പെര്‍ത്ത്: ഓസ്‌ട്രേലിയന്‍ നഗരമായ പെര്‍ത്തില്‍ കാറും ബൈക്കും കൂട്ടിയിടിച്ചുണ്ടായ അപകടത്തില്‍ മലയാളി യുവാവിന് ആകസ്മിക മരണം. പെര്‍ത്തിലെ കാനിങ് വെയിലില്‍ താമസിക്കുന്ന റോയല്‍ തോമസ്-ഷീബ ദമ്പതികളുടെ മകന്‍ ആഷിനാണ് (24) ഇന്നലെ രാത്രിയില്‍ വാഹനാപകടത്തില്‍ മരിച്ചത്. പെര്‍ത്തിലെ മലയാളികള്‍ക്ക് കണ്ണീരിന്റെ നനവുള്ള ക്രിസ്തുമസ് നല്‍കിയാണ് യുവാവിന്റെ ആകസ്മിക മരണമുണ്ടായത്.
ഞായറാഴ്ച്ച രാത്രി പെര്‍ത്ത് സമയം 11.15നായിരുന്നു അപകടം. കാനിങ്ങ് വെയില്‍ നിക്കോള്‍സണ്‍ റോഡില്‍ കാറും ബൈക്കും കൂട്ടിയിടിച്ച് ബൈക്ക് യാത്രികനായ ആഷിന്‍ തല്‍ക്ഷണം മരിക്കുകയായിരുന്നു. യുവാവിന്റെ വീടിനു സമീപമാണ് അപകടമുണ്ടായ സ്ഥലം. ആഷിനെയും കാര്‍ ഡ്രൈവറെയും റോയല്‍ പെര്‍ത്ത് ആശുപത്രിയില്‍ പ്രവേശിപ്പിച്ചെങ്കിലും ബൈക്ക് യാത്രികനായ ആഷിന്‍ സംഭവ സ്ഥലത്ത് വച്ച് തന്നെ മരിച്ചതായി ആശുപത്രി വൃത്തങ്ങളെ ഉദ്ധരിച്ച് ഓസ്‌ട്രേലിയന്‍ മാധ്യമമായ 'വെസ്റ്റ് ഓസ്‌ട്രേലിയന്‍' റിപ്പോര്‍ട്ട് ചെയ്തു.
അപകടമുണ്ടായ സ്ഥലം
പാലാ തീക്കോയി സ്വദേശിയാണ് ആഷിന്റെ പിതാവ് റോയല്‍. പനക്കക്കുഴി കുടുംബാംഗമാണ്. പെര്‍ത്തിലെ ആദ്യകാല മലയാളി കുടിയേറ്റക്കാരില്‍ ഒരാളാണ് റോയല്‍. ഐന്‍സ് റോയല്‍ ഏക സഹോദരനാണ്. ആഷിന്റെ മാതാപിതാക്കളും സഹോദരനും അവധിക്കായി കേരളത്തില്‍ എത്തിയപ്പോഴാണ് ദുരന്ത വാര്‍ത്ത തേടിയെത്തിയത്.
ഏതാനും വര്‍ഷം മുമ്പായിരുന്നു ആഷിക് പെര്‍ത്തിലെ ഫ്‌ളൈയിങ് ക്ലബില്‍ പരിശീലനം പൂര്‍ത്തിയാക്കി പൈലറ്റ് ലൈസന്‍സ് സ്വന്തമാക്കിയത്. പൈലറ്റ് ലൈസന്‍സ് കിട്ടിയ ശേഷം കുടുംബത്തെ ഉള്‍പ്പെടെ വിമാനത്തില്‍ കയറ്റി ഓടിക്കുന്ന വീഡിയോ വൈറലായിരുന്നു.
അയര്‍ലന്‍ഡില്‍ ഡബ്ലിനിലായിരുന്നു റോയല്‍ തോമസും കുടുംബവും ആദ്യമുണ്ടായിരുന്നത്. അയര്‍ലന്‍ഡിലെ 10 വര്‍ഷത്തോളം നീണ്ട ജീവിതത്തിനു ശേഷം 12 വര്‍ഷം മുമ്പാണിവര്‍ ഓസ്‌ട്രേലിയയില്‍ കുടിയേറിയത്. ഓസ്‌ട്രേലിയയിലെ പെര്‍ത്ത് സെന്റ് ജോസഫ് സിറോ മലബാര്‍ ഇടവകാംഗമാണ് ആഷിന്റെ കുടുംബം.
അയര്‍ലന്‍ഡ്, ഓസ്‌ട്രേലിയന്‍ മലയാളികളുടെ ഇടയില്‍ സുപരിചിതമായ കുടുംബം ആയിരുന്നു റോയല്‍ തോമസിന്റേത്. പെര്‍ത്തിലെ മലയാളികള്‍ക്ക് വലിയ ഞെട്ടലായിരിക്കുകയാണ് ആഷിന്റെ മരണവാര്‍ത്ത.
കഴിഞ്ഞ ദിവസമായിരുന്നു പെര്‍ത്തിലെ മലയാളി പ്രവാസി ചാലക്കുടി മേലൂര്‍ സ്വദേശി മല്‍പ്പാന്‍ ജോസഫ് ഹൃദയാഘാതം മൂലം മരിച്ചത്. വെള്ളിയാഴ്ചയായിരുന്നു ജോസഫിന്റെ സംസ്‌കാരം. ജോസഫിന്റെ വിയോഗത്തിന്റെ ദുഖം വിട്ടുമാറുന്നതിനു മുന്‍പാണ് യുവാവിന്റെ ആകസ്മിക മരണമുണ്ടായത്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.