‌‌‌‌‌‌ക്രൈസ്തവ വേട്ട തടയാൻ ട്രംപ് എത്തുന്നു; നൈജീരിയൻ ഗ്രാമങ്ങൾക്ക് ഇനി അമേരിക്കൻ ഡ്രോണുകളുടെ സുരക്ഷാ കവചം

സെനഗൽ: ഇസ്‌ലാമിക ഭീകരതയുടെയും ആഭ്യന്തര സംഘർഷങ്ങളുടെയും പിടിയിലമർന്ന നൈജീരിയയിലെ ക്രൈസ്തവ സമൂഹത്തിന് സംരക്ഷണമൊരുക്കാൻ അമേരിക്കൻ സൈന്യത്തിന്റെ അത്യാധുനിക ‘റീപ്പർ’ഡ്രോണുകൾ എത്തുന്നു. നൈജീരിയയിൽ ക്രൈസ്തവർക്കെതിരെ ബോക്കോ ഹറാം ഉൾപ്പെടെയുള്ള ഭീകര സംഘടനകൾ നടത്തുന്ന ആക്രമണങ്ങൾ വർധിച്ചുവരുന്ന സാഹചര്യത്തിലാണ് യുഎസ് പ്രസിഡന്റ് ഡൊണാൾഡ് ട്രംപിന്റെ പ്രത്യേക നിർദ്ദേശപ്രകാരം ഈ സുരക്ഷാ നടപടി.

​അമേരിക്കയും നൈജീരിയയും ചേർന്ന് രൂപീകരിച്ച പുതിയ സുരക്ഷാ സഖ്യത്തിന്റെ ഭാഗമായാണ് ഡ്രോണുകൾ വിന്യസിച്ചത്. ഡ്രോൺ നിരീക്ഷണത്തിന് പുറമെ, നൈജീരിയൻ സൈന്യത്തിന് അത്യാധുനിക പരിശീലനവും ഇന്റലിജൻസ് സഹായവും നൽകുന്നതിനായി ഇരുനൂറോളം യുഎസ് സൈനികരെയും മേഖലയിൽ നിയോഗിച്ചിട്ടുണ്ട്.

​അഫ്ഗാനിസ്ഥാൻ, ഇറാഖ്, യെമൻ തുടങ്ങിയ യുദ്ധമേഖലകളിൽ അമേരിക്കൻ സൈന്യവും സിഐഎയും വർഷങ്ങളായി ഉപയോഗിച്ചുവരുന്ന വിനാശകാരിയായ നിരീക്ഷണ സംവിധാനമാണ് എംക്യു-9 റീപ്പർ ഡ്രോണുകൾ. സമുദ്രനിരപ്പിൽ നിന്ന് 40,000 അടി മുകളിൽ വരെ പറക്കാൻ ശേഷിയുള്ള ഇവയ്ക്ക് തുടർച്ചയായി 30 മണിക്കൂറിലധികം ആകാശത്ത് തങ്ങിനിന്ന് വിവരങ്ങൾ ശേഖരിക്കാനാകും.

ഏകദേശം 30 ദശലക്ഷം ഡോളറാണ് (ഏകദേശം 250 കോടിയിലധികം രൂപ) ഒരു ഡ്രോണിന്റെ നിർമ്മാണ ചിലവ്. ഭീകരവാദികളുടെ നീക്കങ്ങൾ മുൻകൂട്ടി തിരിച്ചറിയുകയും ക്രൈസ്തവ ഗ്രാമങ്ങൾക്കും ആരാധനാലയങ്ങൾക്കും നേരെ ഉണ്ടാകുന്ന ആക്രമണങ്ങൾ തടയുകയുമാണ് പ്രധാന ലക്ഷ്യമെന്ന് യുഎസ് ആഫ്രിക്കൻ കമാൻഡ് അറിയിച്ചു.

​നൈജീരിയയിലെ നിലവിലെ അസ്ഥിരമായ സാഹചര്യം കണക്കിലെടുത്ത് അന്താരാഷ്ട്ര തലത്തിൽ തന്നെ വലിയ പ്രാധാന്യത്തോടെയാണ് ഈ നീക്കത്തെ ലോകം നോക്കിക്കാണുന്നത്.