തിരുവനന്തപുരം: സംസ്ഥാനത്തെ ഡ്രൈവിങ് ടെസ്റ്റ് വ്യവസ്ഥകള് പരിഷ്കരിച്ച് മോട്ടോര് വാഹന വകുപ്പ് പുതിയ സര്ക്കുലര് പുറത്തിറക്കി. കാര് ലൈസന്സിന് ഓട്ടോമാറ്റിക് ഗിയറുള്ള കാറുകളോ ഇലക്ട്രിക് കാറുകളോ ഉപയോഗിക്കാന് പാടില്ലെന്നും ഇരുചക്ര വാഹനങ്ങളുടെ ടെസ്റ്റിന് കാലില് ഗിയറുള്ള വാഹനം ഉപയോഗിക്കണമെന്നും പുതിയ സര്ക്കുലറില് പറയുന്നു.
15 വര്ഷത്തില് കൂടുതല് പഴക്കമുള്ള വാഹനങ്ങള് ടെസ്റ്റിന് ഉപയോഗിക്കാന് പാടില്ല. വാഹനങ്ങളുടെ റോഡ് ടെസ്റ്റ് റോഡില് തന്നെ നടത്തണം. ടെസ്റ്റ് കേന്ദ്രങ്ങളില് തന്നെ റോഡ് ടെസ്റ്റ് നടത്തുന്നത് നിയമ വിരുദ്ധമാകും. വിവിധ തരത്തില് വാഹനം പാര്ക്ക് ചെയ്യാനുള്ള പരിശോധനയും സര്ക്കുലറില് നിര്ദേശിക്കുന്നുണ്ട്.
ഇരുചക്രവാഹനങ്ങളുടെ ടെസ്റ്റ് റെക്കോര്ഡ് ചെയ്ത് സൂക്ഷിക്കണം. ഡ്രൈവിംഗ് സ്കൂളുകള് കൊണ്ടു വരുന്ന കാറുകള്ക്ക് ഡാഷ് ക്യാമറ നിര്ബന്ധമാകും. ടെസ്റ്റും ക്യാമറയില് റെക്കോര്ഡ് ചെയ്യണം. ലൈസന്സ് ടെസ്റ്റിന് ശേഷം ഈ ക്യാമറയുടെ മെമ്മറി കാര്ഡ് ബന്ധപ്പെട്ട ഉദ്യോഗസ്ഥന് വാങ്ങി വീഡിയോ സേവ് ചെയ്ത് സൂക്ഷിക്കണമെന്നും സര്ക്കുലറില് പറയുന്നു. പുതിയ മാറ്റങ്ങള് മെയ് ഒന്ന് മുതല് പ്രാബല്യത്തില് വരും.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26