ഷിംല: ബഹിരാകാശത്തേക്ക് ആദ്യമായി യാത്ര ചെയ്തത് ഹനുമാനാണെന്ന് സ്‌കൂള്‍ വിദ്യാര്‍ഥികള്‍ക്ക് 'ക്ലാസെടുത്ത' ബിജെപി നേതാവും മുന്‍ കേന്ദ്ര മന്ത്രിയുമായ അനുരാഗ് ഠാക്കൂറിന് സോഷ്യല്‍ മീഡിയയില്‍ പരിഹാസ പൊങ്കാല.
ദേശീയ ബഹിരാകാശ ദിനത്തോടനുബന്ധിച്ച് ഹിമാചല്‍ പ്രദേശിലെ പി.എം ശ്രീ സ്‌കൂളില്‍ സംഘടിപ്പിച്ച ചടങ്ങില്‍ വിദ്യാര്‍ഥികളെ അഭിസംബോധന ചെയ്യവേയായിരുന്നു അനുരാഗ് ഠാക്കൂറിന്റെ പരാമര്‍ശം.
വിദ്യാര്‍ഥികളോട് പുസ്തകങ്ങള്‍ക്കപ്പുറം ചിന്തിക്കാനും ഇന്ത്യയുടെ പാരമ്പര്യത്തെക്കുറിച്ച് അറിയണമെന്നും ആഹ്വാനം ചെയ്തു കൊണ്ടാണ് ബിജെപി നേതാവ് സയന്‍സ് ചോദ്യത്തിലേക്ക് കടന്നത്.
ആദ്യത്തെ ബഹിരാകാശ യാത്രികന്‍ ആരെന്ന ചോദ്യത്തിന് കുട്ടികള്‍ നീല്‍ ആംസ്ട്രോങ് എന്ന് ഉത്തരം പറഞ്ഞപ്പോള്‍ ഹനുമാനാണ് ആദ്യ ഗഗന ചാരിയെന്ന് പറഞ്ഞു തിരുത്തുകയായിരുന്നു അനുരാഗ് ഠാക്കൂര്‍.
'അത് ഹനുമാനാണെന്ന് ഞാന്‍ കരുതുന്നു' എന്ന് അനുരാഗ് ഠാക്കൂര്‍ തിരുത്തി പറയുക മാത്രമല്ല ഈ ചോദ്യോത്തര പരിപാടി സ്വന്തം എക്സ് ഹാന്‍ഡിലില്‍ പങ്കുവെയ്ക്കുകയും ചെയ്തു.
'പവാന്‍സുത് (പവന പുത്രന്‍) ഹനുമാന്‍ജി ആദ്യത്തെ ബഹിരാകാശ യാത്രികന്‍' എന്ന അടിക്കുറിപ്പോടെ ഠാക്കൂര്‍ ആശയ വിനിമയത്തിന്റെ ഒരു വീഡിയോ പങ്കിടുകയും ചെയ്തു.
നമ്മളിപ്പോഴും വര്‍ത്തമാന കാലത്തിലാണെന്നും ആയിരക്കണക്കിന് വര്‍ഷങ്ങള്‍ പഴക്കമുള്ള പാരമ്പര്യം, അറിവ്, സംസ്‌കാരം എന്നിവ തിരിച്ചറിയാത്തിടത്തോളം ബ്രിട്ടിഷുകാര്‍ കാണിച്ചു തന്നതു പോലെ നമ്മള്‍ തുടരുമെന്നുമാണ് ബിജെപി നേതാവിന്റെ ക്ലാസെടുപ്പ്.
പ്രിന്‍സിപ്പലിനോടും വിദ്യാര്‍ഥികളോടും പാഠപുസ്തകങ്ങള്‍ക്കപ്പുറം ചിന്തിക്കാനും രാജ്യത്തിന്റെ പാരമ്പര്യത്തെയും അറിവിനെയും കുറിച്ച് മനസിലാക്കണെമെന്ന് കൂടി എംപി കൂടിയായ ഠാക്കൂര്‍ പറയുന്നുണ്ട്.
അഞ്ച് തവണ പാര്‍ലമെന്റിലെത്തിയ അനുരാഗ് ഠാക്കൂര്‍ ശാസ്ത്രത്തെ വളച്ചൊടിക്കുന്നതും ഹിന്ദുത്വ ചിന്താഗതിയും വിദ്യാര്‍ത്ഥികളെ വഴി തെറ്റിക്കുന്നതിലേക്ക് എത്തിയതിന്റെ രോഷവും പരിഹാസവും സോഷ്യല്‍ മീഡിയയില്‍ നിറയുന്നുണ്ട്.
ഒപ്പം കുട്ടികള്‍ പറഞ്ഞ നീല്‍ ആംസ്ട്രോങ് എന്ന ഉത്തരം തെറ്റാണെന്നും ആദ്യ ബഹിരാകാശ യാത്രികന്‍ യൂറി ഗഗാറിന്‍ ആണെന്നും ചൂണ്ടിക്കാണിക്കുന്ന സോഷ്യല്‍ മീഡിയ ഹാന്‍ഡിലുകള്‍ മുന്‍ മന്ത്രിക്ക് അത് പോലും തിരുത്തി പറഞ്ഞു കൊടുക്കാന്‍ കഴിയുന്നില്ലെന്ന പരിഹാസം പങ്കു വയ്ക്കുന്നുണ്ട്.
'കുട്ടികളെ തിരുത്തുന്നതിന് പകരം ബാലിശമായ പുഞ്ചിരിയോടെ ആദ്യത്തെ ബഹിരാകാശ സഞ്ചാരി ഹനുമാന്‍ ആണെന്ന് നിങ്ങള്‍ അവരോട് പറഞ്ഞു. അത് യൂറി ഗഗാറിന്‍ ആയിരുന്നു. കുട്ടികളുടെ നിഷ്‌കളങ്കമായ മനസിനെ വഴി തെറ്റിക്കുന്നത് നിര്‍ത്തൂ. നിങ്ങളും നിങ്ങളുടെ പ്രത്യയശാസ്ത്രവും ഇതിനകം രണ്ട് തലമുറകളെ ദുഷിപ്പിച്ചു' - ഇതാണ് സോഷ്യല്‍മീഡിയയില്‍ വന്ന ഒരു കമന്റ്.
'എല്ലാ കുട്ടികളും തെറ്റായ ഉത്തരങ്ങളാണ് നല്‍കുന്നത്. ബഹിരാകാശത്തേക്ക് ആദ്യമായി യാത്ര ചെയ്ത മനുഷ്യന്‍ യൂറി ഗഗാറിന്‍ ആണ്, നീല്‍ ആംസ്ട്രോങ്ങ് അല്ല. ചന്ദ്രനിലേക്ക് ആദ്യമായി യാത്ര ചെയ്ത മനുഷ്യനാണ് നീല്‍. പക്ഷേ നിങ്ങള്‍ അവ തിരുത്തിയില്ല. വിശ്വാസവും ശാസ്ത്രവും വ്യത്യസ്ത വിഷയങ്ങളാണ്. കുട്ടികള്‍ സ്‌കൂളില്‍ ശാസ്ത്രം പഠിക്കട്ടെ, വീട്ടില്‍ വിശ്വാസം പഠിക്കട്ടെ' എന്നാണ് മറ്റൊരു കമന്റ്.
1
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.