അൽഷിമേഴ്സിന്റെ മരുന്നിന് അം​ഗീകാരം; ഓർമകളെ കാർന്നു തിന്നുന്ന രോ​ഗത്തിന് വിലങ്ങിടാൻ 'ലെകെംബി'

വാഷിം​ഗ്ടൺ ഡിസി: അൽഷിമേഴ്സ് തുടക്കത്തിലേ കണ്ടെത്താനായാൽ രോഗം ഭേദപ്പെടുത്താം എന്ന് പഠനത്തിന്റെ ഭാഗമായ വിദഗ്ധർ നേരത്തെ വ്യക്തമാക്കിയിട്ടുണ്ട്. മരുന്നില്ലാത്ത രോഗമാണ് അൽഷിമേഴ്സ് എന്ന ഭയം ആളുകളിൽ പൊതുവെയുണ്ട്. എന്നാലിതാ ആ അവസ്ഥയ്ക്ക് മാറ്റം വരികയാണ്. അൽഷിമേഴ്‌സ് മരുന്നായ ലെകെംബിക്ക് പൂർണ്ണ അംഗീകാരം നൽകി യുഎസ് ഫുഡ് ആൻഡ് ഡ്രഗ് അഡ്മിനിസ്‌ട്രേഷൻ. ഇത് വലിയൊരു പ്രത്യാശയിലേക്കാണ് വഴി തുറന്നിരിക്കുന്നത്. അൽഷിമേഴ്സ് രോഗികളുടെ തലച്ചോറിലുണ്ടാകുന്ന ബിറ്റ അമിലോയ്ഡിനെ പ്രതിരോധിക്കുകയാണ് മരുന്ന് ചെയ്യുന്നത്. ഈ മരുന്ന് പരീക്ഷിച്ചു നോക്കിയ രോഗികളിൽ മാറ്റം കാണുന്നുണ്ടെന്നാണ് റിപ്പോർട്ടുകൾ.

അൽഷിമേഴ്‌സ് രോഗത്തിന്റെ മരുന്നിന് ലഭിച്ച അം​ഗീകാരം ഈ രോ​ഗത്തെയും മരുന്നിന് ജയിക്കാൻ സാധിക്കും എന്നതിനുള്ള ഒരു പ്രതിവിധിയാണെന്ന് എഫ്ഡിഎ സെന്റർ ഫോർ ഡ്രഗ് ഇവാലുവേഷൻ ആൻഡ് റിസർച്ചിലെ ന്യൂറോ സയൻസ് ആക്ടിംഗ് ഡയറക്ടർ തെരേസ ബുറാച്ചിയോ പറഞ്ഞു.

അൽഷിമേഴ്സ് രോഗികൾക്ക് സുരക്ഷിതവും ഫലപ്രദവുമായ ചികിത്സയാണ് ഇതെന്ന് പഠനം സ്ഥിരീകരിച്ചു. അൽഷിമേഴ്‌സ് രോഗവുമായി ബന്ധപ്പെട്ട തലച്ചോറിലെ അമിലോയിഡ് പ്ലാക്ക് അടിഞ്ഞുകൂടുന്നത് ഇല്ലാതാക്കുന്നു എന്നതിന്റെ തെളിവുകളുടെ അടിസ്ഥാനത്തിൽ ഈസായ്, ബയോജെൻ എന്നിവർ ചേർന്ന് നിർമിച്ച ലെകംമ്പിക്ക് ജനുവരിയിൽ അം​ഗീകാരം ലഭിച്ചിരുന്നു.

ഒരു പുതിയ യുഗത്തിന്റെ തുടക്കം

അൽഷിമേഴ്‌സ് രോഗത്തിന്റെ പ്രാരംഭ രൂപങ്ങളുള്ളവർക്കും തലച്ചോറിൽ അമിലോയിഡ് ഫലകങ്ങൾ ഉണ്ടെന്ന് സ്ഥിരീകരിക്കപ്പെട്ട മിതമായ വൈജ്ഞാനിക വൈകല്യമുള്ളവർക്കും ചെറിയ തോതിൽ ഡിമെൻഷ്യ ഉള്ളവർക്കും മാത്രമാണ് മരുന്ന് ഫലം ചെയ്യുക. രോഗത്തിന്റെ കൂടുതൽ വിപുലമായ രൂപങ്ങളുള്ള ആളുകൾക്ക് മരുന്നിൽ നിന്ന് പ്രയോജനം ലഭിക്കില്ല. മാത്രമല്ല കൂടുതൽ സുരക്ഷാ അപകട സാധ്യതകൾ നേരിടേണ്ടിവരുമെന്നും കൊളംബിയ യൂണിവേഴ്സിറ്റി ഇർവിംഗ് മെഡിക്കൽ സെന്ററിലെ ന്യൂറോളജി പ്രൊഫസറായ ഡോ. ലോറൻസ് ഹോണിഗ് പറഞ്ഞു.

അതേ സമയം മരുന്നിൽ നിന്ന് പ്രയോജനം നേടുന്നവർക്ക് പോലും ഇത് ഒരു രോഗശമനമല്ലെന്ന് ഹോണിഗ് അഭിപ്രായപ്പെട്ടു. ഇപ്പോൾ ഉള്ള ചികിത്സകൾ ഒരു പുതിയ യുഗത്തിന്റെ തുടക്കം മാത്രമാണ്. കൂടുതൽ ഫലപ്രദമായ ചികിത്സകൾ ഉടൻ ഉണ്ടാകുമെന്ന് പ്രതീക്ഷിക്കുന്നെന്നും അദ്ദേഹം കൂട്ടിച്ചേർത്തു.

