ഉക്രെയ്ൻ യുദ്ധത്തിൽ ഇറാൻ റഷ്യയ്ക്ക് വലിയ സൈനിക പിന്തുണ നൽകുന്നുവെന്ന് അമേരിക്ക

വാഷിംഗ്ടൺ: റഷ്യയും ഇറാനും തമ്മിലുള്ള ബന്ധം പ്രതിരോധ പങ്കാളിത്തത്തിലേക്ക് കടക്കുകയാണെന്ന് അമേരിക്ക. ഇതുവരെ കണ്ടിട്ടില്ലാത്ത രീതിയിലുള്ള സൈനിക പിന്തുണയാണ് ഇറാൻ റഷ്യയ്ക്ക് നൽകുന്നതെന്നും അമേരിക്കൻ ദേശീയ സുരക്ഷാ കൗൺസിൽ വക്താവ് ജോൺ കിർബി പറഞ്ഞു.

കനത്ത പ്രഹരശേഷിയുള്ള ഡ്രോണുകളുടെ സംയുക്ത നിര്‍മാണം ഇരു രാജ്യങ്ങളും ആലോചിക്കുന്നതായുള്ള റിപ്പോർട്ടുകൾ ലഭിച്ചതായും അമേരിക്ക വ്യക്തമാക്കി. എന്നാല്‍ അമേരിക്കയുടെ പുതിയ ആരോപണങ്ങള്‍ ഇറാന്‍ തള്ളി. അതേസമയം ഉക്രെയ്ൻ അധിനിവേശത്തിന് മുമ്പ് റഷ്യയ്ക്ക് ഡ്രോണുകൾ നൽകിയിരുന്നതായി ഇറാൻ സമ്മതിക്കുകയും ചെയ്തു.

റഷ്യയും ഇറാനും തമ്മിലുള്ള സഹകരണത്തെക്കുറിച്ച് അടുത്തിടെ ഉക്രെയ്ൻ ഊന്നിപ്പറഞ്ഞിരുന്നു. ഇറാന്റെ ഡ്രോണുകള്‍ റഷ്യ ഉക്രെയ്നില്‍ ആക്രമണത്തിന് ഉപയോഗിച്ചിരുന്നുവെന്നും ഹെലികോപ്റ്ററുകളും വ്യോമ പ്രതിരോധ സംവിധാനങ്ങളും ഉൾപ്പെടെയുള്ള നൂതന സൈനിക സേവനങ്ങൾ ഇറാന് നൽകാൻ റഷ്യ ഉദ്ദേശിക്കുന്നതായി ഉക്രെയ്ന്‍ പ്രസിഡന്റ് വ്ളോഡിമിര്‍ സെലന്‍സ്കി നേരത്തെ ആരോപിച്ചിരുന്നു.

കൂടാതെ ഉക്രെയ്‌നെതിരെ ഉപയോഗിക്കാൻ റഷ്യയ്ക്ക് ഡ്രോൺ വിതരണം ചെയ്യുന്നതിനായി മൂന്ന് ഇറാനികൾക്കും ഒരു ഇറാനിയൻ ബിസിനസ്സിനും അനുമതി നൽകിയതായി റിപ്പോർട്ടുകൾ ലഭിച്ചിരുന്നതായി ഓസ്‌ട്രേലിയയും വ്യക്തമാക്കിയിരുന്നു.

റഷ്യയിലേക്കുള്ള ഡ്രോണുകളുടെ വിതരണം ആഗോള സുരക്ഷയെ അസ്ഥിരപ്പെടുത്തുന്നതിൽ ഇറാൻ വഹിക്കുന്ന പങ്കിന്റെ തെളിവാണെന്ന് ഓസ്‌ട്രേലിയയുടെ വിദേശകാര്യ മന്ത്രി പെന്നി വോംഗ് ഒരു പ്രസ്താവനയിൽ വ്യക്തമാക്കിയിരുന്നു. കൂടാതെ റഷ്യയ്ക്ക് ഭൗതിക പിന്തുണ നൽകുന്നവർക്ക് അനന്തരഫലങ്ങൾ നേരിടേണ്ടിവരുമെന്ന് അവർ മുന്നറിയിപ്പ് നൽകുകയും ചെയ്തു.

