ന്യൂഡല്‍ഹി: ഇന്ത്യയിലെ അതിസമ്പന്നരായ ഗൗതം അദാനിയെയും മുകേഷ് അംബാനിയെയും സഹായിക്കാനാണ് മോഡിയെ ദൈവം അയച്ചതെന്ന പരിഹാസവുമായി രാഹുല്‍ ഗാന്ധി. തന്നെ ദൈവം നേരിട്ട് ഭൂമിയിലേക്ക് അയച്ചതാണെന്ന പ്രധാനമന്ത്രി നരേന്ദ്ര മോഡിയുടെ വിവാദ പ്രസ്താവനയെപ്പറ്റി പ്രതികരിക്കുകയായിരുന്നു അദേഹം.
കര്‍ഷകരെയും തൊഴിലാളികളെയും സേവിക്കാനല്ല നരേന്ദ്ര മോഡിയെ ദൈവം അയച്ചതെന്നും രാഹുല്‍ പറഞ്ഞു. എല്ലാവരുടെയും ജനനം ജൈവികമാണ്. എന്നാല്‍ മോഡിയുടേത് അങ്ങനെയല്ല. അദാനിയെയും അംബാനിയെയും സഹായിക്കാനാണ് പരമാത്മാവ് മോഡിയെ അയച്ചത്. പരമാത്മാവാണ് അയച്ചതെങ്കില്‍ മോഡി പാവപ്പെട്ടവരെയും കര്‍ഷകരെയും സഹായിക്കുമായിരുന്നെന്നും രാഹുല്‍ പറഞ്ഞു.
ഇതെന്ത് ദൈവമാണെന്ന് തനിക്കറിയില്ല. ഇതാണ് മോഡിയുടെ ദൈവമെന്നും രാഹുല്‍ പരിഹസിച്ചു. ഉത്തര്‍പ്രദേശിലെ ഡിയോറിയയിലെ റാലിയില്‍ പങ്കെടുത്ത് സംസാരിക്കുകയായിരുന്നു അദേഹം. ഇന്ത്യ മുന്നണി അധികാരത്തിലെത്തിയാല്‍ അഗ്‌നിപഥിന്റെ സ്ഥാനം ചവറ്റുകുട്ടയിലാകുമെന്നും രാഹുല്‍ പറഞ്ഞു.
ഒരു ദേശീയ ചാനലിന് നല്‍കിയ അഭിമുഖത്തിലായിരുന്നു പ്രധാനമന്ത്രിയുടെ വിവാദ പ്രസ്താവന. അമ്മയുടെ മരണ ശേഷമാണ് തന്റെ ജനനം ജൈവീകമായിരുന്നില്ലെന്ന് മനസിലായത്. പിന്നീടുള്ള അനുഭവങ്ങള്‍ ശ്രദ്ധിച്ചാല്‍ താന്‍ ദൈവത്താല്‍ അയച്ചതാണെന്ന് തനിക്ക് ബോധ്യമുണ്ട്. ഈ ശക്തി തന്റെ ശരീരത്തില്‍ നിന്നല്ല. ദൈവം തന്നതാണെന്നായിരുന്നു മോഡിയുടെ പ്രസ്താവന.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.