പൗരസ്ത്യ സഭകളുടെ പാരമ്പര്യം അത്യന്തം ശ്രേഷ്ഠം: അവഗണന സഭയ്ക്ക് വലിയ ദോഷം ചെയ്യുമെന്ന് മാർപാപ്പ

വത്തിക്കാൻ: പൗരസ്ത്യ കത്തോലിക്കാ സഭകളുടെ പാരമ്പര്യങ്ങൾ അത്യന്തം ശ്രേഷ്ഠമാണെന്നും, അവയെ മനസിലാക്കാൻ പരാജയപ്പെടുന്നത് സാർവത്രിക സഭയ്ക്ക് വലിയ ദോഷം ചെയ്യുമെന്നും ലിയോ മാർപാപ്പ. പൗരസ്ത്യ സഭകൾക്കായുള്ള സഹായ ഏജൻസികളുടെ കൂട്ടായ്മയായ അംഗങ്ങളുമായി വത്തിക്കാനിൽ നടത്തിയ കൂടിക്കാഴ്ചയിലാണ് കിഴക്കൻ ക്രൈസ്തവ സഭകളുടെ ആത്മീയ സമ്പത്ത് കാത്തുസൂക്ഷിക്കേണ്ടതിന്റെ പ്രാധാന്യം പാപ്പ ഊന്നിപ്പറഞ്ഞത്.

ആഗോള കത്തോലിക്കാ സഭയ്ക്ക് പകർന്നു നൽകാൻ പൗരസ്ത്യ സഭകളുടെ പക്കൽ വലിയൊരു സമ്മാനമുണ്ടെന്ന് മാർപാപ്പ ചൂണ്ടിക്കാട്ടി. വിശാലമായ ആഗോള സഭ പലപ്പോഴും തിരിച്ചറിയാതെ പോകുന്ന അതിസമ്പന്നമായ വൈവിധ്യമാണ് ഈ പൗരസ്ത്യ സഭകൾ നൽകുന്നത്.

പൗരസ്ത്യ സഭകളിലെ വൈവിധ്യമാർന്ന സഭാപാരമ്പര്യങ്ങളെക്കുറിച്ച് പാശ്ചാത്യ കത്തോലിക്കാ സമൂഹം പലപ്പോഴും ആഴത്തിൽ അറിവുള്ളവരല്ല. ക്രൈസ്തവ പൗരസ്ത്യത്തെ ശരിയായി മനസിലാക്കിയാൽ മാത്രമേ അതിനെ സംരക്ഷിക്കാൻ സാധിക്കുകയുള്ളൂ എന്നും ഈ ധാരണ നഷ്ടപ്പെടുന്നത് സഭയെ ആത്മീയമായി ദരിദ്രമാക്കുമെന്നും പാപ്പ മുന്നറിയിപ്പ് നൽകി.

പൗരസ്ത്യ കത്തോലിക്കാ സമൂഹങ്ങൾ തങ്ങളുടെ ആത്മീയ സമ്പത്തുകളിൽ പലതും കാത്തുസൂക്ഷിക്കുകയും ഓർത്തഡോക്സ് സഭകളിലെ സഹോദരങ്ങളുമായി അവ പങ്കുവെക്കുകയും ചെയ്യുന്നുണ്ടെന്ന് മാർപാപ്പ വ്യക്തമാക്കി. പൗരസ്ത്യ സഭകൾ തങ്ങളുടെ തനതായ പാരമ്പര്യം നിലനിർത്തുന്നതിനൊപ്പം ഇതര പൗരസ്ത്യ ക്രൈസ്തവ സഹോദരങ്ങളുമായി പുലർത്തുന്ന ഈ ആത്മീയ ബന്ധം സഭകളുടെ ഐക്യത്തിന് അനിവാര്യമാണ്.

പൗരസ്ത്യ ക്രൈസ്തവതയുടെ ആഴവും പരപ്പും വിശ്വാസികൾ ഗ്രഹിക്കുന്നത് സഭയുടെ നിലനിൽപ്പിന് തന്നെ അത്യാവശ്യമാണെന്ന് അദേഹം ഓർമ്മിപ്പിച്ചു. യുദ്ധവും പ്രതിസന്ധികളും നേരിടുന്ന പൗരസ്ത്യ ദേശങ്ങളിൽ സമാധാനം പുലരുന്നതിനായി ഏവരും പ്രത്യേകമായി പ്രാർത്ഥിക്കണമെന്നും മാർപാപ്പ ആഹ്വാനം ചെയ്തു.