറോ മലബാർ സമൂഹങ്ങൾക്കൊപ്പം കത്തോലിക്കാ കോൺഗ്രസിന്റെ പ്രവർത്തനങ്ങളും പുതിയ മേഖലകളിലേക്ക് വളർന്നു.

ഈ ആഗോള വളർച്ചയുടെ ശ്രദ്ധേയമായ മുഖങ്ങളിലൊന്നാണ് യൂറോപ്പ്. കഴിഞ്ഞ വർഷങ്ങളിൽ യൂറോപ്പിലെ വിവിധ രാജ്യങ്ങളിൽ സീറോ മലബാർ വിശ്വാസികളുടെ സാന്നിധ്യം ഗണ്യമായി വർധിച്ചതിനൊപ്പം കത്തോലിക്കാ കോൺഗ്രസിന്റെ പ്രവർത്തനങ്ങളും കൂടുതൽ സജീവമായി. കുടുംബങ്ങളും യുവജനങ്ങളും വിവിധ മേഖലകളിൽ പ്രവർത്തിക്കുന്ന പ്രഫഷനലുകളും ഉൾപ്പെടുന്ന പ്രവാസിസമൂഹത്തെ പരസ്പരം ബന്ധിപ്പിക്കുന്നതിനും സഭാ സാമൂഹിക പ്രവർത്തനങ്ങളിൽ പങ്കാളികളാക്കുന്നതിനും സംഘടന ശ്രമിച്ചുവരുന്നു.

ഈ പശ്ചാത്തലത്തിലാണ് യൂറോപ്പിന്റെ വിവിധ ഭാഗങ്ങളിൽ നിന്നുള്ള പ്രതിനിധികളും പ്രവർത്തകരും റോമിലെ ഗ്ലോബൽ മീറ്റിൽ പങ്കുചേരുന്നത്. ആഫ്രിക്കയിലും സീറോ മലബാർ സാന്നിധ്യം വളരുകയാണ്. വിവിധ ആഫ്രിക്കൻ രാജ്യങ്ങളിൽ സേവനമനുഷ്ഠിക്കുന്ന കുടുംബങ്ങളും പ്രഫഷനലുകളും മിഷനറി സമൂഹങ്ങളും സഭയുടെ ആഗോള സാന്നിധ്യത്തിന്റെ ഭാഗമാണ്. ആഫ്രിക്കയ്ക്കൊപ്പം ഏഷ്യ, അമേരിക്ക, ഓസ്ട്രേലിയ–ഓഷ്യാനിയ എന്നിവിടങ്ങളിൽനിന്നുള്ള പ്രതിനിധികളും റോമിലെത്തുന്നതോടെ വിവിധ ദേശങ്ങളിലെ അനുഭവങ്ങളും കാഴ്ചപ്പാടുകളും പങ്കുവയ്ക്കുന്ന ആഗോള വേദിയായി സംഗമം മാറും.

108 വർഷത്തെ യാത്ര

ഇന്നത്തെ ആഗോള സാന്നിധ്യത്തിനു പിന്നിൽ ഒരു നൂറ്റാണ്ടിലേറെ നീളുന്ന ചരിത്രമുണ്ട്. 1918ൽ കേരള കത്തോലിക്കാ മഹാജനസഭയായി ആരംഭിച്ച പ്രസ്ഥാനമാണ് പിന്നീട് അഖില കേരള കത്തോലിക്കാ കോൺഗ്രസായും ഇന്ന് ആഗോളതലത്തിൽ പ്രവർത്തിക്കുന്ന കത്തോലിക്കാ കോൺഗ്രസായും വളർന്നത്.

108 വർഷത്തിനിടെ കാലവും സമൂഹവും മാറിയെങ്കിലും അല്മായരെ ഒരുമിപ്പിക്കുകയും സഭയുടെയും സമൂഹത്തിന്റെയും പൊതുവിഷയങ്ങളിൽ അവരുടെ പങ്കാളിത്തം ശക്തിപ്പെടുത്തുകയും ചെയ്യുക എന്ന അടിസ്ഥാനലക്ഷ്യം തുടർന്നു. വിദ്യാഭ്യാസം, സാമൂഹിക മുന്നേറ്റം, കർഷകപ്രശ്നങ്ങൾ, തൊഴിൽ, കുടുംബം, യുവജനങ്ങൾ തുടങ്ങിയ മേഖലകളിലേക്കും സംഘടനയുടെ പ്രവർത്തനം വ്യാപിച്ചു.

