ന്യൂയോര്‍ക്ക്:സൂപ്പര്‍ സ്റ്റാര്‍ ആയ യു.എസ് ഗായകന്‍ ആര്‍. കെല്ലി ലൈംഗിക പീഡനക്കേസില്‍ കുറ്റക്കാരനാണെന്ന് കോടതി കണ്ടെത്തി. ഒരു പതിറ്റാണ്ടോളമായി കെല്ലിക്കെതിരായുള്ള ഒമ്പത് കുറ്റങ്ങളും തെളിഞ്ഞതായി ന്യൂയോര്‍ക്കില്‍ ഏഴംഗ ജൂറി വിധിച്ചു. ആഫ്രിക്കന്‍ വംശജരായ സ്ത്രീകള്‍ക്കും കുട്ടികള്‍ക്കും നേരെയുള്ള ലൈംഗികാതിക്രമം, ബാല ലൈംഗിക ദൃശ്യങ്ങള്‍ പ്രചരിപ്പിക്കല്‍ തുടങ്ങിയവയാണ് കുറ്റപത്രത്തിലുണ്ടായിരുന്നത്.
മേയ് നാലിനാകും കോടതി വിധി പറയുക.കെല്ലിക്ക് 100 വര്‍ഷം വരെ ശിക്ഷ ലഭിച്ചേക്കുമെന്നാണ് റിപ്പോര്‍ട്ട്. നിരാശാജനകമാണ് ജൂറിയുടെ കണ്ടെത്തലെന്നും അപ്പീലിന് പോകുന്നതിനെ കുറിച്ച് ആലോചിക്കുന്നതായും കെല്ലിയുടെ അഭിഭാഷകന്‍ ദേവറക്സ് കാനിക്ക് പറഞ്ഞു. ഇല്ലിനോയിസ് ഫെഡറല്‍ കോടതിയില്‍ ഉള്‍പ്പെടെ മൂന്ന് കോടതികളില്‍ കൂടി കെല്ലി ഇപ്പോഴും വിചാരണ നേരിടുന്നുണ്ട്.കെല്ലിക്ക് പെണ്‍കുട്ടികളെ കണ്ടെത്താനും അവരെ അടിമകളെപ്പോലെ കൂടെ നിര്‍ത്താനും മാനേജര്‍മാരും സഹായികളും പ്രവര്‍ത്തിച്ചിരുന്നെന്നും ഇത് ഒരു ക്രിമിനല്‍ സംരംഭത്തിന് തുല്യമാണെന്ന് പ്രോസിക്യൂട്ടര്‍മാര്‍ പറഞ്ഞു.
1999 മുതല്‍ 20 വര്‍ഷം കെല്ലി സെക്സ് റാക്കറ്റ് പ്രവര്‍ത്തിപ്പിച്ചെന്ന് ജൂറി കണ്ടെത്തി. കറുത്ത വംശത്തില്‍ പെട്ട സ്ത്രീകളെയും കുട്ടികളെയും നിയമപരമല്ലാതെ ലൈംഗികവൃത്തിക്ക് ഉപയോഗിക്കല്‍, തട്ടിക്കൊണ്ടുപോകല്‍, നിര്‍ബന്ധിച്ച് ജോലി ചെയ്യിപ്പിക്കല്‍ തുടങ്ങി നിരവധി കുറ്റങ്ങള്‍ ഇതിന്റെ ഭാഗമായിരുന്നു.
2019 ജനുവരിയില്‍ ഒരു ചാനലില്‍ സംപ്രേഷണം ചെയ്ത 'സര്‍വൈവിങ് ആര്‍. കെല്ലി' എന്ന ഡോക്യുമെന്ററിയിലൂടെയാണ് ഇരകള്‍ തുറന്നുപറച്ചിലുകള്‍ നടത്തിയത്. ആര്‍ ആന്‍ഡ് ബി സംഗീത മേഖലയിലെ ഏറ്റവും മുന്‍നിര ഗായകനായ കെല്ലി നിരവധി സ്ത്രീകളെ പീഡിപ്പിച്ചിരുന്നു എന്ന് ഡോക്യുമെന്ററിയില്‍ പറയുന്നു. ആറ് ഭാഗങ്ങളായി സംപ്രേഷണം ചെയ്ത ഡോക്യുമെന്ററിയില്‍ വര്‍ഷങ്ങളായി കെല്ലിയില്‍ നിന്ന് പീഡനം ഏല്‍ക്കേണ്ടി വന്നു എന്ന് പലരും വെളിപ്പെടുത്തി.
അന്തരിച്ച ഗായികയും കെല്ലിയുടെ ആദ്യ ഭാര്യയുമായിരുന്ന ആലിയക്ക് കെല്ലിയില്‍ നിന്ന് നേരിടേണ്ടി വന്ന ദുരനുഭവങ്ങളും ഡോക്യുമെന്ററി പുറത്ത് കൊണ്ടുവന്നു. 1994ല്‍ 27 വയസുള്ളപ്പോഴാണ് 15 കാരിയായിരുന്ന ആലിയയെ കെല്ലി വിവാഹം കഴിച്ചത്. ഒരു വര്‍ഷം മാത്രമേ ദാമ്പത്യം നീണ്ടുനിന്നുള്ളൂ.വൈകാതെ ഇരുവരും വേര്‍പിരിഞ്ഞു. രണ്ട് ദശലക്ഷം ഡോളറിന്റെ സമ്പാദ്യമുള്ള സൂപ്പര്‍ സ്റ്റാര്‍ ആണ് ഇരുമ്പഴിക്കുള്ളിലേക്കു ചേക്കേറാന്‍ നിര്‍ബന്ധിതനാകുന്നത്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.