കോഴിക്കോട് : ഇടതുമുന്നണി ഘടകകക്ഷിയായ ഐഎന്‍എല്‍ പിളര്‍ന്നു. അബ്ദുള്‍ വഹാബ് പക്ഷം പുതിയ സംസ്ഥാന ഭാരവാഹികളെ പ്രഖ്യാപിച്ചു. ഭിന്നത രൂക്ഷമായതിനെ തുടര്‍ന്ന് ഐഎന്‍എല്‍ പ്രസിഡന്റ് അബ്ദുള്‍ വഹാബിന്റെ നേതൃത്വത്തിലുള്ള സംസ്ഥാന കമ്മിറ്റിയെ ദേശീയ നേതൃത്വം പിരിച്ചു വിട്ടിരുന്നു.
മന്ത്രി അഹമ്മദ് ദേവര്‍കോവില്‍ ചെയര്‍മാനായി ഏഴംഗ അഡ്‌ഹോക് കമ്മിറ്റിയും രൂപീകരിച്ചു. ദേശീയ നേതൃത്വത്തിന്റെ തീരുമാനത്തെ എതിര്‍ത്ത് അബ്ദുള്‍ വഹാബ് പക്ഷം രംഗത്തെത്തിയിരുന്നു. കോഴിക്കോട് ചേര്‍ന്ന യോഗത്തിലാണ് അബ്ദുള്‍ വഹാബ് പക്ഷം പുതിയ നേതൃത്വത്തെ പ്രഖ്യാപിച്ചത്.
എ പി അബ്ദുള്‍ വഹാബ് സംസ്ഥാന പ്രസിഡന്റായി തുടരും. നാസര്‍കോയ തങ്ങള്‍ (ജന.സെക്രട്ടറി), വഹാബ് ഷാജി (ട്രഷറര്‍) എന്നിവരാണ് മറ്റ് പ്രധാന അംഗങ്ങള്‍. സംസ്ഥാന കൗണ്‍സിലില്‍ 120 പേരാണുള്ളത്. ഇന്നു വിളിച്ചുചേര്‍ത്ത സംസ്ഥാന കൗണ്‍സില്‍ യോഗത്തില്‍ 75 കൗണ്‍സില്‍ അംഗങ്ങള്‍ പങ്കെടുത്തതായി അബ്ദുള്‍ വഹാബ് പക്ഷം അവകാശപ്പെട്ടു.
വഹാബ് പക്ഷവും കാസിം ഇരിക്കൂര്‍ വിഭാഗവും തമ്മിലുള്ള ഭിന്നത രൂക്ഷമാകുകയും കൊച്ചിയിലെ യോഗം അടിപിടിയില്‍ കലാശിക്കുകയും ചെയ്തിരുന്നു. മന്ത്രി അഹമ്മദ് ദേവര്‍കോവില്‍ ചെയര്‍മാനായി രൂപീകരിച്ച അഡ്‌ഹോക്ക് കമ്മിറ്റി ഉടന്‍ വിളിച്ചുചേര്‍ത്ത് അംഗത്വ വിതരണ നടപടികള്‍ തുടങ്ങാനാണ് മറുവിഭാഗത്തിന്റെ തീരുമാനം.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.