തിരുവനന്തപുരം: പല ജില്ലകളിലും മഴ പെയ്യുന്നുണ്ടെങ്കിലും സംസ്ഥാനത്ത് തുലാവര്‍ഷം എത്തിയിട്ടില്ലെന്ന് കാലാവസ്ഥാ വകുപ്പ്. അടുത്ത 24 മണിക്കൂറിനുള്ളില്‍ കാലവര്‍ഷം പിന്‍വാങ്ങിയേക്കും. തെക്കുപടിഞ്ഞാറന്‍ കാലവര്‍ഷം പിന്‍വാങ്ങി വടക്കുകിഴക്കന്‍ കാലവര്‍ഷം (തുലാവര്‍ഷം) എത്തുന്നത് ഒക്ടോബറിലാണ്.
തുലാവര്‍ഷത്തിന് മുന്നോടിയായി ചക്രവാതച്ചുഴിയും ന്യൂനമര്‍ദപാത്തിയും രൂപപ്പെടുന്നതിന് പുറമേ, കാറ്റിന്റെ അനുകൂല സാഹചര്യവും വേണം. അതേസമയം അറബിക്കടലില്‍ ലക്ഷദ്വീപ് പ്രദേശങ്ങള്‍ക്ക് മുകളില്‍ ചക്രവാതച്ചുഴി രൂപപ്പെട്ടതായി കാലാവസ്ഥ വകുപ്പ് വ്യക്തമാക്കി. ഇതിന്റെ സ്വാധീനത്താല്‍ കേരളം, തെക്കന്‍ കര്‍ണാടക തീരങ്ങള്‍ക്ക് സമീപമുള്ള ലക്ഷദ്വീപ് പ്രദേശങ്ങളില്‍ ന്യൂനമര്‍ദ മേഖല ഞായറാഴ്ചയോടെ രൂപപ്പെടാന്‍ സാധ്യതയുണ്ട്.
ഇന്ന് ചില സ്ഥലങ്ങളില്‍ അതിശക്തമായ മഴയ്ക്കു സാധ്യതയുള്ളതിനാല്‍ കോട്ടയം, ഇടുക്കി ജില്ലകളില്‍ ഓറഞ്ച് അലര്‍ട്ടും തിരുവനന്തപുരം, കൊല്ലം, പത്തനംതിട്ട, ആലപ്പുഴ, എറണാകുളം, തൃശൂര്‍, മലപ്പുറം ജില്ലകളില്‍ യെല്ലോ അലര്‍ട്ടുമാണ്. തെക്കന്‍ ജില്ലകളില്‍ രാവിലെ മുതല്‍ മഴ ലഭിക്കുന്നുണ്ട്. അടുത്ത മൂന്ന് മണിക്കൂര്‍ (നിര്‍ദേശം പുറപ്പെടുവിച്ചത് രാവിലെ 7:15 ന്) തിരുവനന്തപുരം, കൊല്ലം, പത്തനംതിട്ട ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചിരുന്നു. ഒറ്റപ്പെട്ടയിടങ്ങളില്‍ ഇടിമിന്നലോട് കൂടിയ ഇടത്തരം മഴ ലഭിക്കുമെന്നും മുന്നറിയിപ്പില്‍ പറയുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.