കല്പ്പറ്റ: വയനാട്ടില് വീണ്ടും കാട്ടാനയുടെ ആക്രമണം. കാട്ടാനയുടെ ആക്രമണത്തില് കുറുവ ദ്വീപ് ജീവനക്കാരന് പരിക്കേറ്റു. പരിക്കേറ്റ പാക്കം സ്വദേശി പോള് മാനന്തവാടി മെഡിക്കല് കോളജില് ചികിത്സയിലാണ്. ദിവസങ്ങളായി വയനാട്ടിലെ ജനവാസ മേഖലകളില് വന്യജീവികളുടെ സാന്നിധ്യം വര്ധിച്ചതോടെ പുറത്തിറങ്ങാനാവാത്ത അവസ്ഥയിലാണ് പ്രദേശവാസികള്.
ഇന്ന് രാവിലെ ഒന്പതരയോടെ പാക്കം മേഖലയില് കുറുവ ദ്വീപില് ഡ്യൂട്ടി ചെയ്യുന്നതിനിടെയാണ് കാട്ടാനായുടെ ആക്രമണം ഉണ്ടായത്. ദ്വീപിലേക്കുള്ള വനപാതയിലൂടെയുള്ള റോഡാണിത്.
സമീപത്ത് ജോലി ചെയ്തിരുന്ന തൊഴിലുറപ്പ് തൊഴിലാളികള് പോളിന്റെ നിലവിളി കേട്ട് ഓടിയെത്തുകയായിരുന്നു. അവര് ഒച്ചവെച്ച് കാട്ടാനയെ ഓടിച്ച ശേഷം തൊഴിലാളികള് തന്നെ പോളിനെ ആശുപത്രിയില് എത്തിക്കുകയായിരുന്നു.
കഴിഞ്ഞ രണ്ട് ദിവസങ്ങളിലായി ഇവിടെ മൂന്ന് കാട്ടാനകളുടെ സാന്നിധ്യമുണ്ടായതായി പ്രദേശവാസികള് പറയുന്നു. ഇന്നലെ വൈകുന്നേരം ആന ജീപ്പിന് നേരെ പാഞ്ഞടുത്തതായും നാട്ടുകാര് പറയുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26