ഈ സംഘടനാ ചരിത്രത്തിനു പിന്നിൽ അതിനേക്കാൾ പുരാതനമായ മാർത്തോമാ ക്രൈസ്തവ പൈതൃകവുമുണ്ട്. വിശുദ്ധ തോമാശ്ലീഹായിലേക്ക് വേരുകൾ നീളുന്ന ഈ പാരമ്പര്യം കേരളത്തിൽ തലമുറകളിലൂടെ കൈമാറപ്പെട്ട് ഇന്ന് കുടിയേറ്റത്തിനൊപ്പം ലോകത്തിന്റെ വിവിധ ഭൂഖണ്ഡങ്ങളിലെത്തിയിരിക്കുന്നു.

പതാകയ്ക്കൊപ്പം സഞ്ചരിക്കുന്ന സന്ദേശം

ഗ്ലോബൽ മീറ്റിന്റെ മുന്നോടിയായി കത്തോലിക്കാ കോൺഗ്രസ് പതാക വിവിധ രാജ്യങ്ങളിലൂടെ സഞ്ചരിക്കുകയാണ്. വിവിധ കേന്ദ്രങ്ങളിൽ പ്രവർത്തകർ പതാക ഏറ്റുവാങ്ങി റോമിലെ സംഗമത്തിന്റെ സന്ദേശം കൈമാറുന്നു.
യൂറോപ്പിലെ വിവിധ രാജ്യങ്ങളിലും പതാകയ്ക്ക് സ്വീകരണം ലഭിച്ചു. രാജ്യാതിർത്തികളും ഭാഷകളും കടന്നുള്ള ഈ യാത്ര വിവിധ ഭാഗങ്ങളിലുള്ള പ്രവർത്തകരെ ഗ്ലോബൽ മീറ്റുമായി ബന്ധിപ്പിക്കുന്ന പ്രതീകമായി മാറിയിട്ടുണ്ട്. ഒടുവിൽ പതാക റോമിലെത്തുന്നതോടെ യാത്രയുടെ പ്രധാന ഘട്ടം പൂർത്തിയാകും.

പുതിയ കാലത്തിന് പുതിയ വഴികൾ

108 വർഷത്തെ ചരിത്രത്തെ ഓർക്കുന്നതിനൊപ്പം പുതിയ കാലത്തിന്റെ ആവശ്യങ്ങളിലേക്കും കത്തോലിക്കാ കോൺഗ്രസ് പ്രവർത്തനം വ്യാപിപ്പിക്കുന്നുണ്ട്. വിദ്യാഭ്യാസം, തൊഴിൽ, സംരംഭങ്ങൾ, പ്രഫഷനൽ സഹകരണം തുടങ്ങിയ മേഖലകളിൽ ലോകത്തിന്റെ വിവിധ ഭാഗങ്ങളിലുള്ള അംഗങ്ങളെ ബന്ധിപ്പിക്കാനുള്ള ശ്രമങ്ങളും ഇതിന്റെ ഭാഗമാണ്.
Catholic Congress Global Business Network ഇതിനൊരു മികച്ച ഉദാഹരണമാണ്.

ലോകത്തിന്റെ വിവിധ കോണുകളിലുള്ള സംരംഭകരെയും പ്രഫഷനലുകളെയും ഒരു കുടക്കീഴിൽ അണിനിരത്താനും, അവർക്കിടയിൽ പുതിയ അവസരങ്ങളും ബിസിനസ് ആശയങ്ങളും പങ്കുവയ്ക്കാനും ഇതിലൂടെ വഴിയൊരുങ്ങുന്നു. അംഗങ്ങൾ തമ്മിലുള്ള പരസ്പര സഹകരണവും ആശയവിനിമയവും ശക്തമാക്കുന്നതിനൊപ്പം ആഗോളതലത്തിൽ പുതിയ പ്രഫഷനൽ ശൃംഖല കെട്ടിപ്പടുക്കാനും ഈ പ്ലാറ്റ്‌ഫോം സഹായിക്കും.

