ടോക്യോ: ഒളിമ്പിക്സ് സെമി ഫൈനലില്‍ ഇന്ത്യന്‍ പുരുഷ ഹോക്കി ടീമിന് ലോക ചാമ്പ്യന്മാരായ ബെല്‍ജിയത്തോട് തോല്‍വി. രണ്ടിനെതിരേ അഞ്ചു ഗോളുകള്‍ക്കാണ് ബെല്‍ജിയത്തിന്റെ വിജയം. ഇതോടെ ഇന്ത്യയുടെ ഫൈനല്‍ മോഹങ്ങള്‍ അവസാനിച്ചെങ്കിലും മെഡല്‍ പ്രതീക്ഷ അവസാനിച്ചിട്ടില്ല. വെങ്കല മെഡലിനായുള്ള പോരാട്ടത്തില്‍ ഓസ്ട്രേലിയ-ജര്‍മനി മത്സരത്തില്‍ പരാജയപ്പെടുന്ന ടീമിനെ ഇന്ത്യ നേരിടും.
ബെല്‍ജിയത്തിനായി അലെക്സാണ്ടര്‍ ഹെന്‍ഡ്രിക്സ് ഹാട്രിക്ക് നേടിയപ്പോള്‍ നേടിയപ്പോള്‍ ഫാനി ലൂയ്പേര്‍ട്ടും ഡോഹ്മെനും സ്‌കോര്‍ ചെയ്തു. ഇന്ത്യയ്ക്ക് വേണ്ടി മന്‍പ്രീത് സിങും ഹര്‍മന്‍ പ്രീത് സിങും ഗോള്‍ നേടി.
ഇന്ത്യയെ ഞെട്ടിച്ചുകൊണ്ട് ബെല്‍ജിയമാണ് മത്സരത്തിലാദ്യം ലീഡെടുത്തത്. മത്സരം തുടങ്ങി രണ്ടാം മിനിട്ടില്‍ തന്നെ ബെല്‍ജിയം ഇന്ത്യയ്ക്കെതിരേ ലീഡെടുത്തു. പെനാല്‍ട്ടി കോര്‍ണറില്‍ നിന്നാണ് ഗോള്‍ പിറന്നത്. ഫാനി ലൂയ്പേര്‍ട്ടാണ് ബെല്‍ജിയത്തിനായി ഗോള്‍ നേടിയത്.
ഗോള്‍ വഴങ്ങിയതോടെ ഉണര്‍ന്നു കളിച്ച ഇന്ത്യ 11-ാം മിനിട്ടില്‍ തന്നെ തിരിച്ചടിച്ച് സമനില ഗോള്‍ നേടി. പെനാല്‍ട്ടി കോര്‍ണറിലൂടെ ഹര്‍മന്‍പ്രീത് സിങ്ങാണ് ബെല്‍ജിയം വല കുലുക്കിയത്. താരത്തിന്റെ ഒളിമ്പിക്സിലെ അഞ്ചാം ഗോളാണിത്.
സമനില ഗോള്‍ നേടിയതിന് തൊട്ടുപിന്നാലെ ലോകചാമ്പ്യന്മാരായ ബെല്‍ജിയത്തെ ഞെട്ടിച്ചുകൊണ്ട് ഇന്ത്യ രണ്ടാം ഗോള്‍ നേടി ലീഡെടുത്തു. ഇത്തവണ മന്‍ദീപ് സിങ്ങാണ് ഇന്ത്യയ്ക്ക് വേണ്ടി ഗോള്‍ നേടിയത്. തകര്‍പ്പന്‍ ഷോട്ടിലൂടെയാണ് താരം ഇന്ത്യയ്ക്ക് ലീഡ് സമ്മാനിച്ചത്. മന്‍ദീപ് ഒളിമ്പിക്സില്‍ നേടുന്ന ആദ്യ ഗോളാണിത്. അതുമാത്രമല്ല ഇന്ത്യയ്ക്ക് വേണ്ടി ടോക്യോ ഒളിമ്പിക്സില്‍ ഗോള്‍ നേടുന്ന 12-ാമത്തെ താരം കൂടിയായി മന്‍ദീപ്.
ഗോള്‍ വഴങ്ങിയതോടെ ബെല്‍ജിയം ആക്രമണം ശക്തമാക്കിയെങ്കിലും ഇന്ത്യയുടെ പ്രതിഭാസമ്പന്നരായ പ്രതിരോധനിര അവയെയെല്ലാം നിഷ്പ്രഭമാക്കി. ലീഡ് നേടിയിട്ടും ആക്രമിച്ച് കളിക്കാനാണ് ഇന്ത്യ തീരുമാനിച്ചത്. ആദ്യ ക്വാര്‍ട്ടറില്‍ 2-1 എന്ന സ്‌കോറിന് ഇന്ത്യ മുന്നിലെത്തി.
