വിശുദ്ധതയുടെ ആഘോഷം വത്തിക്കാനിൽ; ഏഴ് വാഴ്ത്തപ്പെട്ടവരെ വിശുദ്ധരായി പ്രഖ്യാപിച്ച് ലിയോ മാർപാപ്പ

വത്തിക്കാൻ സിറ്റി: ലോകത്തിന്റെ നാല് ഭൂഖണ്ഡങ്ങളിൽ നിന്നുള്ള ഏഴ് വാഴ്ത്തപ്പെട്ടവരെ വിശുദ്ധ പദവിയിലേക്ക് ഉയര്‍ത്തി ലിയോ പതിനാലാമൻ മാർപാപ്പ. ഇന്ന് സെന്റ് പീറ്റേഴ്സ് ബസിലിക്കയിൽ നടന്ന ദിവ്യ ബലിക്കും തിരുക്കർമ്മങ്ങൾക്കും ലിയോ പാപ്പ നേതൃത്വം നൽകി. ചരിത്രപ്രാധാന്യമേറിയ ചടങ്ങിൽ ആയിരക്കണക്കിന് വിശ്വാസികൾ പങ്കെടുത്തു.

ഏഴു പേരുടെയും വിശുദ്ധ പ്രഖ്യാപന ഫോർമുല ലാറ്റിൻ ഭാഷയിൽ പാപ്പ വായിച്ചത് ഹർഷാരവത്തോടെയാണ് വിശ്വാസികൾ സ്വീകരിച്ചത്. ചടങ്ങിനോടനുബന്ധിച്ച് ലോകമെമ്പാടുമുള്ള ദേവാലയങ്ങളിൽ മണികൾ മുഴങ്ങി.

അര്‍മേനിയന്‍ രക്തസാക്ഷിയായ ആര്‍ച്ച് ബിഷപ്പ് ‍ ഇഗ്നേഷ്യസ് മലയാൻ ഉൾപ്പടെ നാല് പുരുഷന്മാരും മൂന്ന് സ്ത്രീകളും ഉൾപ്പെടുന്ന സംഘത്തിൽ രണ്ട് രക്തസാക്ഷികളും മൂന്ന് സാധാരണക്കാരും സന്യാസ സമൂഹങ്ങളുടെ സ്ഥാപകരായ രണ്ട് പേരും ഉൾപ്പെടുന്നു. പാപുവ ന്യൂ ഗിനിയയിലെ ആദ്യത്തെ വിശുദ്ധനും വെനിസ്വേലയിൽ നിന്നുള്ള ആദ്യത്തെ രണ്ട് വിശുദ്ധരും അവരിൽ ഉൾപ്പെടുന്നു

വത്തിക്കാനിലെ ഈ വിശുദ്ധ പ്രഖ്യാപനം സഭയുടെ സർവത്വത്വത്തെ പ്രതിനിധാനം ചെയ്യുന്ന ചടങ്ങായി കണക്കാക്കപ്പെടുന്നു. യൂറോപ്പ്, തെക്കേ അമേരിക്ക, ഏഷ്യ, ഒഷ്യാനിയ എന്നീ ഖണ്ഡങ്ങളിൽ നിന്നുള്ള പ്രതിനിധികൾ ഒരുമിച്ച് പങ്കെടുത്തത് ഈ ആഘോഷത്തെ ആഗോള മതമൈത്രിയുടെ പ്രതീകമാക്കി.

“ഈ വിശുദ്ധന്മാർ കരുണയുടെയും ധൈര്യത്തിന്റെയും ജീവസാക്ഷികളാണ്. വിശുദ്ധത അകലെയുള്ളതല്ല, ഓരോരുത്തരുടെയും ജീവിതത്തിലെ സേവനത്തിലും ത്യാഗത്തിലും ദൈവസാന്നിധ്യം അനുഭവിക്കാം.” ലിയോ പാപ്പ പറഞ്ഞു.

വിശുദ്ധ ജോസ് ഗ്രിഗോറിയോ ഹെർണാണ്ടസ് സിസ്‌നെറോസ്

‘പാവങ്ങളുടെ ഡോക്ടർ’ എന്നറിയപ്പെടുന്ന ഹെർണാണ്ടസ് 1864 ഒക്ടോബർ 26 ന് വെനിസ്വേലയിലെ ട്രൂജില്ലോ സംസ്ഥാനത്താണ് ജനിച്ചത്. രോഗികളെയും ദരിദ്രരെയും സേവിച്ച ജീവിതം അദേഹത്തെ ജനമനസിൽ ദൈവമനുഷ്യനാക്കി. 1919 ൽ ഒരു രോഗിയ്ക്ക് മരുന്ന് വാങ്ങാൻ പോകുമ്പോൾ അപകടത്തിൽപ്പെട്ടു മരിച്ചു.

