അലാസ്കയിൽ വീണ്ടും ഭൂചലനം; 6.2 തീവ്രത; തുടർ ചലനങ്ങൾക്ക് സാധ്യത

വാഷിങ്ടൺ ഡിസി: അലാസ്കയിൽ വീണ്ടും ശക്തമായ ഭൂചലനം. റിക്ടർ സ്കെയിലിൽ 6.2 തീവ്രത രേഖപ്പെടുത്തിയ ഭൂചലനമാണ് തിങ്കളാഴ്ച അനുഭവപ്പെട്ടത്. ഇന്ത്യൻ സമയം പുലർച്ചെ 03.58 ഓടെയാണ് ഭൂചലനമുണ്ടായതെന്ന് നാഷണൽ സെൻ്റർ ഫോർ സീസ്മോളജി അറിയിച്ചു. കഴിഞ്ഞ വ്യാഴാഴ്ച 7.3 തീവ്രത രേഖപ്പെടുത്തിയ ഭൂചലനം അലാസ്കയിൽ റിപ്പോർട്ട് ചെയ്തിരുന്നു. ഇതിന് പിന്നാലെയാണ് ഇന്ന് പുലർച്ചെ വീണ്ടും ഭൂകമ്പം ഉണ്ടായത്.

ഇതുവരെയും നാശനഷ്ടങ്ങളൊന്നും റിപ്പോർട്ട് ചെയ്തിട്ടില്ല. 48 കിലോമീറ്റർ ആഴത്തിലാണ് ഭൂകമ്പം ഉണ്ടായത്. പ്രഭാവകേന്ദ്രം താരതമ്യേന ആഴം കുറഞ്ഞതിനാൽ തന്നെ തുടർ ചലനങ്ങൾക്ക് സാധ്യതയുണ്ടെന്ന് കാലാവസ്ഥാ കേന്ദ്രം അറിയിച്ചു. അലാസ്ക മേഖല ഭൂകമ്പങ്ങൾക്ക് സാധ്യത കൂടുതലുള്ള ഒരിടമാണ്. യുഎസിലെ ഭൂചനങ്ങളിൽ 17.5 ശതമാനവും അലാസ്കയിലാണ് റിപ്പോർട്ട് ചെയ്യുന്നത്.

ഇവിടെ 130ൽ അധികം അഗ്നിപർവ്വതങ്ങളും ഉണ്ട്. കഴിഞ്ഞ 200 വർഷത്തിനിടയിൽ അമേരിക്കയിൽ ഉണ്ടായ 75 ശതമാനം അഗ്നിപർവ്വത സ്ഫോടനങ്ങളും ഇവിടെയാണ് സംഭവിച്ചത്.