മൽപാൻ ഗീവർഗീസ് ചേടിയത്ത് ഇന്ന് വൈകുന്നേരം നിര്യാതനായി

കോട്ടയം :കേരള കത്തോലിക്കാ സഭക്ക് അതുല്യമായ സംഭാവനകൾ നല്കിയ   മൽപാൻ ഗീവർഗീസ് ചേടിയത്ത് ഇന്ന് വൈകുന്നേരം നിര്യാതനായി. മലങ്കര കത്തോലിക്ക സഭ മൽപാൻ പദവി നല്കി ആദരിച്ച അദ്ദേഹം  അറിയപ്പെടുന്ന എക്യുമെനിസ്റ്റ്, സഭാചരിത്രകാരൻ, കേരള സഭയിലെ നിരവധി മെത്രാന്മാർ, വൈദികർ, അല്‍മായ ദൈവശാസ്ത്രജ്ഞർ എന്നിവരുടെ ഗുരുഭൂതനുമായിരുന്നു. പത്തനംതിട്ട രൂപതാംഗമാണ് ബഹുമാനപ്പെട്ട  മല്പാൻ ചേടിയത്ത്.

പട്രോളജി, എക്യുമെനിസം, ചർച്ച് ഹിസ്റ്ററി എന്നിവയിൽ നിരവധി പുസ്തകങ്ങൾ രചിച്ചിട്ടുള്ള മല്പാൻ 1945 മെയ് 29 ന് കേരളത്തിലെ പത്തനം തിട്ട ജില്ലയിലെ അതിരിങ്കലിലാണ് ജനിച്ചത് . തിരുവനന്തപുരത്തെ സെന്റ് അലോഷ്യസ് സെമിനാരിയിലും കോട്ടയം വടവാതൂരിലെ സെന്റ് തോമസ് അപ്പസ്തോലിക സെമിനാരിയിലും വൈദീക പഠനം നടത്തി. 1969 ഡിസംബർ 20 ന് പുരോഹിതനായി.

ആർച്ച് ബിഷപ്പ് ബെനഡിക്റ്റ് മാർ ഗ്രിഗോറിയോസിന്റെ സെക്രട്ടറിയായി നിയമിതനായ അദ്ദേഹം തിരുവനന്തപുരത്തെ സെന്റ് അലോഷ്യസ് സെമിനാരിയിലെ വൈസ് റെക്ടറും (1970-1973) പിന്നീട് റെക്ടറും (1993-1996) ആയി സേവനം അനുഷ്ടിച്ചു . റോമിൽ ഡോക്ടറൽ പഠനം നടത്തി. മാർ ബാബായിയുടെ ക്രിസ്റ്റോളജിയെക്കുറിച്ച് അദ്ദേഹം ഡോക്ടറൽ പ്രബന്ധം അവതരിപ്പിച്ചു. കോട്ടയം (1979-1993), വടവാതൂർ സെന്റ് തോമസ് അപ്പസ്തോലിക സെമിനാരിയിൽ അദ്ധ്യാപകനായിരുന്ന അദ്ദേഹം കോട്ടയം പൊന്തിഫിക്കൽ ഓറിയന്റൽ ഇൻസ്റ്റിറ്റ്യൂട്ടിലെ സ്ഥിരം പ്രൊഫസറാണ്. 1996 മുതൽ തിരുവനന്തപുരത്തെ നളൻചിറയിലെ സെന്റ് മേരീസ് മലങ്കര മേജർ സെമിനാരിയിൽ റസിഡന്റ് പ്രൊഫസറാണ്.

കോട്ടയം സെന്റ് എഫ്രെം എക്യുമെനിക്കൽ റിസർച്ച് ഇൻസ്റ്റിറ്റ്യൂട്ട് (സെറി), കോട്ടയം മിഷനറി ഓറിയന്റേഷൻ സെന്റർ (എംഒസി) എന്നിവിടങ്ങളിലും അദ്ദേഹം പഠിപ്പിച്ചിരുന്നു. പ്രോ-ഓറിയൻറ് സിറിയക് കമ്മീഷനിലെ അംഗവും കത്തോലിക്കാ-മലങ്കര ഓർത്തഡോക്സ്, കത്തോലിക്കാ-സിറിയൻ ഓർത്തഡോക്സ് ഇന്റർനാഷണൽ തിയോളജിക്കൽ ഡയലോഗുകളുടെ മലങ്കര കത്തോലിക്കാ പ്രതിനിധികളിൽ ഒരാളുമായിരുന്നു അദ്ദേഹം. സിറോ-മലങ്കര കത്തോലിക്കാസഭയുടെ സിനഡൽ കമ്മീഷൻ ഫോർ തിയോളജി ആൻഡ് പബ്ലിക്കേഷന്റെ കൺസൾട്ടന്റുമാണ്  മല്പാൻ ചേടിയത്ത്.

പട്രോളജി, എക്യുമെനിസം, ചർച്ച് ഹിസ്റ്ററി എന്നിവയിൽ മലയാളത്തിലും ഇംഗ്ലീഷിലുമായി 106 പുസ്തകങ്ങൾ രചിച്ചിട്ടുണ്ട്. ക്രിസ്റ്റോളജി ഓഫ് മാർ ബാബായ് ദി ഗ്രേറ്റ് (1982) അദ്ദേഹത്തിന്റെ മാസ്റ്റർപീസായി കരുതപ്പെടുന്നു. ക്രിസ്റ്റ്യൻ ഓറിയന്റിലെ തിയോളജിക്കൽ ക്വാർട്ടർലിയുടെ സെക്ഷൻ എഡിറ്ററായും പ്രവർത്തിച്ചിട്ടുണ്ട്.