കർദിനാൾ ലൂയിസ് അന്റോണിയോ ടാഗ്ലെ കർദിനാൾ സംഘത്തിന്റെ പുതിയ ഡീൻ

വത്തിക്കാൻ സിറ്റി: കത്തോലിക്കാ സഭയിലെ കർദിനാൾ സംഘമായ കോളേജ് ഓഫ് കാർഡിനൽസിന്റെ ഡീനായി ഫിലിപ്പീൻസ് സ്വദേശിയായ കർദിനാൾ ലൂയിസ് അന്റോണിയോ ടാഗ്ലെയെ തിരഞ്ഞെടുത്തു. കർദിനാൾ ബിഷപ്പുമാർ ഒക്ടോബർ എട്ടിന് നടത്തിയ തിരഞ്ഞെടുപ്പിന് ലിയോ പതിനാലാമൻ മാർപാപ്പ അംഗീകാരം നൽകിയതായി വത്തിക്കാൻ ഒക്ടോബർ 9-ന് അറിയിച്ചു.

92 വയസുള്ള ഇറ്റാലിയൻ കർദിനാൾ ജിയോവന്നി ബത്തിസ്റ്റ റേയുടെ പിൻഗാമിയായാണ് 69 വയസുള്ള ടാഗ്ലെ ചുമതലയേൽക്കുന്നത്. ഈ പദവിയിലെത്തുന്ന ആദ്യ ഏഷ്യക്കാരനാണ് അദ്ദേഹം.

1957 ജൂൺ 21-ന് മനിലയിൽ ജനിച്ച ലൂയിസ് അന്റോണിയോ ഗോക്കിം ടാഗ്ലെ 1982 ഫെബ്രുവരി 27ന് വൈദികനായി അഭിഷിക്തനായി. അമേരിക്കയിലെ കാത്തലിക് യൂണിവേഴ്സിറ്റി ഓഫ് അമേരിക്കയിൽ നിന്ന് ദൈവശാസ്ത്രത്തിൽ ഉപരിപഠനം നടത്തിയ അദേഹം 1991-ൽ ഡോക്ടറേറ്റ് നേടി.

2001-ൽ ഇമുസ് രൂപതയുടെ മെത്രാനായി നിയമിതനായ ടാഗ്ലെ 2011-ൽ മനില ആർച്ച് ബിഷപ്പായി. ബെനഡിക്ട് പതിനാറാമൻ മാർപാപ്പ 2012-ൽ അദേഹത്തെ കർദിനാളായി ഉയർത്തി. പിന്നീട് ഫ്രാൻസിസ് മാർപാപ്പയുടെ കാലത്ത് വത്തിക്കാനിലെ സുവിശേഷവത്കരണ വിഭാഗത്തിന്റെ നേതൃത്വത്തിലും അദേഹം പ്രവർത്തിച്ചു.

കർദിനാൾ സംഘത്തിന്റെ പ്രവർത്തനങ്ങൾ ഏകോപിപ്പിക്കുകയാണ് ഡീനിന്റെ പ്രധാന ചുമതല. മാർപാപ്പയുടെ മരണമോ രാജിയോ മൂലം പദവി ഒഴിയുന്ന സാഹചര്യത്തിൽ പുതിയ മാർപാപ്പയെ തിരഞ്ഞെടുക്കുന്നതിനുള്ള കോൺക്ലേവുമായി ബന്ധപ്പെട്ട നടപടികളിലും ഡീൻ പങ്കുവഹിക്കും.

ഡീൻ പദവി മറ്റ് കർദിനാൾമാരുടെ മേൽ ഭരണാധികാരം നൽകുന്നതല്ല. കർദിനാൾ സംഘത്തിലെ ഏകോപനപരമായ നേതൃത്വമാണ് ഈ സ്ഥാനത്തിന്റെ സ്വഭാവം. 80 വയസിന് താഴെയുള്ളതിനാൽ കോൺക്ലേവിൽ പങ്കെടുക്കാനുള്ള യോഗ്യത ടാഗ്ലെയ്ക്കുണ്ട്.

കർദിനാൾ സംഘത്തിന്റെ ഡീനായി ടാഗ്ലെ തിരഞ്ഞെടുക്കപ്പെട്ടത് ആഗോള കത്തോലിക്കാ സഭയിലെ ഏഷ്യൻ പ്രതിനിധാനത്തെ കൂടുതൽ ശ്രദ്ധേയമാക്കുന്നതാണ്. ഏഷ്യയിലെ സഭകളുടെ വളർച്ചയും സഭയുടെ നേതൃത്വത്തിലെ ഭൂമിശാസ്ത്രപരമായ വൈവിധ്യവും ഈ നിയമനത്തിലൂടെ പ്രതിഫലിക്കുന്നതായി വിലയിരുത്തപ്പെടുന്നു.