റോമിലെ ഗ്ലോബൽ മീറ്റിൽ ബിസിനസ് നെറ്റ്‌വർക്കിങ്ങിനൊപ്പം സാമൂഹിക, സാംസ്കാരിക, പൊതുജീവിത വിഷയങ്ങളും തുല്യ പ്രാധാന്യത്തോടെ ചർച്ച ചെയ്യപ്പെടും. വിഷയവിദഗ്ധർ നയിക്കുന്ന പഠന ക്ലാസുകളും സംവാദങ്ങളും സമ്മേളനത്തിന്റെ പ്രധാന ആകർഷണമായിരിക്കും. വിവിധ രാജ്യങ്ങളിൽനിന്നുള്ള രാഷ്ട്രീയ-സാമൂഹിക-സാംസ്കാരിക രംഗങ്ങളിലെ പ്രമുഖരുടെയും ജനപ്രതിനിധികളുടെയും സാന്നിധ്യം ഈ ചർച്ചകൾക്ക് കൂടുതൽ വിശാലമായ പശ്ചാത്തലം ഒരുക്കും.

ചരിത്രവും പുതിയ തലമുറയും റോമിൽ

കത്തോലിക്കാ കോൺഗ്രസിന്റെ മുൻ ഗ്ലോബൽ മീറ്റുകൾ ലോകത്തിന്റെ മറ്റു ഭാഗങ്ങളിൽ നടന്നിട്ടുണ്ടെങ്കിലും ഇത്തവണ വേദി റോമാണ്. കത്തോലിക്കാ സഭയുടെ കേന്ദ്രത്തിൽ, മാർപാപ്പയുടെ സാന്നിധ്യത്തിൽ, ലോകത്തിന്റെ വിവിധ ഭാഗങ്ങളിൽനിന്നുള്ള സീറോ മലബാർ സഭാനേതാക്കളും അല്മായ പ്രതിനിധികളും ഒരുമിക്കുന്നുവെന്നതാണ് ഇത്തവണത്തെ പ്രത്യേകത.

ഒരു വശത്ത് 108 വർഷത്തെ കത്തോലിക്കാ കോൺഗ്രസ് ചരിത്രം; അതിനു പിന്നിൽ രണ്ടായിരത്തോളം വർഷം നീളുന്ന മാർത്തോമാ ക്രൈസ്തവ പാരമ്പര്യം. മറുവശത്ത് യൂറോപ്പും ആഫ്രിക്കയും ഉൾപ്പെടെ വിവിധ ഭൂഖണ്ഡങ്ങളിൽ വളർന്നുവരുന്ന പുതിയ തലമുറ.

ഒക്ടോബർ 19 മുതൽ 23 വരെ റോമിൽ ഇവയുടെ സംഗമത്തിനാണ് വേദിയൊരുങ്ങുന്നത്. ലിയോ പതിനാലാമൻ മാർപാപ്പയുടെ സാന്നിധ്യവും മാർ റാഫേൽ തട്ടിലിന്റെ നേതൃത്വവും ലോകത്തിന്റെ വിവിധ ഭാഗങ്ങളിൽനിന്നെത്തുന്ന പ്രതിനിധികളുടെ പങ്കാളിത്തവും ചേർന്ന് ഗ്ലോബൽ മീറ്റിനെ കത്തോലിക്കാ കോൺഗ്രസിന്റെ ആഗോള യാത്രയിലെ ശ്രദ്ധേയമായൊരു അധ്യായമാക്കും.

കേരളത്തിൽ 108 വർഷം മുൻപ് ആരംഭിച്ച അല്മായ മുന്നേറ്റത്തിന്റെ പതാക ഇന്ന് ഭൂഖണ്ഡങ്ങൾ കടന്ന് റോമിലെത്തുമ്പോൾ, അതിനൊപ്പം എത്തുന്നത് ഒരു സംഘടനയുടെ ചരിത്രം മാത്രമല്ല; തലമുറകൾ കൈമാറിയ വിശ്വാസപൈതൃകവും മാറുന്ന പ്രവാസലോകത്തിന്റെ അനുഭവങ്ങളും പുതിയ തലമുറയുടെ പ്രതീക്ഷകളും കൂടിയാണ്.

ജോമേഷ് കൈതമന
ഗ്ലോബൽ സെക്രട്ടറി, കത്തോലിക്ക കോൺഗ്രസ്‌