ന്യൂഡല്‍ഹി: ആധുനിക യുദ്ധമുഖത്ത് വര്‍ധിച്ച് വരുന്ന ഡ്രോണുകളുടെയും ആളില്ലാ വിമാനങ്ങളുടെയും ഭീഷണി ഫലപ്രദമായി നേരിടാന്‍ ലക്ഷ്യമിട്ട് ഇന്ത്യ പുതിയൊരു വ്യോമ ലേസര്‍ പ്രതിരോധ സംവിധാനം വികസിപ്പിക്കുന്നു. രാജ്യത്തിന്റെ പ്രതിരോധ ഗവേഷണ വികസന സ്ഥാപനമായ ഡി.ആര്‍.ഡി.ഒയാണ് ഹെലികോപ്റ്ററുകളില്‍ ഘടിപ്പിക്കാന്‍ പാകത്തിലുള്ള ഈ അത്യാധുനിക ഡയറക്റ്റഡ് എനര്‍ജി വെപ്പണ്‍ സിസ്റ്റം യാഥാര്‍ത്ഥ്യമാക്കുന്നത്.
അടുത്ത മൂന്ന് വര്‍ഷത്തിനുള്ളില്‍ ഈ തദ്ദേശീയ സംവിധാനം പൂര്‍ണമായി സജ്ജമാകുമെന്നാണ് പ്രതിരോധ വൃത്തങ്ങള്‍ നല്‍കുന്ന വിവരം. ഹിന്ദുസ്ഥാന്‍ എയറോനോട്ടിക്‌സ് ലിമിറ്റഡ് (എച്ച്.എ.എല്‍) നിര്‍മിച്ച ധ്രുവ്, രുദ്ര തുടങ്ങിയ ലഘു യുദ്ധ ഹെലികോപ്റ്ററുകളിലായിരിക്കും ഈ ലേസര്‍ ആയുധങ്ങള്‍ പ്രാഥമികമായി സജ്ജീകരിക്കുക. ഡി.ആര്‍.ഡി.ഒ ഇതിനകം വിജയകരമായി പരീക്ഷിച്ച 30 കിലോവാട്ട് ശേഷിയുള്ള ലേസര്‍ സാങ്കേതിക വിദ്യയാണ് ഇതിനായി ഉപയോഗിക്കുന്നത്. അഞ്ച് കിലോമീറ്റര്‍ പരിധിക്കുള്ളില്‍ എത്തുന്ന ശത്രു ഡ്രോണുകളെ ലക്ഷ്യമാക്കി അതിതീവ്ര ലേസര്‍ രശ്മികള്‍ കേന്ദ്രീകരിക്കാനും, മിനിറ്റുകള്‍ക്കുള്ളില്‍ അവയെ ഘടനപരമായ തകര്‍ച്ചയിലേക്ക് നയിക്കാനും ഈ സംവിധാനത്തിന് സാധിക്കും.
ഹൈദരാബാദിലെ ഹൈ എനര്‍ജി സിസ്റ്റംസ് ആന്‍ഡ് സയന്‍സസ് സെന്ററും ദെഹ്റാദൂണിലെ ഇന്‍സ്ട്രുമെന്റ്സ് റിസര്‍ച്ച് ആന്‍ഡ് ഡിവലപ്മെന്റ് എസ്റ്റാബ്ലിഷ്മെന്റും സംയുക്തമായാണ് ഈ പ്രതിരോധ സംവിധാനത്തിന്റെ രൂപകല്‍പനയും നിര്‍മാണവും നിര്‍വഹിക്കുന്നത്. ഹെലികോപ്റ്ററിന് അടിയില്‍ ഘടിപ്പിക്കാന്‍ കഴിയുന്ന വിധത്തില്‍ 180 കിലോഗ്രാം ഭാരമുള്ള പ്രത്യേക പോഡിനുള്ളിലാണ് ലേസര്‍ ആയുധങ്ങളും അനുബന്ധ സെന്‍സറുകളും ക്രമീകരിക്കുന്നത്. വരും വര്‍ഷങ്ങളില്‍ ഇതിന്റെ ആദ്യ മാതൃക പൂര്‍ത്തിയാക്കി ആവശ്യമായ യോഗ്യതാ സര്‍ട്ടിഫിക്കറ്റുകള്‍ നേടാനാണ് ലക്ഷ്യമിടുന്നത്.
പരമ്പരാഗത മിസൈലുകളെ അപേക്ഷിച്ച് ലേസര്‍ ആയുധങ്ങളുടെ പ്രവര്‍ത്തനച്ചെലവ് വളരെ കുറവാണ് എന്നതും വലിയൊരു നേട്ടമാണ്. പകലെന്നോ രാവെന്നോ വ്യത്യാസമില്ലാതെ പ്രവര്‍ത്തിക്കാനും, ശബ്ദമില്ലാതെ മിന്നല്‍ വേഗത്തില്‍ ആക്രമണം നടത്താനും ഇതിന് സാധിക്കും. മുന്‍കാലങ്ങളിലെ സംഘര്‍ഷങ്ങളില്‍ പാകിസ്ഥാന്‍ ഉള്‍പ്പെടെയുള്ള എതിരാളികള്‍ ഡ്രോണുകള്‍ വ്യാപകമായി ഉപയോഗിച്ച പശ്ചാത്തലത്തിലാണ് ഇന്ത്യ ഇത്തരം പ്രതിരോധ മാര്‍ഗങ്ങളിലേക്ക് അതിവേഗം ചുവടുവെക്കുന്നത്.
അമേരിക്ക, ഇസ്രയേല്‍, ചൈന, റഷ്യ തുടങ്ങിയ പ്രമുഖ രാജ്യങ്ങളുടെ നിരയിലേക്ക് ഈ നിര്‍ണായക സാങ്കേതിക വിദ്യയിലൂടെ ഇന്ത്യയും ഉയര്‍ന്നുകൊണ്ടിരിക്കുകയാണ്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.