തിരുവനന്തപുരം: സംസ്ഥാനത്ത് പകര്ച്ച പനി പ്രതിരോധത്തിന്റെ ഭാഗമായി കോള് സെന്റര് ആരംഭിച്ചു. നിലവിലെ ദിശ കോള് സെന്റര് ശക്തിപ്പെടുത്തിയാണ് എല്ലാ ജില്ലകളില് നിന്നുമുള്ള ഡോക്ടര്മാരുടേയും സേവനങ്ങള് ഉള്പ്പെടുത്തി പ്രത്യേക കോള് സെന്റര് പ്രവര്ത്തന സജ്ജമാക്കിയത്. 104, 1056, 0471 2 552 056, 2 551 056 എന്നീ നമ്പരുകളില് ദിശയുടെ സേവനങ്ങള് 24 മണിക്കൂറും ലഭ്യമാണ്.
ദിശയിലെ കൗണ്സിലര്മാര്, ഡോക്ടര്മാര്, ഇ സഞ്ജീവനി ഡോക്ടര്മാര് എന്നിവരെ കൂടാതെ എല്ലാ ജില്ലകളില് നിന്നും ജില്ലാ സര്വയലന്സ് ഓഫീസര്മാരുടെ നേതൃത്വത്തില് കൂടുതല് ഡോക്ടര്മാരുടെ സേവനവും ലഭ്യമാക്കിയിട്ടുണ്ട്.
ഡെങ്കിപ്പനി, എലിപ്പനി, എച്ച്1 എന്1, സിക്ക, ശ്വാസകോശ രോഗങ്ങള്, വയറിളക്ക രോഗങ്ങള് തുടങ്ങിയ രോഗങ്ങളുമായി ബന്ധപ്പെട്ട സംശയങ്ങള്ക്ക് മറുപടി നല്കും. അതോടൊപ്പം, സ്വീകരിക്കേണ്ട മുന്കരുതലുകള്, മരുന്നിനെപ്പറ്റിയുള്ള സംശയം, ഏതൊക്കെ ഭക്ഷണം കഴിക്കാം, പരിശോധനാ ഫലത്തെപ്പറ്റിയുള്ള സംശയം, മാനസിക പിന്തുണ, രോഗപ്പകര്ച്ച തടയുക തുടങ്ങിയ വിഷയങ്ങളില് വിദഗ്ധ ഡോക്ടര്മാര് മറുപടി നല്കും.
കൂടാതെ, വീട്ടിലുള്ളവര്ക്ക് പെട്ടന്നൊരു അത്യാഹിതമോ രോഗ മൂര്ച്ഛയോ ഉണ്ടായാല് ദിശ നമ്പരിലേക്ക് വിളിക്കാം. ഉടനടി ചെയ്യേണ്ട പ്രഥമ ശുശ്രൂഷ ഡോക്ടര്മാര് പറഞ്ഞു തരും. ആവശ്യമായവര്ക്ക് ഇ സഞ്ജീവനി മുഖേന ചികിത്സയും മരുന്നിന്റെ വിവരങ്ങളും ലഭ്യമാക്കും.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26