രണ്ടാം ക്വാര്‍ട്ടറിന്റെ തുടക്കത്തില്‍ തന്നെ ബെല്‍ജിയം സമനില ഗോള്‍ കണ്ടെത്തി. 19-ാം മിനിട്ടില്‍ ബെല്‍ജിയത്തിന്റെ ഗോളടിയന്ത്രം അലെക്സാണ്ടര്‍ ഹെന്‍ഡ്രിക്സാണ് ഗോള്‍ നേടിയത്. ഇതോടെ സ്‌കോര്‍ 2-2 എന്ന നിലയിലായി. ടൂര്‍ണമെന്റിലെ ടോപ് സ്‌കോററായ ഹെന്‍ഡ്രിക്സിന്റെ ടൂര്‍ണമെന്റിലെ 12-ാം ഗോളാണിത്.
രണ്ടാം ക്വാര്‍ട്ടറില്‍ ബെല്‍ജിയമാണ് കൂടുതല്‍ ആധിപത്യം പുലര്‍ത്തിയത്. ഗോളെന്നുറച്ച മൂന്നോളം ഷോട്ടുകളാണ് രണ്ടാം ക്വാര്‍ട്ടറില്‍ ഇന്ത്യന്‍ പോസ്റ്റിലേക്ക് ബെല്‍ജിയം അടിച്ചത്. എന്നാല്‍ ഇന്ത്യയുടെ മലയാളി ഗോള്‍കീപ്പര്‍ ശ്രീജേഷിന്റെ മികച്ച സേവുകള്‍ ഇന്ത്യയ്ക്ക് തുണയായി. രണ്ടാം ക്വാര്‍ട്ടര്‍ അവസാനിച്ചപ്പോള്‍ ഇരുടീമുകളും സമനില പാലിച്ചു.
മൂന്നാം ക്വാര്‍ട്ടറില്‍ ആക്രമണങ്ങളും പ്രത്യാക്രമണങ്ങളുമായി ഇരുടീമുകളും കളം നിറഞ്ഞെങ്കിലും ഗോള്‍ നേടാനായില്ല. നാലാം ക്വാര്‍ട്ടറിന്റെ തുടക്കത്തില്‍ നായകന്‍ മന്‍പ്രീതിന് ഗ്രീന്‍കാര്‍ഡ് ലഭിച്ചത് ഇന്ത്യന്‍ ടീമിന് തിരിച്ചടിയായി. എന്നിട്ടും ഇന്ത്യന്‍ പ്രതിരോധം പാറപോലെ ഉറച്ചുനിന്നു. തുടര്‍ച്ചയായ രണ്ട് പെനാല്‍ട്ടി കോര്‍ണറുകള്‍ രക്ഷിച്ചെടുക്കുകയും ചെയ്തു.
എന്നാല്‍ മൂന്നാം പെനാല്‍ട്ടി കോര്‍ണറിലൂടെ ബെല്‍ജിയം ഇന്ത്യന്‍ പ്രതിരോധത്തെ കബിളിപ്പിച്ച് 49-ാം മിനിട്ടില്‍ മത്സരത്തിലെ മൂന്നാം ഗോള്‍ നേടി. ഗോളടിയന്ത്രം ഹെന്‍ഡ്രിക്സാണ് ഇത്തവണയും ബെല്‍ജിയത്തിനായി സ്‌കോര്‍ ചെയ്തത്. ഇതോടെ സ്‌കോര്‍ 3-2 എന്ന നിലയിലായി. മന്‍പ്രീതിന്റെ വിടവാണ് ഗോളിന് വഴിവെച്ചത്.
ലീഡെടുത്തിട്ടും ആക്രമിച്ച് കളിക്കാനാണ് ബെല്‍ജിയം ശ്രമിച്ചത്. അതിന്റെ ഭാഗമായി 53-ാം മിനിട്ടില്‍ ടീമിന് പെനാല്‍ട്ടി ലഭിച്ചു. ഷോട്ടെടുത്ത ഹെന്‍ഡ്രിക്സിന് പിഴച്ചില്ല. ശ്രീജേഷിനെ കബിളിപ്പിച്ചുകൊണ്ട് പന്ത് അനായാസം വലയിലെത്തിച്ച് താരം ബെല്‍ജിയത്തിനായി നാലാം ഗോള്‍ നേടി. ഒപ്പം ഹാട്രിക്കും തികച്ചു. ഇതോടെ ഇന്ത്യ തകര്‍ന്നു. 1980 ന് ശേഷം ഒളിമ്പിക്സ് ഫൈനല്‍ കളിക്കാനുള്ള മന്‍പ്രീതിന്റെയും സംഘത്തിന്റെയും മോഹങ്ങള്‍ അതോടെ അവസാനിച്ചു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.