ആലപ്പുഴ: അന്തരിച്ച മലങ്കര ഓര്ത്തഡോക്സ് സഭ മുന്‍ വൈദിക ട്രസ്റ്റിയും, വൈദിക സെമിനാരി മുന്‍ പ്രിന്‍സിപ്പാളുമായ ഹരിപ്പാട് ചേപ്പാട് ഊടത്തില്‍ ഫാദര്‍ ഡോ. ഒ. തോമസിന്റെ സംസ്‌കാര ശുശ്രൂഷകള്‍ നാളെ. 70 വയസായിരുന്നു. തിങ്കളാഴ്ച രാത്രി ഹൃദയാഘാതത്തെ തുടര്‍ന്ന് ഹരിപ്പാട് ഹൃദയ ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല.
സംസ്‌കാര ശുശ്രൂഷയുടെ മൂന്നാം ക്രമം നാളെ 12.30ന് പരുമല ആശുപത്രി ചാപ്പലില്‍ പരിശുദ്ധ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവായുടെ മുഖ്യകാര്‍മ്മികത്വത്തില്‍ നടക്കും. ഉച്ചയ്ക്ക് 2.30ന് മാവേലിക്കര സെന്റ് പോള്‍സ് മിഷന്‍ സെന്ററിലും 3.30ന് ഹരിപ്പാട് സെന്റ് തോമസ് മിഷന്‍ സെന്ററിലും പൊതുദര്‍ശനത്തിനു വച്ചശേഷം 4.30ന് രാമപുരം ഭവനത്തില്‍ കൊണ്ടുവരും. നാളെ സ്വഭവനത്തില്‍ ജോഷ്വാ മാര്‍ നിക്കോദിമോസ് മെത്രാപ്പൊലീത്തായുടെയും അലക്‌സിയോസ് മാര്‍ യൗസേബിയോസ് മെത്രാപ്പോലീത്തായുടെയും മുഖ്യകാര്‍മ്മികത്വത്തില്‍ ശുശ്രൂഷകള്‍ നടക്കും.
മാവേലിക്കര പടിഞ്ഞാറേ തലയ്ക്കല്‍ എലിസബത്ത് തോമസാണ് സഹധര്‍മിണി.
മക്കള്‍: അരുണ്‍ തോമസ് ഉമ്മന്‍, അനില എല്‍സാ തോമസ്, അനിഷ സൂസന്‍ തോമസ്.
മരുമക്കള്‍: ടീമാ മേരി അരുണ്‍, ഫാ. ഡോ. തോമസ് ജോര്‍ജ്, റെജോ ജോസഫ് വര്‍ഗീസ്.
കോട്ടയം ഓര്ത്തഡോക്സ് തിയോളജിക്കല്‍ സെമിനാരിയിലെ ക്രിസ്ത്യന്‍ മിനിസ്ട്രിയുടെ പ്രിന്‍സിപ്പലും പ്രൊഫസറുമായ ഫാ. ഡോ. ഒ. തോമസ് കേരള സര്‍വകലാശാലയില്‍ നിന്ന് എം.എയും സെറാംപൂര്‍ സര്‍വകലാശാലയില്‍ നിന്ന് ബി.ഡി, എം.ടി.എച്ച്, ഡി.ടി.എച്ച്, പി.ഡി.പി.ടി എന്നീ ബിരുദങ്ങളും നേടിയിട്ടുണ്ട്. 'ജനങ്ങളുടെ പ്രതിസന്ധിയുമായി ബന്ധപ്പെട്ട് ഓര്ത്തഡോക്സ് സഭയുടെ ആത്മീയ വിഭവങ്ങള്‍' എന്നതാണ് അദ്ദേഹത്തിന്റെ ഡോക്ടറല്‍ പ്രബന്ധം.
മലങ്കര ഓര്ത്തഡോക്സ് സുറിയാനി സഭയുടെ നിയുക്ത ശുശ്രൂഷകനെന്ന നിലയിലും, മലങ്കര ഇന്ത്യന്‍ ഓര്ത്തഡോക്സ് സുറിയാനി സഭയുടെ വൈദിക സെക്രട്ടറി, ഓര്ത്തഡോക്സ് സണ്‍ഡേ സ്‌കൂള്‍ ഡയറക്ടര്‍, മാവേലിക്കര സെന്റ് പോള്‍സ് മിഷന്‍ പരിശീലന കേന്ദ്രത്തില്‍ ഫാക്കല്‍റ്റി എന്നീ നിലകളിലും സേവനം അനുഷ്ഠിച്ചു. പാസ്റ്ററല്‍ കെയറും കൗണ്‍സിലിങുമാണ് അദ്ദേഹത്തിന്റെ താല്‍പ്പര്യ മേഖല. അദ്ദേഹം അറിയപ്പെടുന്ന പ്രഭാഷകനും ഉപദേശകനുമാണ്.
