മാർപാപ്പയുടെ ബഹറിൻ സന്ദർശനം സംവാദ കേന്ദ്രീകൃതം

വത്തിക്കാൻ :നവംബർ 3-6 തീയതികളിൽ പേർഷ്യൻ ഗൾഫ് രാജ്യമായ ബഹറിനിലേക്കുള്ള ഫ്രാൻസിസ് മാർപാപ്പയുടെ സന്ദർശനം ഏറെ ആവേശത്തോടെയാണ് അറബ് ലോകം കാണുന്നത്. ബഹ്‌റൈനിൽ കാലുകുത്തുന്ന ആദ്യത്തെ പോപ്പായി അദ്ദേഹം മാറുന്നു.
സംഭാഷണ കേന്ദ്രീകൃതമായിരിക്കും ഈ സന്ദർശനമെന്ന് വിശേഷിപ്പിച്ച പാപ്പാ, മാനവസഹവർത്തിത്വത്തിനായി കിഴക്കും പടിഞ്ഞാറും പരസ്പരം കൂടുതൽ കണ്ടുമുട്ടുകയെന്ന അനിവാര്യമായ ആവശ്യകത പ്രമേയമാക്കിയുള്ള ബഹറിൻ സമ്മേളനത്തിൽ താൻ പങ്കെടുക്കുമെന്നും വിവിധ മത പ്രതിനിധികളുമായി, പ്രത്യേകിച്ച് മുസ്ലീങ്ങളുമായി സംവദിക്കാൻ തനിക്ക് അവസരം ലഭിക്കുമെന്നും വെളിപ്പെടുത്തി.
എല്ലാ കൂടിക്കാഴ്ചകളും പരിപാടികളും സാഹോദര്യത്തിനും സമാധാനത്തിനും വേണ്ടിയുള്ള പ്രവർത്തനങ്ങളെ ദൈവനാമത്തിൽ പിന്തുണയ്ക്കാനുള്ള ഫലപ്രദമായ അവസരമായി ഭവിക്കുന്നതിന് പ്രാർത്ഥനയാൽ തന്നെ അനുഗമിക്കണമെന്ന് പാപ്പാ അഭ്യർത്ഥിക്കുകയും സഹോദര്യത്തിനും സമാധാനത്തിനും വേണ്ടിയുള്ള പ്രവർത്തനങ്ങൾ നമ്മുടെ കാലഘട്ടത്തിൻറെ അത്യന്താപേക്ഷിതവും അടിയന്തിരവുമായ ആവശ്യമാണെന്ന് പ്രസ്താവിക്കുകയും ചെയ്തു.
2013-ൽ മാർപാപ്പയായതിനുശേഷം ഫ്രാൻസിസിന്റെ ഇറ്റലിക്ക് പുറത്തുള്ള 39-ാമത്തെ യാത്രയെ അടയാളപ്പെടുത്തുന്ന ബഹ്‌റൈനിൽ 1.8 ദശലക്ഷം ആളുകൾ താമസിക്കുന്നു. രാജ്യത്തെ 70% ജനങ്ങളും മുസ്ലീങ്ങളാണ്.അവരിൽ മൂന്നിൽ രണ്ട് ഭാഗവും ഷിയാകളാണ്. "മനുഷ്യ സാഹോദര്യം" എന്ന രേഖയെ ഔദ്യോഗികമായി അംഗീകരിച്ച സുന്നി മുസ്ലീമായ ബഹ്‌റൈനിലെ രാജാവായ ഹമദിൽ നിന്നാണ് മാർപാപ്പക്ക് സന്ദര്ശനത്തിനുള്ള ക്ഷണം ലഭിക്കുന്നത്.
ഇന്നുവരെ, മുസ്‌ലിം ലോകത്ത് പാപ്പാ ഫ്രാൻസിസിന്റെ ഇടപെടലുകളിൽ ഭൂരിഭാഗവും സുന്നികളോടായിരുന്നു, കൂടാതെ ഷിയാ ഭൂരിപക്ഷ രാജ്യത്തിലേക്കുള്ള അദ്ദേഹത്തിന്റെ സന്ദർശനം തന്റെ സമാധാനത്തിനായുള്ള സാന്നിധ്യം വർദ്ധിപ്പിക്കാനുള്ള അവസരം നൽകും.