'മുഖത്ത് ഏറ്റവുമധികം രോമമുള്ള പുരുഷന്‍'; ഗിന്നസ് റെക്കോര്‍ഡ് നേടി പതിനെട്ടുകാരനായ ഇന്ത്യക്കാരന്‍

ന്യൂഡല്‍ഹി: മുഖത്ത് ഏറ്റവുമധികം രോമമുള്ള പുരുഷനെന്ന ഗിന്നസ് ലോക റെക്കോഡ് നേടി ഇന്ത്യന്‍ യുവാവ്. മുഖത്തിന്റെ ഒരു ചതുരശ്ര സെന്റി മീറ്ററില്‍ 201.72 രോമങ്ങളുള്ള ലളിത് പട്ടീദാര്‍ എന്ന പതിനെട്ടുകാരനാണ് ആണ് റെക്കോഡ് സ്വന്തമാക്കിയത്.

ഹൈപ്പര്‍ ട്രൈക്കോസിസ് എന്ന അപൂര്‍വ രോഗാവസ്ഥ കാരണമാണ് ലളിതിന്റെ മുഖത്തിന്റെ 95 ശതമാനവും രോമങ്ങള്‍കൊണ്ട് നിറഞ്ഞതെന്ന് ഡോക്ടര്‍മാര്‍ പറഞ്ഞു. ഇതിനെ 'വെര്‍വുള്‍ഫ് സിന്‍ഡ്രോം' എന്നും വിളിക്കുന്നു. ലോകത്തില്‍ ഇതുവരെ ഇത്തരം 50 കേസുകള്‍ റിപ്പോര്‍ട്ട് ചെയ്തിട്ടുണ്ട്.

അപൂര്‍വ രോഗാവസ്ഥ കാരണം കുട്ടിക്കാലം മുതല്‍ തന്നെ കളിയാക്കലുകളും കുറ്റപ്പെടുത്തലുകളും ലളിതിന് നേരിടേണ്ടി വന്നിട്ടുണ്ട്. സഹപാഠികള്‍ തന്നെ ഭയപ്പെട്ടിരുന്നതായും യുവാവ് പറയുന്നു.

കാലക്രമേണ സംസാരിക്കാന്‍ തുടങ്ങിയപ്പോഴാണ് അവരെപ്പോലൊരു മനുഷ്യന്‍ തന്നെയാണ് താനെന്ന് സഹപാഠികള്‍ മനസിലാക്കി. പുറമേ മാത്രമാണ് വ്യത്യാസം, പക്ഷേ ഉള്ളില്‍ താന്‍ വ്യത്യസ്നല്ലെന്നും ലളിത് പറഞ്ഞു.

'ആദ്യമൊക്കെ ഒരുപാടുപേര്‍ മോശമായി പെരുമാറിയിരുന്നു. എന്നാല്‍ ഇന്ന് അത്തരം സന്ദര്‍ഭങ്ങള്‍ അപൂര്‍വമാണ്. മിക്ക ആളുകളും സാധാരണ പോലെയാണ് പെരുമാറുന്നത്. അത് ഓരോ വ്യക്തികളെ അനുസരിച്ചാണ്.

ദയയില്ലാതെ സംസാരിക്കുന്ന അപൂര്‍വം ചിലരുണ്ട്. മുഖത്തെ രോമം നീക്കം ചെയ്യണമെന്ന് പലരും പറയാറുണ്ട്. എനിക്ക് എന്നെ ഇഷ്ടമാണ്. രൂപം മാറ്റാന്‍ ഞാനാഗ്രഹിക്കുന്നില്ല'- ലളിത് വ്യക്തമാക്കി.

ലോക റെക്കോഡ് മാത്രമല്ല, ഇന്‍സ്റ്റഗ്രാമിലും യൂട്യൂബിലും ലക്ഷക്ഷണക്കിന് ഫോളോവേഴ്സ് ലളിതിനുണ്ട്. ഇതിലൂടെ വ്‌ളോഗുകളും അദേഹം ചെയ്യുന്നുണ്ട്.

ഇതിനെല്ലാം കുടുംബത്തിന്റെ പൂര്‍ണ പിന്തുണയും പ്രോത്സാഹനവും ലഭിക്കുന്നുണ്ടെന്നും ലളിത് പറഞ്ഞു. ലോകം ചുറ്റി സഞ്ചരിച്ച് വ്യത്യസ്തമായ സംസ്‌കാരങ്ങള്‍ മനസിലാക്കണമെന്നതാണ് ലളിതിന്റെ ഏറ്റവും വലിയ ആഗ്രഹം.