ഡ്രോണുകൾ നിർമ്മിക്കുന്നതിനായി ഇറാനും റഷ്യയും തമ്മിലുള്ള പങ്കാളിത്തം ഉക്രെയ്‌നും ഇറാന്റെ അയൽരാജ്യങ്ങൾക്കും അന്താരാഷ്ട്ര സമൂഹത്തിനും ഹാനികരമാകുമെന്ന് കിർബി പറഞ്ഞു. ഇറാൻ റഷ്യയുടെ പ്രധാന സൈനിക പിന്തുണ നല്കുന്നവരിൽ ഒരു രാജ്യമായി മാറിയെന്നും അവർ തമ്മിലുള്ള ബന്ധം ആഗോള സുരക്ഷയ്ക്ക് ഭീഷണിയാണെന്നും കിർബിയുടെ അഭിപ്രായത്തിന് മറുപടിയായി ബ്രിട്ടന്റെ വിദേശകാര്യ സെക്രട്ടറി ജെയിംസ് ക്ലെവർലി പറഞ്ഞു.

ഇരു രാജ്യങ്ങളും തമ്മിലുള്ള ഹീനമായ ഇടപാടുകളുടെ അടിസ്ഥാനത്തിൽ ഇറാൻ നൂറുകണക്കിന് ഡ്രോണുകൾ റഷ്യയിലേക്ക് അയച്ചതായി അദ്ദേഹം പറഞ്ഞു. നൂറുകണക്കിന് ബാലിസ്റ്റിക് മിസൈലുകൾ ഉൾപ്പെടെ കൂടുതൽ ആയുധങ്ങൾ റഷ്യ കൈവശപ്പെടുത്താൻ ശ്രമിക്കുമ്പോൾ വരും മാസങ്ങളിൽ റഷ്യൻ സൈന്യത്തിനുള്ള ഇറാന്റെ പിന്തുണ വർദ്ധിക്കും.

ഇറാനിയൻ ഭരണകൂടം നൽകുന്ന സഹായങ്ങൾക്ക് പകരമായി റഷ്യ അവർക്ക് സൈനികവും സാങ്കേതികവുമായ പിന്തുണ വാഗ്ദാനം ചെയ്യുന്നു. ഇത് മിഡിൽ ഈസ്റ്റിലെ മറ്റ് രാജ്യങ്ങൾക്കും അന്താരാഷ്ട്ര സുരക്ഷയ്ക്കും ഉയർത്തുന്ന അപകടസാധ്യത വർദ്ധിപ്പിക്കുമെന്നും ക്ലെവർലി കൂട്ടിച്ചേർത്തു.

ഉക്രെയ്ന്‍-റഷ്യ യുദ്ധത്തിന്റെ പശ്ചാത്തലത്തില്‍ ഇറാന്റെ പങ്കാളിത്തം മനസിലാക്കിയ ബ്രിട്ടനും കഴിഞ്ഞ ദിവസം ഈ രാജ്യത്തിനെതിരെ നടപടി സ്വീകരിച്ചിരുന്നു. മനുഷ്യാവകാശ ലംഘനത്തിന്റെ പേരില്‍ റഷ്യയിലെയും ഇറാനിലെയും ഉദ്യോഗസ്ഥര്‍ ഉള്‍പ്പെടെ ലോകമെമ്പാടുമുള്ള 30 പേര്‍ക്കെതിരെ ബ്രിട്ടന്‍ ഉപരോധം ഏർപ്പെടുത്തിയിരുന്നു. റഷ്യക്ക് ഡ്രോണുകള്‍ വിതരണം ചെയ്ത ഇറാനെതിരെ യൂറോപ്യന്‍ യൂണിയന്‍ ഉപരോധം ഏര്‍പ്പെടുത്തണമെന്ന് ഫ്രാന്‍സ് ആവശ്യപ്പെട്ടതിന് തൊട്ടു പിന്നാലെയായിരുന്നു ബ്രിട്ടന്റെ നീക്കം.