എഫ്ഡിഎയുടെ പൂർണ അംഗീകാരത്തെ സ്വാഗതം ചെയ്യുന്നതായി അൽഷിമേഴ്സ് അസോസിയേഷനും പറഞ്ഞു. അൽഷിമേഴ്‌സിന്റെ പ്രാരംഭ ഘട്ടത്തിൽ ആളുകൾക്ക് ഈ ചികിത്സ കൂടുതൽ ​ഗുണകരമാകും. രോ​ഗികൾക്ക് അവരുടെ പങ്കാളിയെയും മക്കളെയും പേരക്കുട്ടികളെയും തിരിച്ചറിയാൻ സാധിക്കും.

എന്നിരുന്നാലും, മരുന്നിന് പാർശ്വഫലങ്ങളുമുണ്ട്. ട്രയലിൽ പങ്കെടുത്തവരിൽ ഏകദേശം 13 ശതമാനം പേർക്ക് മസ്തിഷ്ക വീക്കമോ രക്തസ്രാവമോ അനുഭവപ്പെട്ടു. ചില ഗ്രൂപ്പുകൾക്ക് അവരുടെ ജനിതക ശാസ്ത്രത്തെ അടിസ്ഥാനമാക്കിയോ രക്തം കട്ടി കുറയ്ക്കുന്ന മരുന്നുകൾ കഴിക്കുകയോ ചെയ്താൽ ആ അപകടസാധ്യതകൾ കൂടുതലായിരിക്കും. ഈ പാർശ്വഫലങ്ങളുമായി ബന്ധപ്പെട്ട അപകട സാധ്യതകളെക്കുറിച്ച് രോഗികൾക്കും പരിചരിക്കുന്നവർക്കും മുന്നറിയിപ്പ് നൽകിട്ടുണ്ടെന്നും അധികൃതർ പറഞ്ഞു. അൽഷിമേഴ്‌സ് രോഗം നേരത്തെയുള്ളതായി കണക്കാക്കപ്പെടുന്ന എല്ലാവരും ഉടൻ തന്നെ മരുന്ന് ഉപയോഗിക്കാൻ ശ്രമിക്കുമെന്ന് പ്രതീക്ഷിക്കുന്നില്ലെന്ന് മരുന്നിന്റെ നിർമ്മാതാവായ ഇസായി പറഞ്ഞു.

വിപുലീകരിച്ച മെഡികെയർ കവറേജ്

അൽഷിമേഴ്സ് ബാധിച്ച രാജ്യത്തെ ദശലക്ഷക്കണക്കിന് ആളുകൾക്കും അവരുടെ കുടുംബങ്ങൾക്കും ഇത് സ്വാഗതാർഹമായ വാർത്തയാണ്. മെഡികെയർ സ്വീകർത്താക്കൾ ഒരുപക്ഷേ ലെകെംബിയുടെ ചെലവുകൾ സ്വയം വഹിക്കേണ്ടി വരും. മെഡികെയറിൽ ഉള്ളവർ അവരുടെ പാർട്ട് ബി കിഴിവ് നേടിയ ശേഷം മെഡികെയർ അംഗീകരിച്ച തുകയുടെ 20 ശതമാനം ഇൻഷുറൻസിന് ഉത്തരവാദിയായിരിക്കും. മെഡികെയർ അഡ്വാന്റേജിലോ സപ്ലിമെന്റൽ പ്ലാനുകളിലോ എൻറോൾ ചെയ്തിട്ടുള്ളവർ എത്ര തുക നൽകണം എന്നത് അവരുടെ പോളിസിയെ അടിസ്ഥാനമാക്കി വ്യത്യാസപ്പെടും.

മരുന്ന് ഒരു ആന്റിബോഡിയായി പ്രവർത്തിക്കുകയാണ് ചെയ്യുന്നത്. തലച്ചോറിലുണ്ടാകുന്ന അമിലോയ്ഡുകളെ പ്രതിരോധിക്കുകയാണ് ഇത് ചെയ്യുന്നത്. രോഗികളിൽ അത്ഭുതകരമായ മാറ്റം പെട്ടെന്നുണ്ടാക്കാൻ കഴിയില്ലെങ്കിലും ഓർമകളെ മുഴുവനായും അസുഖം കാർന്നു തിന്നുന്ന അവസ്ഥയിലേക്ക് നീങ്ങുന്നതിൽ നിന്ന് പ്രതിരോധിക്കാൻ‌ ഈ മരുന്നിന് കഴിയുന്നുണ്ട്. രോഗവസ്ഥയെ നിയന്ത്രിച്ചുനിർത്താനും സഹായിക്കുന്നുണ്ട്.

മരുന്നിന്റെ ഉപയോഗം സംബന്ധിച്ച വിദഗ്ധ നിർദേശങ്ങൾക്കും ഇതിന്റെ ഉപയോഗത്തെക്കുറിച്ചുമെല്ലാം വിശദമായ ചർച്ചകൾ നടന്നുവരികയാണ്. അടുത്ത തലമുറയെ അൽഷിമേഴ്സ് മുക്തമാക്കാനുതകുന്ന മരുന്നാവും ഇതെന്നാണ് പഠനത്തിനു പിന്നിൽ പ്രവർത്തിക്കുന്നവരും സർക്കാർ തലത്തിൽ വിഷയം ചർച്ച ചെയ്യുന്നവരും കരുതുന്നത്.