2017 ൽ ഒരു പെൺകുട്ടിയുടെ അത്ഭുതപരമായ രോഗശാന്തിയാണ് അദേഹത്തിന്റെ വാഴ്ത്തപ്പെട്ട പദവിക്ക് ആധാരമായത്. 2025 ൽ വത്തിക്കാൻ രണ്ടാമത്തെ അത്ഭുതം ആവശ്യമായില്ലെന്ന് തീരുമാനിച്ച് വിശുദ്ധ പദവിക്ക് അംഗീകാരം നൽകി. ഇതോടെ ഡോ. ജോസ് ഗ്രിഗോറിയോ ഹെർണാണ്ടസ് വെനിസ്വേലയുടെ ആദ്യ വിശുദ്ധനായി മാറി.

വിശുദ്ധ മദർ കാർമെൻ റെൻഡൈൽസ് മാർട്ടിനെസ്

1903 ൽ കാരക്കാസിൽ ജനിച്ച മദർ കാർമെൻ ‘യേശുവിന്റെ സേവകരുടെ സഭ’ സ്ഥാപിച്ചു.1977 ല്‍ അന്തരിച്ച മദര്‍ കാര്‍മെന്റെ മധ്യസ്ഥതയില്‍ 2003 ല്‍ സംഭവിച്ച ഒരു വെനിസ്വേലന്‍ ഡോക്ടറുടെ രോഗശാന്തി വാഴ്ത്തപ്പെട്ട പദവി പ്രഖ്യാപനത്തിനായി വത്തിക്കാന്‍ അംഗീകരിച്ചു. 2018 ല്‍ ‘ഇഡിയൊപാത്തിക് ട്രൈവെന്‍ട്രിക്കുലാര്‍ ഹൈഡ്രോസെഫാലസ്’ ബാധിച്ച ഒരു യുവതിയുടെ രോഗശാന്തി വത്തിക്കാന്‍ അംഗീകരിച്ചതോടെ
വെനിസ്വേലയിലെ ആദ്യ വനിതാ വിശുദ്ധ എന്ന വിശേഷണം മദർ കാർമെൻ റെൻഡൈൽസ് മാർട്ടിനെസിന് ലഭിച്ചു.

വിശുദ്ധ പീറ്റർ ടോ റോട്ടു

1912 ൽ പാപ്പുവ ന്യൂ ഗിനിയയിൽ ജനിച്ച പീറ്റർ ആ രാജ്യത്തിന്റെ ആദ്യ വിശുദ്ധനും രക്തസാക്ഷിയുമാണ്. രണ്ടാം ലോകമഹായുദ്ധ കാലത്ത് ജാപ്പനീസ് അധിനിവേശത്തിനിടെ വിശ്വാസം സംരക്ഷിക്കാൻ പ്രവർത്തിച്ചു. വിവാഹത്തിന്റെ പവിത്രത സംരക്ഷിച്ചുവെന്ന ‘അപരാധം’ ചുമത്തി 1945 ൽ അദേഹത്തെ വധിച്ചു.

വിശുദ്ധ മരിയ ട്രോൺകാറ്റി

1883 ൽ ഇറ്റലിയിലെ ബ്രെസിയയിൽ ജനിച്ച മരിയ ട്രോൺകാറ്റി സലേഷ്യൻ സന്യാസിനിയായിരുന്നു. ഒന്നാം ലോകമഹായുദ്ധത്തിൽ റെഡ് ക്രോസ് നഴ്സായി സേവനം അനുഷ്ഠിച്ച അവർ പിന്നീട് ഇക്വഡോറിൽ മിഷനറി ജീവിതം നയിച്ചു. ഇക്വഡോറിലെ ഒരു ഗ്രാമത്തില്‍ നിന്നുള്ള കര്‍ഷകനും മരപ്പണിക്കാരനുമായ വ്യക്തിക്ക് ലഭിച്ച് അത്ഭുത സൗഖ്യമാണ് മരിയ ട്രോന്‍കാറ്റിയുടെ വിശുദ്ധപദവി പ്രഖ്യാപനത്തിനായി വത്തിക്കാന്‍ അംഗീകരിച്ച അത്ഭുതം. അദ്ദേഹത്തിന്റെ തലയോട്ടിക്ക് ആഴത്തിലുള്ള ക്ഷതം സംഭവിച്ച് പക്ഷാഘാതം ഉണ്ടായി. തുടര്‍ന്ന് സംസാര ശേഷിയും നഷ്ടപ്പെട്ടു. അദേഹം സുഖം പ്രാപിക്കുമെന്ന് സ്വപ്‌നത്തില്‍ സിസ്റ്റര്‍ മരിയ ഉറപ്പു നല്‍കി. ആ വാഗ്ദാനം അനുസരിച്ച് പുലര്‍ച്ചെയോടെ സംസാരിക്കാനും വീണ്ടും നടക്കാനും തുടങ്ങി.

