തിരുവനന്തപുരം: സര്‍ക്കാര്‍ നിര്‍ദേശ പ്രകാരം ആശാ വര്‍ക്കര്‍മാര്‍ നാഷണല്‍ ഹെല്‍ത്ത് മിഷന്‍ ഡയറക്ടറുമായി നടത്തിയ ചര്‍ച്ച പരാജയപ്പെട്ടതിന് പിന്നാലെ ആരോഗ്യ മന്ത്രിയുടെ നേതൃത്വത്തില്‍ നടന്ന ചര്‍ച്ചയും വിജയിച്ചില്ല.
ഇതോടെ സമരം ശക്തമാക്കുന്നതിന്റെ ഭാഗമായി നാളെ മുതല്‍ അനശ്ചിതകാല നിരാഹാരം തുടങ്ങുമെന്ന് ആശാ വര്‍ക്കര്‍മാര്‍ അറിയിച്ചു.
സമരം അവസാനിപ്പിക്കണം, സര്‍ക്കാരിന് സാമ്പത്തിക പ്രതിസന്ധിയുണ്ട് എന്നതിനപ്പുറത്തേക്ക് സമരം പരിഹരിക്കുന്നതിനാവശ്യമായ ചര്‍ച്ചകളൊന്നും ഉണ്ടായില്ല. ആരോഗ്യ മന്ത്രി ചര്‍ച്ചയ്ക്ക് വിളിച്ചത് ആശമാരില്‍ നേരിയ പ്രതീക്ഷ ഉയര്‍ത്തിയിരുന്നു. എന്നാല്‍ നിരാശയായിരുന്നു ഫലം.
ചര്‍ച്ച നല്ല രീതിയില്‍ അവസാനിക്കണമെങ്കില്‍ ഇത്രയും ദിവസം തങ്ങളെ ഇവിടെ ഇതുപോലെ കിടത്തേണ്ട കാര്യമില്ലായിരുന്നല്ലോ എന്ന് ആശാ പ്രവര്‍ത്തകര്‍ പ്രതികരിച്ചു. നിങ്ങളെന്ത് ചെയ്താലും ഞങ്ങള്‍ ഒന്നും തരില്ല എന്ന് ഉറപ്പിച്ചാണ് മുഖ്യമന്ത്രി ആശാ പ്രവര്‍ത്തകരായ തങ്ങളോട് ഇങ്ങനെ പ്രവര്‍ത്തിക്കുന്നത്. പക്ഷേ കിട്ടാനുള്ളത് വാങ്ങിയിട്ടേ പോകൂ എന്നും അവര്‍ പറഞ്ഞു.
സമരം തുടങ്ങി 38 ദിവസം പിന്നിടുമ്പോഴാണ് സര്‍ക്കാര്‍ ചര്‍ച്ചയ്ക്ക് വിളിച്ചത്. ഓണറേറിയം വര്‍ധിപ്പിക്കണമെന്ന പ്രധാന ആവശ്യം ഉന്നയിച്ചാണ് ആശാ വര്‍ക്കര്‍മാര്‍ സമരത്തിനിറങ്ങിയത്. ഓണറേറിയം വര്‍ധിപ്പിക്കുന്നതിന് പുറമേ പെന്‍ഷന്‍ അനുവദിക്കുക, കുടിശിക നല്‍കുക തുടങ്ങിയ ആവശ്യങ്ങളാണ് ആശമാര്‍ മുന്നോട്ടുവെച്ചത്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.