വാഷിംഗ്ടണ്‍: യു.എസിന്റെ ആദ്യ വനിതാ സ്റ്റേറ്റ് സെക്രട്ടറിയായിരുന്ന മാഡലിന്‍ ഓള്‍ബ്രൈറ്റ് (85) അന്തരിച്ചു. രണ്ടാം ലോകയുദ്ധത്തിനിടെ ചെക്കോസ്ലാവോക്യയിലെ നാസി അധിനിവേശത്തില്‍നിന്നു രക്ഷ തേടി യു.എസില്‍ അഭയം തേടിയ കുടുംബത്തിലെ അംഗമായ മാഡലിന്‍ ഓള്‍ബ്രൈറ്റ് ശക്തമായ നിലപാടുകളിലൂടെയും കാര്യക്ഷമതയിലൂടെയുമാണ് അമേരിക്കന്‍ വിദേശനയ മേധാവിയായി ലോക ശ്രദ്ധ പിടിച്ചുപറ്റിയത്.
ബില്‍ ക്ലിന്റന്‍ ഭരണകൂടത്തില്‍ ഐക്യരാഷ്ട്ര സംഘടനയിലെ യു. എസ് പ്രതിനിധിയായും (1993-97) തുടര്‍ന്ന് സ്റ്റേറ്റ് സെക്രട്ടറിയായും (1997-2001) മികവു തെളിയിച്ചു മാഡലിന്‍ ഓള്‍ബ്രൈറ്റ് . 1990കളിലെ ബാള്‍ക്കന്‍ യുദ്ധം, റുവാണ്ട കൂട്ടക്കൊല എന്നീ പ്രശ്‌നങ്ങളില്‍ യു.എസിന്റെ വിദേശനയ രൂപീകരണത്തില്‍ മുഖ്യപങ്കു വഹിച്ചു. ബോസ്‌നിയയില്‍ സെര്‍ബുകള്‍ നടത്തിയ കൂട്ടക്കൊലയ്‌ക്കെതിരെയും കര്‍ശന നിലപാടു സ്വീകരിച്ച ഓള്‍ബ്രൈറ്റ് സ്വന്തം തലമുറയിലെ ഏറ്റവും സ്വാധീനമുള്ള രാഷ്ട്രതന്ത്രജ്ഞയെന്ന പേരെടുത്തു.
മാഡലിന്‍ ഓള്‍ബ്രൈറ്റിന്റെ വിയോഗത്തില്‍ ദുഃഖം രേഖപ്പെടുത്തിക്കൊണ്ട് ബില്‍ ക്ലിന്റന്‍ പറഞ്ഞു: 'സ്വാതന്ത്ര്യത്തിനും ജനാധിപത്യത്തിനും മനുഷ്യാവകാശങ്ങള്‍ക്കും വേണ്ടി പ്രവര്‍ത്തനനിരതമായ മഹാ ശക്തിയായിരുന്നു ഓള്‍ബ്രൈറ്റ്.' സാമ്പ്രദായിക രീതികള്‍ക്കെതിരെ ശക്തമായ നിലപാടെടുത്തു അവരെന്ന് പ്രസിഡന്റ് ജോ ബൈഡന്‍ പറഞ്ഞു.'എല്ലാ റോളിലും, അമേരിക്കയുടെ ദേശീയ സുരക്ഷ മെച്ചപ്പെടുത്തുന്നതിനും ലോകമെമ്പാടുമുള്ള സമാധാനം പ്രോത്സാഹിപ്പിക്കുന്നതിനും അവര്‍ കൂര്‍മ്മ ബുദ്ധി പ്രയോഗിച്ചു.'സമാനതകളില്ലാത്ത വാഗ്‌വൈഭവമായിരുന്നു മാഡലിന്റേതെന്നും ബൈഡന്‍ ഓര്‍മ്മിച്ചു.
ആയുധ നിയന്ത്രണം, വ്യാപാരം, ഭീകരത, നാറ്റോയുടെ ഭാവി എന്നിവയെക്കുറിച്ച് ലോക നേതാക്കളുമായി നിര്‍ണായകമായ ചര്‍ച്ചകള്‍ക്ക് നേതൃത്വം നല്‍കി, ശീതയുദ്ധാനന്തര ലോകത്ത് അമേരിക്ക ഏക സൂപ്പര്‍ പവറായി ഉയര്‍ന്നുവന്ന വേളയിലാണ് ഓള്‍ബ്രൈറ്റ് സ്റ്റേറ്റ് ഡിപ്പാര്‍ട്ട്മെന്റിന്റെ ചുക്കാന്‍ പിടിച്ചത്. മാര്‍ഗരറ്റ് താച്ചര്‍ ബ്രിട്ടന്‍ ഭരിച്ചതിന് ശേഷം ഏറ്റവും ആഗോള സ്വാധീനമുള്ള സ്ത്രീയായി അവര്‍.മാഡലിന്‍ ഓള്‍ബ്രൈറ്റിനോടുള്ള ആദര സൂചകമായി ഐക്യരാഷ്ട്രസഭയില്‍, ഉക്രെയ്നുമായി ബന്ധപ്പെട്ട റഷ്യയുടെ നേതൃത്വത്തിലുള്ള പ്രമേയത്തില്‍ വോട്ടുചെയ്യുന്നതിന് മുമ്പ് സുരക്ഷാ കൗണ്‍സില്‍ ഒരു നിമിഷം മൗനം ആചരിച്ചു.