വിശുദ്ധ വിസെൻസ മരിയ പോളോണി

1802 ൽ വെറോണയിൽ ജനിച്ച വിസെൻസ പോളോണി ‘സിസ്റ്റേഴ്സ് ഓഫ് മേഴ്സി’ സ്ഥാപിച്ചു. രോഗികളെയും അഗതികളെയും സേവിച്ച ജീവിതം നയിച്ച അവർ 1855 ൽ അന്തരിച്ചു. വൈദ്യശാസ്ത്രത്തെ അത്ഭുതപ്പെടുത്തിക്കൊണ്ട് ശസ്ത്രക്രിയയ്ക്കിടെ കടുത്ത രക്തസ്രാവത്തില്‍ നിന്ന് സുഖം പ്രാപിച്ച ചിലിയന്‍ സ്ത്രീ ഔഡെലിയ പാരയുടെ രോഗസൗഖ്യമാണ് അവരുടെ വിശുദ്ധപദവിക്ക് ആധാരമായത്.

വിശുദ്ധ ബാർട്ടോലോ ലോംഗോ

സാത്താനിക ആചാരങ്ങളും ആരാധന രീതികളും പിന്തുടര്‍ന്ന സാത്താനിക പുരോഹിതനായി പ്രവര്‍ത്തിച്ചശേഷം മാനസാന്തരപ്പെട്ട് കത്തോലിക്ക സഭയുടെ വിശുദ്ധരുടെ ഗണത്തിലേക്ക് കൂട്ടിച്ചേര്‍ക്കപ്പെടുന്ന ബാര്‍ട്ടോലോ ലോംഗോ അനിതരസാധരണനായ വിശുദ്ധനാണ്. ഡൊമിനിക്കന്‍ മൂന്നാം സഭാംഗമായി മാറിയ ബാര്‍ട്ടോലോ ലോംഗോ, പോംപൈയിലെ (ഇറ്റലി) ഔവര്‍ ലേഡി ഓഫ് ദ റോസറി കൂട്ടായ്മ സ്ഥാപിച്ചു. ദരിദ്രരെ സഹായിക്കുന്നതിനായി സ്വയം സമര്‍പ്പിച്ച ബാര്‍ട്ടോലോ ലോംഗോ 20-ാം നൂറ്റാണ്ടിലെ ജപമാല ഭക്തിയുടെ ഏറ്റവും വലിയ പ്രചാരകരില്‍ ഒരാളായും അംഗീകരിക്കപ്പെടുന്നു.

വിശുദ്ധ ഇഗ്‌നേഷ്യസ് മലോയാൻ

1869 ൽ തുര്‍ക്കിയിലെ മർദിനിൽ ജനിച്ച അർമേനിയൻ കത്തോലിക്ക ആർച്ച്‌ ബിഷപ്പാണ് ഇഗ്‌നേഷ്യസ് മലോയാൻ. വിശ്വാസം ഉപേക്ഷിച്ച് ഇസ്ലാമിലേക്ക് പരിവര്‍ത്തനം ചെയ്യാനുള്ള തുര്‍ക്കികളുടെ ഉത്തരവിനെ നിരാകരിച്ച ആര്‍ച്ച് ബിഷപ്പിനെ 1915 ല്‍ ഓട്ടോമാന്‍ സൈന്യം വധിച്ചു. വിശ്വാസത്തിനു വേണ്ടി രക്തസാക്ഷിത്വം വരിച്ച ആര്‍ച്ച് ബിഷപ്പ് ഇഗ്നേഷ്യോ മലോയാനെ വിശുദ്ധനായി പ്രഖ്യാപിക്കുവാന്‍ ഫ്രാന്‍സിസ് മാര്‍പാപ്പ 2025 മാര്‍ച്ചില്‍ അനുവാദം നല്‍കിയിരുന്നു.