1981 മുതല്‍ ഓര്ത്തഡോക്സ് തിയോളജിക്കല്‍ സെമിനാരിയില്‍ പ്രൊഫസറായിരുന്നു അദ്ദേഹം. കോട്ടയം എഫ്എഫ്ആര്‍ആര്‍സിയില്‍ ഗവേഷണ ഗൈഡും ഫാക്കല്‍റ്റിയുമായി തുടരുകയായിരുന്നു. ഓര്ത്തഡോക്സ് സിറിയന്‍ സണ്‍ഡേ സ്‌കൂള്‍ അസോസിയേഷന്‍ (OSSAE) ഡയറക്ടര്‍ ജനറല്‍, മലങ്കര ഓര്ത്തഡോക്സ് സഭയുടെ പ്രീസ്റ്റ് ട്രസ്റ്റി, ചര്‍ച്ച് വര്‍ക്കിങ് കമ്മിറ്റി അംഗം, സെന്റ് പോള്‍സ് മിഷന്‍ ട്രെയിനിങ് സെന്റര്‍ മാവേലിക്കര പ്രിന്‍സിപ്പല്‍, ഓര്ത്തഡോക്സ് ക്രിസ്ത്യന്‍ യൂത്ത് മൂവ്‌മെന്റ് (OCYM) ജനറല്‍ സെക്രട്ടറി എന്നീ നിലകളിലും പ്രവര്‍ത്തിച്ചു. കൂടാതെ കൗണ്‍സിലിങ്, അധ്യാപനം, പ്രസംഗം എന്നീ മേഖലകളിലും അദ്ദേഹം ശ്രദ്ധേയമായ സംഭാവനകള്‍ നല്‍കിയിട്ടുണ്ട്.
ഫാ. ഡോ. ഒ. തോമസ് കേരള സര്‍വ്വകലാശാലയില്‍ നിന്ന് സോഷ്യോളജിയില്‍ ബിരുദാനന്തര ബിരുദവും ലണ്ടനിലെ ഹെയ്‌ത്രോപ്പില്‍ നിന്ന് പ്രാക്ടിക്കല്‍ തിയോളജിയില്‍ ബിരുദാനന്തര ഡിപ്ലോമയും (പിഡിപിടി) പൂര്‍ത്തിയാക്കിയിട്ടുണ്ട്.
മലങ്കര ഓര്ത്തഡോക്സ് സഭയിലെ കൗണ്‍സിലിങ്ങില്‍ ആദ്യത്തെ ഡോക്ടറേറ്റ് നേടിയ വ്യക്തിയാണ് ഫാ. ഡോ. ഒ. തോമസ്. അദ്ദേഹത്തിന്റെ പ്രധാന അധ്യാപന മേഖല ക്രിസ്ത്യന്‍ മിനിസ്ട്രി - പാസ്റ്ററല്‍ കൗണ്‍സിലിങ്, മനശാസ്ത്രം, പ്രാക്ടിക്കല്‍ തിയോളജി, പാസ്റ്ററല്‍ കെയര്‍, കൗണ്‍സിലിങ്, സൂപ്പര്‍വൈസ്ഡ് പാസ്റ്ററല്‍ കൗണ്‍സിലിങ്, വിവാഹം -കുടുംബം എന്നീ വിഷയങ്ങളും ഉള്‍ക്കൊള്ളുന്നു.
1995ല്‍ ഓര്ത്തഡോക്സ് തിയോളജിക്കല്‍ സെമിനാരി മതം നോക്കാതെ, സാധാരണക്കാര്‍ക്കായി ഒരു കൗണ്‍സിലിങ് പഠന കേന്ദ്രമായ പ്രത്യാശ കൗണ്‍സിലിങ് സെന്റര്‍ ആരംഭിച്ചപ്പോള്‍ അതിന്റെ സ്ഥാപക ഡയറക്ടറായി അദ്ദേഹം നിയോഗിക്കപ്പെട്ടു. ഐതിഹാസിക ദൈവശാസ്ത്രജ്ഞനും ഓര്ത്തഡോക്സ് തിയോളജിക്കല്‍ സെമിനാരി പ്രിന്‍സിപ്പലുമായ ഡോ. പൗലോസ് മാര്‍ ഗ്രിഗോറിയോസ് മെത്രാപ്പോലീത്തയുടെ സ്വപ്നത്തിന്റെയും ദര്‍ശനത്തിന്റെയും പൂര്‍ത്തീകരണമായിരുന്നു അത്.
മാനസിക രോഗങ്ങളാല്‍ ബുദ്ധിമുട്ടുന്നവര്‍ക്കായി പരുമല സെമിനാരിയില്‍ എല്ലാ വെള്ളിയാഴ്ചകളിലും ഫാ. ഡോ. ഒ. തോമസിന്റെ കൗണ്‍സിലിങ് സേവനങ്ങള്‍ ഇപ്പോഴും നടത്തുന്നുണ്ടായിരുന്നു.
എട്ട് പുസ്തകങ്ങളും നൂറുകണക്കിന് ലേഖനങ്ങളും എഴുതിയിട്ടുള്ള അദ്ദേഹം ദൂതന്‍, സ്‌നേഹലോകം മാസികകളുടെ ദീര്‍ഘകാല ചീഫ് എഡിറ്ററും ആയിരുന്നു. അദ്ദേഹത്തിന്റെ വേര്‍പാടില്‍ ഇന്ത്യന്‍ ഓര്ത്തഡോക്സ് സഭ മീഡിയ വിങ് അനുശോചനം രേഖപ്പെടുത്തി.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.