കൊച്ചി: കരുവന്നൂര് സഹകരണ ബാങ്ക് തട്ടിപ്പ് കേസിലെ പ്രതികളില് നിന്നും കണ്ടുകെട്ടിയ തുക നിക്ഷേപകര്ക്ക് കൈമാറാമെന്ന് ഇഡി കോടതിയെ അറിയിച്ചു. 54 പ്രതികളുടെ പക്കല് നിന്നും കണ്ടുകെട്ടിയ 108 കോടിയുടെ സ്വത്തുക്കള് നിക്ഷേപകര്ക്ക് വിട്ടു നല്കുന്നതില് എതിര്പ്പില്ലെന്നാണ് ഇ.ഡി വ്യക്തമാക്കിയത്.
നിക്ഷേപകരില് ചിലര് നല്കിയ ഹര്ജി പരിഗണിക്കുമ്പോഴാണ് ഇ.ഡി പിഎംഎല്എ കോടതിയില് നിലപാട് അറിയിച്ചത്. പിടിച്ചെടുത്ത തുക ശരിയായ നിക്ഷേപകര് തന്നെയെന്ന് കോടതിക്ക് ബോധ്യപ്പെടുന്നവര്ക്ക് തിരിച്ചു നല്കാനുള്ള നടപടിക്രമങ്ങള് കോടതിക്ക് സ്വീകരിക്കാമെന്നും ഇ.ഡി അറിയിച്ചു.
പ്രതികളില് നിന്നും കണ്ടുകെട്ടിയ തുക നിക്ഷേപകര്ക്ക് നല്കാന് പിഎംഎല്എ നിയമത്തിലെ പുതിയ ഭേദഗതി പ്രകാരം അവസരമുണ്ട്. പ്രതികളില് നിന്നും കണ്ടുകെട്ടിയ തുകയില് നിന്നും തങ്ങളുടെ നിക്ഷേപ തുക അനുവദിച്ചു തരണമെന്ന് ആവശ്യപ്പെട്ടാണ് നിക്ഷേപകര് കോടതിയെ സമീപിച്ചത്.
പ്രധാനമന്ത്രി നരേന്ദ്ര മോഡി കുന്ദംകുളത്ത് തിരഞ്ഞെടുപ്പ് പ്രചാരണ പരിപാടിയില് കരുവന്നൂര് വിഷയം പരാമര്ശിച്ചതിന് പിന്നാലെയാണ് ഇ.ഡിയുടെ പുതിയ നീക്കമെന്നത് ശ്രദ്ധേയമാണ്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26