'പാടുന്ന മിഷനറി' ഫാ. ചാൾസ് വാസ് എസ്.വി.ഡി അന്തരിച്ചു

മുംബൈ: അന്ധേരിയിലെ മഹാകാളിയിലെ ആത്മദർശനിൽ താമസിച്ചിരുന്ന ഫാ. ചാൾസ് വാസ് എസ്.വി.ഡി(സൊസൈറ്റി ഓഫ് ഡിവൈൻ വേഡ്) അന്തരിച്ചു. 77 വയസായിരുന്നു. മൃത സംസ്കാര ശുശ്രൂഷകൾ നാളെ രാവിലെ 10 ന് മുംബൈ അന്ധേരി സേക്രഡ് ഹാർട്ട് പള്ളിയിൽ.

പാട്ടുകളിലൂടെയും നൃത്തത്തിലൂടെയും ദൈവാനുഭവം അവതരിപ്പിച്ചിരുന്ന അതുല്യ പ്രതിഭയായിരുന്നു അദ്ദേഹം. ഫാ. ചാൾസിനെ "ഒരു പാടുന്ന മിഷനറി" എന്നാണ് വിളിച്ചിരുന്നത്. "നൃത്ത മിഷനറി", " ഭജന ചൊല്ലുന്ന കത്തോലിക്കാ പുരോഹിതൻ", "നൃത്തത്തിലൂടെ ഒരു സുവിശേഷകൻ" എന്നിങ്ങനെ എല്ലാം അദ്ദേഹം അറിയപ്പെട്ടിരുന്നു.

1944 ഫെബ്രുവരി 12 ന് മംഗലാപുരം രൂപതയിലെ ഓംസൂർ ഇടവകയിൽ പരേതനായ ജേക്കബിന്റെയും പരേതനായ സെറാഫിൻ വാസിന്റെയും മകനായി ചാൾസ് ജനിച്ചു. മുംബൈയിൽ ഹൈക്കോടതി അഭിഭാഷകനായ ഒരു സഹോദരനും മൂന്ന് സഹോദരിമാരുമുണ്ട്. അദ്ദേഹത്തിന്റെ രണ്ട് സഹോദരിമാർ കന്യാസ്ത്രീകളാണ്.

അദ്ദേഹം സൊസൈറ്റി ഓഫ് ഡിവൈൻ വേഡ് (എസ്.വി.ഡി) യിൽ ചേർന്നു. വൈദികപഠനം തുടരുന്നതിനിടയിൽ, സെമിനാരിയിലെ തത്ത്വശാസ്ത്ര പഠനത്തിനിടെ ഗിറ്റാറിന്റെയും പിയാനോയുടെയും ചിട്ടയായ പഠനത്തിൽ അദ്ദേഹം സ്വയം ഏർപ്പെട്ടു. തത്ത്വശാസ്ത്ര പഠനത്തിന് ശേഷം, ഹിന്ദുസ്ഥാനി സംഗീതത്തിന്റെ മഹാനായ പണ്ഡിതനായ പണ്ഡിറ്റ് വിഷ്ണു ദിഗംബറിന്റെ ശിഷ്യനായ രാമകൃഷ്ണ ജോഷിയുടെ കീഴിൽ അദ്ദേഹം തന്റെ ഔപചാരിക പരിശീലനം ആരംഭിച്ചു.

ചാൾസ് വാസ് 1976-ൽ വൈദികനായി അഭിഷിക്തനായി. അതിനുശേഷം അദ്ദേഹം പഠനം തുടരുകയും മിറാജിലെ അഖില ഭാരതീയ ഗന്ധർവ്വ മഹാവിദ്യാലയത്തിൽ "ഈസ്റ്റ് മീറ്റ്സ് വെസ്റ്റ്" എന്ന തന്റെ "ഡോക്ടറൽ" തീസിസ് അവതരിപ്പിക്കുകയും 1983-ൽ സംഗീതത്തിൽ ഡോക്ടറേറ്റ് എടുക്കുകയും ചെയ്തു.

1980-ൽ മുംബൈയിൽ പാട്ടിന്റെയും നൃത്തത്തിന്റെയും സ്ഥാപനമായ സംഗീത് അഭിനയ് അക്കാദമി ആരംഭിച്ചു. ഫാ. വാസിന്റെ ആശയങ്ങൾ പ്രകടിപ്പിക്കാൻ കഴിവുള്ള ആവേശഭരിതരായ യുവാക്കളെ ഈ സ്ഥാപനം ആകർഷിച്ചു. രക്ഷയുടെ ചരിത്രത്തെക്കുറിച്ചുള്ള ബാലെ-സംഗീതമായ "പ്രേം രാഗിണി" ആയിരുന്നു ഫലം. ഇന്ത്യൻ ശൈലിയിലും പാശ്ചാത്യ ശൈലിയിലും കലാകാരന്മാർ നൃത്തം ചെയ്യുന്ന ബാലെ. "പ്രേം രാഗിണി" എന്ന സംഗീതത്തിന് ഇന്ത്യയിലും വിദേശത്തുമായി 500-ലധികം ഷോകൾ ഉണ്ടായിരുന്നു.

വിവിധ ഭാഷകളിലെ സഭാ ഗാനാലാപനത്തെ സമ്പന്നമാക്കിയ ഭക്തിസംഗീത-ഭജനകളുടെയും സ്തുതിഗീതങ്ങളുടെയും 40-ലധികം സിഡികൾ അദ്ദേഹം നിർമ്മിച്ചു. അദ്ദേഹത്തിന്റെ സംഗീതവും സ്തുതിഗീതങ്ങളും രാജ്യത്ത് പ്രത്യേകിച്ചും ഹിന്ദി സംസാരിക്കുന്ന പ്രദേശങ്ങളിൽ ഏറ്റവും ജനപ്രിയമായ ഭക്തിഗാനങ്ങളാണ്.

കവിയും സംഗീതസംവിധായകനും സംഗീതജ്ഞനും വിവിധ സംഗീത പരിപാടികളുടെ ഡയറക്ടറുമായിരുന്നു ഫാ.വാസ്. ഇന്ത്യയിലും വിദേശത്തും പ്രദർശിപ്പിച്ച നിരവധി ബാലെകളും സംഗീത നൃത്തങ്ങളും ഭജൻ പരിപാടികളും അദ്ദേഹത്തിന്റെ കഠിനാധ്വാനത്തിന്റെ ഫലമായിരുന്നു. സംഗീത-നൃത്ത മേഖലയിലെ മികവിനും മികച്ച സംഭാവനയ്ക്കും ഫാ. ചാൾസ് വാസ് 2006-ൽ "അലങ്കർ ശിരോമണി പുരസ്‌കാരം", 2008-ൽ കലാകാർ പുരസ്‌കാരം എന്നിവയ്ക്ക് അർഹനായി.