തിരുവനന്തപുരം: ബുധനാഴ്ച നടക്കുന്ന ദേശീയ പണിമുടക്കിന് മുന്നോടിയായി ഡയസ്നോണ്‍ പ്രഖ്യാപിച്ച് സംസ്ഥാന സര്‍ക്കാര്‍. ജോലിക്കെത്താത്ത ജീവനക്കാര്‍ക്ക് ശമ്പളം ഉണ്ടാവില്ല. സമരം നടക്കുന്ന ദിവസത്തെ ശമ്പളം ഓഗസ്റ്റ് മാസത്തെ ശമ്പളത്തില്‍ നിന്നാണ് തടഞ്ഞുവെയ്ക്കുക. രോഗം, പരീക്ഷകള്‍, പ്രസവം പോലുള്ള അത്യാവശ്യങ്ങള്‍ക്കല്ലാതെ അവധി അനുവദിക്കില്ലെന്ന് സര്‍ക്കാര്‍ പുറത്തിറക്കിയ സര്‍ക്കുലറില്‍ പറയുന്നു.
വ്യക്തിയുടെയോ അടുത്ത ബന്ധുക്കളുടെയോ അസുഖം (ജീവനക്കാരന്റെ ഭാര്യ, ഭര്‍ത്താവ്, കുട്ടികള്‍, അച്ഛന്‍, അമ്മ എന്നിവരെയാണ് അടുത്ത ബന്ധു എന്നതുകൊണ്ട് ഉദ്ദേശിക്കുന്നത്), ജീവനക്കാര്‍ക്കുള്ള പരീക്ഷകള്‍, പ്രസവം പോലുള്ള ഒഴിവാക്കാനാവാത്ത കാരണങ്ങള്‍ ഉള്ളവര്‍ക്ക് മാത്രമേ അവധിയുള്ളൂ.അല്ലാത്തവര്‍ക്ക് പണിമുടക്ക് ദിവസം ഒരുതരത്തിലുള്ള അവധിയും അനുവദിക്കുന്നതല്ലെന്ന് സര്‍ക്കാര്‍ ഉത്തരവില്‍ പറയുന്നു.
അക്രമങ്ങളില്‍ ഏര്‍പ്പെടുന്നവര്‍ക്കും പൊതു മുതല്‍ നശിപ്പിക്കുന്നവര്‍ക്കുമെതിരെ കേസെടുക്കും. സര്‍ക്കാര്‍ സര്‍വീസില്‍ നിന്ന് അനുമതിയില്ലാതെ വിട്ടുനില്‍ക്കുന്ന താല്‍കാലിക ജീവനക്കാരെ സര്‍വീസില്‍ നിന്ന് നീക്കം ചെയ്യുമെന്നും ഉത്തരവില്‍ പറയുന്നു. സര്‍ക്കാര്‍ ജീവനക്കാര്‍ക്ക് ജോലിയില്‍ പ്രവേശിക്കാന്‍ ആവശ്യമായ വാഹനങ്ങള്‍ സര്‍വീസ് നടത്തുന്നുണ്ടെന്ന് കെഎസ്ആര്‍ടിസി മാനേജിങ് ഡയറക്ടറും അതതു ജില്ലാ കളക്ടര്‍മാരും ഉറപ്പിക്കണം.
സര്‍ക്കാര്‍ ഓഫീസുകളിലേക്കും സ്ഥാപനങ്ങളിലേക്കും തടസമില്ലാതെ പ്രവേശനം ഉറപ്പാക്കാന്‍ കളക്ടര്‍മാര്‍, വകുപ്പ് മേധാവികള്‍, ജില്ലാ പൊലീസ് മേധാവി എന്നിവര്‍ നടപടികള്‍ സ്വീകരിക്കണമെന്നും നിര്‍ദേശമുണ്ട്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.