പുടിന്റേത് 'ചരിത്രപരമായ പിശക്'
1937 മെയ് 15 ന് ചെക്കോസ്ലോവാക്യയില്‍ ജനിച്ച മേരി ജാന കോര്‍ബെലോവ, 1948 ല്‍ കുടുംബത്തോടൊപ്പം അഭയാര്‍ത്ഥിയായാണ് അമേരിക്കയിലെത്തിയത്. 1957 ല്‍ യുഎസ് പൗരത്വം ലഭിച്ചു.നാസികളില്‍ നിന്ന് രക്ഷപ്പെടാന്‍ 1939-ല്‍ കുടുംബം ലണ്ടനിലേക്ക് പലായനം ചെയ്തതിന് ശേഷം മേരിയുടെ നയതന്ത്രജ്ഞനായ പിതാവ് ജോസഫ് കോര്‍ബെല്‍ യഹൂദമതത്തില്‍ നിന്ന് കത്തോലിക്കാ മതത്തിലേക്ക് പരിവര്‍ത്തനം ചെയ്യുകയായിരുന്നു.മാഡലിന്‍ 1959-ല്‍ ജോസഫ് ഓള്‍ബ്രൈബ്രൈറ്റിനെ വിവാഹം കഴിച്ചു. അവര്‍ക്ക് മൂന്ന് പെണ്‍മക്കളാണുള്ളത്. 1982-ല്‍ വിവാഹമോചനം നേടി.അവരുടെ ഓര്‍മ്മക്കുറിപ്പുകള്‍, 'മാഡം സെക്രട്ടറി', 2003 ല്‍ പ്രസിദ്ധീകരിച്ചു.
തന്റെ യഹൂദ ഉത്ഭവത്തെ കുറിച്ചും മൂന്ന് മുത്തശ്ശിമാര്‍ തടങ്കല്‍പ്പാളയത്തില്‍ മരണപ്പെട്ടതിനെ കുറിച്ചും മാത്രമാണ് ബാല്യത്തെപ്പറ്റിയുള്ള തന്റെ അറിവുകളെന്ന് ഓള്‍ബ്രൈറ്റ് പറയുമായിരുന്നു. ഇംഗ്ലീഷ്, ചെക്ക്, ഫ്രഞ്ച്, റഷ്യന്‍ ഭാഷകളില്‍ പ്രാവീണ്യമുള്ള ഓള്‍ബ്രൈറ്റ് വെല്ലസ്ലി കോളേജില്‍ നിന്ന് ബിരുദ ബിരുദം നേടി. കൊളംബിയ യൂണിവേഴ്‌സിറ്റിയില്‍ നിന്ന് പൊളിറ്റിക്കല്‍ സയന്‍സില്‍ ഡോക്ടറേറ്റ് നേടിയ അവര്‍ ഡെമോക്രാറ്റിക് സെനറ്റര്‍ എഡ്മണ്ട് മസ്‌കിക്ക് കീഴില്‍ കുറേക്കാലം ജോലി ചെയ്തു.
പിന്നീട് പ്രസിഡന്റ് ജിമ്മി കാര്‍ട്ടറിന്റെ കാലത്ത് വൈറ്റ് ഹൗസിലെ ദേശീയ സുരക്ഷാ കൗണ്‍സിലില്‍ ചേര്‍ന്നു. കൊളംബിയയിലെ മുന്‍ പ്രൊഫസറായ അദ്ദേഹത്തിന്റെ ദേശീയ സുരക്ഷാ ഉപദേഷ്ടാവ് ബ്രെസിന്‍സ്‌കിയുടെ കീഴില്‍ സേവനമനുഷ്ഠിച്ചു.കാര്‍ട്ടറിന്റെ തോല്‍വിക്ക് ശേഷം, ഓള്‍ബ്രൈറ്റ് വാഷിംഗ്ടണിലെ ജോര്‍ജ്ജ്ടൗണ്‍ യൂണിവേഴ്‌സിറ്റിയില്‍ പഠിപ്പിക്കാന്‍ തുടങ്ങി. ഇതിനിടെയും ഡെമോക്രാറ്റിക് വിദേശ നയ രൂപീകരണ ഗ്രൂപ്പില്‍ സ്വാധീനമുള്ള ശബ്ദമായി തുടര്‍ന്നു. അവരുടെ അവസാന ഔദ്യാഗിക യാത്രകളിലൊന്ന് ഉത്തര കൊറിയ സന്ദര്‍ശനമായിരുന്നു. അവിടെ അവര്‍ അന്നത്തെ നേതാവ് കിം ജോങ്-ഇലുമായി കൂടിക്കാഴ്ച നടത്തി.
ഐക്യരാഷ്ട്രസഭയിലെ പ്രവര്‍ത്തനത്തിനിടെ, സദ്ദാം ഹുസൈന്റെ ഇറാഖിലെ സ്റ്റേറ്റ് മീഡിയ ഓള്‍ബ്രൈറ്റിനെ ഒരു 'അസാധാരണ സര്‍പ്പത്തോട്' ഉപമിച്ചു. റഷ്യന്‍ നേതാവ് വ്ളാഡിമിര്‍ പുടിന്‍ ഉക്രെയ്ന്‍ ആക്രമിച്ചാല്‍ അത് 'ചരിത്രപരമായ പിശക്' ആയിരിക്കുമെന്ന് ഒരു മാസം മുമ്പ്, ന്യൂയോര്‍ക്ക് ടൈംസിനോടു സംസാരിക്കവേ അവര്‍ നിരീക്ഷിച്ചു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.