റഷ്യയുടെ പിന്തുണയിൽ ഇറാൻ കള്ളം പറയുകയാണെന്ന് സെലൻസ്‌കിയും ആരോപിച്ചു. ഉക്രെയ്നുമായി ബന്ധപ്പെട്ട റഷ്യ-ഇറാൻ ബന്ധം പുതിയ അപകടങ്ങൾ ഉയർത്തുന്നതായും അദ്ദേഹം ചൂണ്ടിക്കാണിച്ചു.

ആയുധ വികസനം, പരിശീലനം തുടങ്ങിയ മേഖലകളിൽ ഇറാനുമായി സഹകരിക്കാൻ റഷ്യ ശ്രമിക്കുന്നു. ഹെലികോപ്റ്ററുകളും വ്യോമ പ്രതിരോധ സംവിധാനങ്ങളും ഉൾപ്പെടെയുള്ള നൂതന സൈനിക ഘടകങ്ങൾ ഇറാന് നൽകാൻ റഷ്യ ഉദ്ദേശിക്കുന്നതായി അമേരിക്ക ഭയപ്പെടുന്നുവെന്നും സെലൻസ്‌കി പറഞ്ഞു.

റഷ്യയ്ക്ക് ഏറ്റവും മികച്ച സൈനിക പിന്തുണ നല്കുന്നവരായി ഇറാൻ മാറി. ഉക്രെയ്ന്റെ ഊർജ്ജ നിലയങ്ങൾ ആക്രമിക്കാൻ റഷ്യ ഇറാനിയൻ ഡ്രോണുകൾ ഉപയോഗിക്കുന്നു. ദശലക്ഷക്കണക്കിന് ഉക്രെനിയക്കാർക്ക് വൈദ്യുതി, ചൂട്, നിർണായക സേവനങ്ങൾ എന്നിവ നഷ്ടപ്പെടുത്തുന്നു. ഇറാന്റെ പ്രവർത്തനങ്ങളുടെ ഫലമായി ഇന്ന് ഉക്രെയ്നിലെ ആളുകൾ യഥാർത്ഥത്തിൽ മരിക്കുകയാണെന്നും സെലൻസ്‌കി വിശദീകരിച്ചു.

ഒക്‌ടോബർ 17 ന് കുറഞ്ഞത് എട്ട് പേർ കൊല്ലപ്പെട്ട തുടർച്ചയായ ആക്രമണ പരമ്പരയിൽ ഉപയോഗിച്ച "കാമികേസ്" ഡ്രോണുകൾ ഇറാൻ റഷ്യയ്ക്ക് നൽകിയതായി ഉക്രെയ്ൻ ആരോപിച്ചു. ഇത് ആദ്യം നിഷേധിച്ച ഇറാൻ പിന്നീട് ഉക്രെയ്നിലെ യുദ്ധത്തിന് "ഏറെ മാസങ്ങൾ" മുമ്പ് റഷ്യയിലേക്ക് "പരിമിതമായ എണ്ണത്തിൽ" ഡ്രോണുകൾ അയച്ചതായി സമ്മതിച്ചു.

എന്നാൽ ഇറാൻ നുണ പറയുകയാണെന്നും ഒരു ദിവസം 10 ഇറാനിയൻ ഡ്രോണുകൾ ഉക്രെയ്ൻ വെടിവെച്ചിടുകയാണെന്നും ഉക്രെയ്ൻ പ്രസിഡന്റ് പറഞ്ഞു.