താഷ്‌ക്കെന്റ്: ലോക പുരുഷ ബോക്സിങ് ചാമ്പ്യന്‍ഷിപ്പില്‍ ചരിത്രം കുറിച്ച് ഇന്ത്യ. ഇന്ത്യയുടെ മൂന്ന് ബോക്സര്‍മാരായ ദീപക് ഭോരിയ, മുഹമ്മദ് ഹുസാമുദ്ദീന്‍, നിഷാന്ത് ദേവ് എന്നിവര്‍ സെമിയിലെത്തിയതോടെ ഇന്ത്യ മൂന്ന് മെഡലുകള്‍ ഉറപ്പിച്ചു. ലോക പുരുഷ ബോക്സിങ് ചാമ്പ്യന്‍ഷിപ്പിലെ ഇന്ത്യയുടെ ഏറ്റവും മികച്ച പ്രകടനമാണിത്.
ഇതാദ്യമായാണ് ലോക പുരുഷ ബോക്സിങ് ചാമ്പ്യന്‍ഷിപ്പില്‍ ഇന്ത്യ മൂന്ന് മെഡലുകള്‍ നേടുന്നത്. ഇതിന് മുന്‍പ് 2019 ലാണ് ഇന്ത്യ മികച്ച പ്രകടനം പുറത്തെടുത്തത്. അന്ന് അമിത് പംഗല്‍ വെള്ളിയും മനീഷ് കൗശിക് വെങ്കലവും നേടിയിരുന്നു.
51 കിലോ വിഭാഗത്തില്‍ മത്സരിച്ച ദീപക് ക്വാര്‍ട്ടറില്‍ കിര്‍ഗിസ്താന്റെ നര്‍ഷിജിത് ദിയുഷേബവേവിനെ ഏകപക്ഷീയമായി തകര്‍ത്താണ് സെമിയിലെത്തിയത്. അഞ്ച് റൗണ്ടിലും ദീപിക്കിനായിരുന്നു മേല്‍ക്കൈ. സെമിയില്‍ ഫ്രാന്‍സിന്റെ ബെന്നാമയാണ് താരത്തിന്റെ എതിരാളി.
രണ്ട് തവണ കോമണ്‍വെല്‍ത്ത് ഗെയിംസ് മെഡല്‍ നേടിയ ഹുസാമുദ്ദീന്‍ 57 കിലോ വിഭാഗത്തില്‍ ബള്‍ഗേറിയയുടെ ഡയസ് ഇബനെസിനെ കീഴടക്കി. വാശിയേറിയ പോരാട്ടത്തില്‍ 4-3 നാണ് ഇന്ത്യന്‍ താരത്തിന്റെ വിജയം. സെമിയില്‍ ക്യൂബയുടെ സയ്ദെല്‍ ഹോര്‍ട്ടയാണ് എതിരാളി.
22 കാരനായ നിലവിലെ ദേശീയ ചാമ്പ്യന്‍ നിഷാന്ത് 71 കിലോ വിഭാഗത്തില്‍ ക്യൂബയുടെ ഓര്‍ഗെ ക്യൂലറിനെ ഇടിച്ചിട്ടാണ് സെമിയിലെത്തിയത്. കഴിഞ്ഞതവണ നിഷാന്ത് ക്വാര്‍ട്ടില്‍ പുറത്തായിരുന്നു. സെമിയില്‍ ഏഷ്യന്‍ ചാമ്പ്യനായ കസാഖ്സ്താന്റെ അസ്ലാന്‍ബെക്ക് ഷൈംബെര്‍ഗനോവാണ് എതിരാളി.
ലോക പുരുഷ ബോക്സിങ് ചാമ്പ്യന്‍ഷിപ്പില്‍ ഇതുവരെ ഇന്ത്യ ഏഴ് മെഡലുകളാണ് നേടിയിരിക്കുന്നത്. ഇതുവരെ ആര്‍ക്കും സ്വര്‍ണം നേടാനായിട്ടില്ല. അമിത് പംഗല്‍ മാത്രമാണ് വെള്ളി നേടിയിട്ടുള്ളത്. വിജേന്ദര്‍ സിങ് (2009), വികാസ് കൃഷ്ണന്‍ (2011), ശിവ ഥാപ്പ (2015), ഗൗരവ് ബിധൂരി (2017), കൗശിക് (2019), ആകാശ് കുമാര്‍ (2021) എന്നിവര്‍ വെങ്കലം നേടിയിട്ടുണ്ട്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.