പുതിയ പാര്‍ലമെന്റിന്റെ ദൃശ്യങ്ങള്‍ പുറത്തു വിട്ട് കേന്ദ്ര സര്‍ക്കാര്‍; മയിലും താമരയും ആല്‍മരവും പ്രമേയമാക്കിയുള്ള നിര്‍മാണം

പുതിയ പാര്‍ലമെന്റിന്റെ ദൃശ്യങ്ങള്‍ പുറത്തു വിട്ട് കേന്ദ്ര സര്‍ക്കാര്‍; മയിലും താമരയും ആല്‍മരവും പ്രമേയമാക്കിയുള്ള നിര്‍മാണം

ന്യൂഡല്‍ഹി: വിവാദങ്ങള്‍ക്കും വാദ പ്രതിവാദങ്ങള്‍ക്കുമിടെ പ്രധാനമന്ത്രി നരേന്ദ്ര മോഡി ഞായറാഴ്ച ഉദ്ഘാടനം ചെയ്യുന്ന പുതിയ പാര്‍ലമെന്റ് മന്ദിരത്തിന്റെയും അകത്തളങ്ങളുടെയും ദൃശ്യങ്ങള്‍ പുറത്തു വിട്ട് കേന്ദ്ര സര്‍ക്കാര്‍.

ദേശീയ ചിഹ്നങ്ങളായ മയിലും താമരയും ആല്‍മരവും പ്രമേയമാക്കിയുള്ള വിശാലമായ ഹാളുകളും അത്യാധുനിക ആശയ വിനിമയ സാങ്കേതിക വിദ്യകള്‍ ഘടിപ്പിച്ച ഇരിപ്പിടങ്ങളും മുറികളും വിസ്മയ കാഴ്ചകളാണ്.


ലോക്സഭാ ചേംബര്‍ ദേശീയ പക്ഷിയായ മയിലിനെ പ്രമേയമാക്കിയും രാജ്യസഭാ ചേംബര്‍ ദേശീയ പുഷ്പമായ താമരയുടെ മാതൃകയിലുമാണ്. ദേശീയ വൃക്ഷമായ ആല്‍മരത്തിന്റെ വശ്യത പകരുന്ന മുറ്റത്തിന് അനുബന്ധമായാണ് സെന്‍ട്രല്‍ ലോഞ്ച് സൃഷ്ടിച്ചിരിക്കുന്നത്. ബിമല്‍ ബസ്മുഖ് പട്ടേല്‍ രൂപ കല്‍പ ചെയ്ത പുതിയ പാര്‍ലമെന്റ് മന്ദിരം ടാറ്റ പ്രൊജക്ടസ് ആണ് നിര്‍മിച്ചിട്ടുള്ളത്.

പ്രതിപക്ഷം ബഹിഷ്‌കരണം പ്രഖ്യാപിച്ചിട്ടുള്ള പുതിയ പാര്‍ലമെന്റിന്റെ ഉദ്ഘാടനത്തിന് വിപുലമായ പരിപാടികളാണ് കേന്ദ്ര സര്‍ക്കാര്‍ ആസൂത്രണം ചെയ്തിരിക്കുന്നത്.


രാവിലെ 7.30 മുതല്‍ ഒമ്പത് വരെ പൂജ നടക്കും. ഇതിന് ശേഷം ഉച്ചയോടെയാകും പ്രധാനമന്ത്രി പുതിയ പാര്‍ലമെന്റ് രാജ്യത്തിന് സമര്‍പ്പിക്കുക. പൂജയില്‍ പ്രധാനമന്ത്രി നരേന്ദ്ര മോഡി, ലോക്സഭാ സ്പീക്കര്‍ ഓം ബിര്‍ല എന്നിവരും മറ്റ് ഉന്നത ഉദ്യോഗസ്ഥരും പങ്കെടുക്കും.

രാവിലെ 11:30 ഓടെ വിഷിഷ്ടാതിഥികള്‍ ഉള്‍പ്പെടെ എല്ലാ ക്ഷണിതാക്കളും പുതിയ കെട്ടിടത്തിലെ ലോക്‌സഭാ ചേംബറില്‍ എത്തിച്ചേരും. 12 മണിയോടെ ആരംഭിക്കുന്ന ഉദ്ഘാടന ചടങ്ങ് ഉച്ചയ്ക്ക് 1.30 ഓടെ അവസാനിക്കുന്ന തരത്തിലാണ് ആസൂത്രണം ചെയ്തിരിക്കുന്നത്. പ്രധാനമന്ത്രി സെന്‍ട്രല്‍ ഹാളില്‍ ചെങ്കോല്‍ സ്ഥാപിക്കും. ഇതിന് ശേഷം പ്രധാനമന്ത്രിയും സ്പീക്കറും ഇവിടെ സദസിനെ അഭിസംബോധന ചെയ്യും.




വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26

ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.