ആഘോഷം സിനിമയുടെ മ്യൂസിക്ക് റൈറ്റ്സ് സ്വന്തമാക്കി ഗുഡ് വിൽ കമ്പനി ; ഓഡിയോ ലോഞ്ച് ഡിസംബർ ഒന്നിന് കൊച്ചി ചാവറ കൾച്ചറൽ സെന്ററിൽ

കൊച്ചി: മനോഹരമായ ​ഗാനങ്ങൾ കോർത്തിണക്കിയ ആഘോഷം സിനിമയുടെ മ്യൂസിക്ക് റൈറ്റ്സ് സ്വന്തമാക്കി ഗുഡ് വിൽ കമ്പനി. ക്യാമ്പസ് പശ്ചാത്തലത്തിൽ ഒരുക്കിയ ചിത്രത്തിൽ മികച്ച നാല് ഗാനങ്ങളാണുള്ളത്. സ്റ്റീഫൻ ദേവസി, ഗൗതം വിൻസെന്റ്, ഹരിനാരായണൻ, സന്തോഷ് വർമ്മ എന്നിവരാണ് ഗാനങ്ങൾക്ക് ഈണവും വരികളും നൽകിയിരിക്കുന്നത്. എം.ജി ശ്രീകുമാർ, വിനീത് ശ്രീനിവാസൻ, സൂര്യ ശ്യാംകുമാർ എന്നിവരും നിരവധി യുവഗായകരും ചേർന്നാണ് ഗാനങ്ങൾ ആലപിച്ചിട്ടുള്ളത്.

സിനിമയുടെ ഓഡിയോ ലോഞ്ച് ഡിസംബർ ഒന്നിന് വൈകുന്നേരം 4.30 ന് കൊച്ചി ചാവറ കൾച്ചറൽ സെന്ററിൽ നടക്കും. സ്റ്റീഫൻ ദേവസിയും ഗൗതം വിൻസെന്റും ഉൾപ്പെടെയുള്ള പ്രമുഖ കലാകാരന്മാരുടെ സാന്നിദ്ധ്യം ചടങ്ങിനെ കൂടുതൽ തിളക്കമാർന്നതാക്കും.

ക്യാമ്പസ് ജീവിതത്തിന്റെ മധുരസ്മൃതികളെ ഉണർത്തുന്ന മധുര ഗാനങ്ങളും ക്രിസ്തുമസ് ആഘോഷത്തിന് തനിമ നൽകുന്ന കരോൾ ഗാനവും പ്രണയ ​ഗാനവും ലഹരി വിരുദ്ധ സന്ദേശവുമായി വിനീത് ശ്രീനിവാസൻ ആലപിച്ച ​ഗാനവും ചിത്രത്തിന് ഭംഗി കൂട്ടുമെന്ന് അണിയറ പ്രവർത്തകർ പറഞ്ഞു.

വിജയ രാഘവനും നരേനും പ്രധാന വേഷത്തിൽ എത്തുന്ന ചിത്രത്തിൽ വൻ യുവതാരനിര തന്നെ അണിനിരക്കുന്നുണ്ട്. പേരുപോലെതന്നെ ഒരു ആഘോഷത്തിന്റെ മൂഡിലൊരുങ്ങുന്ന ചിത്രം സം​ഗീതത്തിന് പ്രാധാന്യം നൽകിയാണ് ഒരുക്കിയിരിക്കുന്നത്.

Life is all about celebration എന്ന ടാഗ്‌ലൈനോട് കൂടിയാണ് ചിത്രമെത്തുന്നത്. സി.എൻ ഗ്ലോബൽ മൂവീസിന്റെ ബാനറിൽ ഡോ. ലിസി കെ. ഫെർണാണ്ടസും ഡോ. പ്രിൻസ് പ്രോസി ഓസ്ട്രിയയും ടീമും ചേർന്നാണ് ചിത്രം നിർമ്മിക്കുന്നത്. പ്രേക്ഷക പ്രശംസ നേടിയ സ്വർഗം എന്ന ചിത്രത്തിനു ശേഷം സിഎൻ ഗ്ലോബൽ മൂവീസ് നിർമ്മിക്കുന്ന രണ്ടാമത്തെ ചിത്രമാണ് ആഘോഷം. അമൽ കെ ജോബിയാണ് ചിത്രം സംവിധാനം ചെയ്യുന്നത്.

റോസ്മിൻ, ധ്യാൻ ശ്രീനിവാസൻ, ജെയ്സ് ജോസ്, ജോണി ആൻ്റണി, രൺജി പണിക്കർ, അജു വർഗീസ്, ബോബി കുര്യൻ, ഷാജു ശ്രീധർ, മഖ്ബൂൽ സൽമാൻ, കോട്ടയം രമേശ്, കൈലാഷ്, ദിവ്യദർശൻ, റുഷിൻ ഷാജി കൈലാസ്, നിഖിൽ രൺജി പണിക്കർ, വിജയ് നെല്ലിസ്, നാസർ ലത്തീഫ്, ഡിനി ഡാനിയേൽ, ടൈറ്റസ് ജോൺ, ജോയ് ജോൺ ആന്റണി, അഞ്ജലി ജോസഫ്, ജെൻസ് ജോസ് എന്നിവരും നിരവധി പുതുമുഖങ്ങളും ഈ ചിത്രത്തിൽ അണിനിരക്കുന്നുണ്ട്.

പശ്ചാത്തല സംഗീതം 4 മ്യൂസിക്. ഛായാഗ്രഹണം -റോജോ തോമസ്, എഡിറ്റിംഗ് -ഡോൺ മാക്സ്. ചീഫ് അസോസിയേറ്റ് ഡയറക്ടർ -അമൽദേവ് കെ.ആർ, പ്രൊജക്റ്റ് ഡിസൈനർ -ടൈറ്റസ് ജോൺ. പ്രൊഡക്ഷൻ കൺട്രോളർ- നന്ദു പൊതുവാൾ. കലാസംവിധാനം- രജീഷ് കെ സൂര്യ. മേക്കപ്പ്-മാളൂസ് കെ പി. കോസ്റ്റ്യൂം ഡിസൈൻ- ബബിഷ കെ. രാജേന്ദ്രൻ.

കൊറിയോഗ്രാഫേഴ്സ്- സനോജ് ഡെൽഗ ഡോസ്, അന്ന പ്രസാദ്, ശ്യാം ഡോക്. പ്രൊഡക്ഷൻ എക്സിക്യൂട്ടീവ്സ്- പ്രണവ് മോഹൻ, ആൻ്റണി കുട്ടമ്പുഴ. പിആർഒ- മഞ്ജു ഗോപിനാഥ്. സ്റ്റിൽസ് -ജയ്സൺ ഫോട്ടോലാൻ്റ്. ഡിസൈൻസ് -പ്രമേഷ് പ്രഭാകർ. പാലക്കാട് ചിത്രീകരണം പൂർത്തിയാക്കിയ ആഘോഷം ഉടൻ തിയേറ്ററുകളിൽ എത്തും.