മയാമി: അമേരിക്കന്‍ മലയാളികളുടെ ക്രൈസ്തവ ആത്മീയ യാത്രക്ക് പുത്തന്‍ അധ്യായം കുറിച്ചാണ് മലയാളി കത്തോലിക്ക വൈദിക സമ്മേളനത്തിന് മയാമിയില്‍ തിരിതെളിഞ്ഞത്.
ഇന്ത്യന്‍-അമേരിക്കന്‍ സമൂഹം ഉള്‍പ്പെടെ അമേരിക്കയിലെ കത്തോലിക്ക സമൂഹത്തിനായി അമേരിക്കയില്‍ ഉടനീളം ഇന്ന് അഞ്ഞൂറോളം മലയാളി കത്തോലിക്ക വൈദികര്‍ ആത്മീയ അജപാലന ശുശ്രൂഷകളും അതോടൊപ്പം വിവിധ മേഖലകളിലും വൈദികര്‍ സേവനം ചെയ്തു വരുന്നു.
കേരളത്തിന്റെ ആഴമേറിയ ആത്മീയ വിശ്വാസ പാരമ്പര്യവും ഇന്ത്യന്‍ കത്തോലിക്ക സഭാ അനുഷ്ഠാനങ്ങളും ചേരുന്ന സീറോ മലബാര്‍, സീറോ മലങ്കര, ലാറ്റിന്‍ റീത്തുകളും, ക്നാനായ സഭയും, വിവിധ സന്ന്യാസി സമൂഹങ്ങളും കോണ്‍ഗ്രിഗേഷനുകളില്‍ നിന്നുമുള്ള വൈദികരുമാണ് ചിക്കാഗോ സീറോ മലബാര്‍ രൂപതയുടെ രജത ജൂബിലി ആഘോഷങ്ങളുടെ ഭാഗമായി ഇദംപ്രഥമമായി സംഘടിപ്പിക്കപ്പെട്ട അമേരിക്കന്‍ മലയാളി കത്തോലിക്ക വൈദിക മഹാസംഗമത്തില്‍ പങ്കെടുത്തത്.
'കൊയ്‌നോനിയ 2025' എന്ന് പേര് നല്‍കിയ ഈ വൈദിക സമ്മേളനം, വിശ്വാസ-ആത്മീയ ഐക്യത്തിന്റേയും ഭക്തിയുടേയും കൂട്ടായ ബലിയര്‍പ്പണത്തിന്റേയും സഹവര്‍ത്തിത്വത്തിന്റേയും കലാസാംസ്‌കാരിക-വൈഭവ സമന്വയത്തിന്റേയും അസാമാന്യമായ ഒരു മഹോത്സവമായി തീര്‍ന്നു.
നവംബര്‍ 18, 19 തിയതികളിലായി നടന്ന ഈ സമ്മേളനത്തില്‍ നൂറ്റി അമ്പതോളം വൈദികര്‍ പങ്കെടുത്തു. നവംബര്‍ 18-ാം തിയതി ചൊവ്വാഴ്ച വൈന്നേരം അഞ്ചിന് കോറല്‍ സ്പ്രിങ്‌സ് സെന്റ് എലിസബത്ത് ആന്‍ സെറ്റണ്‍ കാത്തലിക് ചര്‍ച്ച് മൈതാനത്ത് എത്തിച്ചേര്‍ന്ന മയാമി ആര്‍ച്ച് ബിഷപ്പ് തോമസ് വെന്‍സ്‌കി, അമേരിക്കന്‍ ബിഷപ്പ് കോണ്‍ഫ്രന്‍സ് അംഗവും പെന്‍സിക്കോള ബിഷപ്പുമായ വില്യം എ വാക്ക്, ചിക്കാഗോ സീറോ മലബാര്‍ രൂപതാധ്യക്ഷന്‍ ബിഷപ്പ് ജോയ് ആലപ്പാട്ട്, ചിക്കാഗോ രൂപതയുടെ പ്രഥമ മെത്രാന്‍ ബിഷപ്പ് എമിററ്റസ്, ബിഷപ്പ് ജേക്കബ് അങ്ങാടിയത്ത്, വികാര്‍ ജനറല്‍മാരായ ഫാ. ജോണ്‍ മേലേപ്പുറം, ഫാ. തോമസ് കടുകപ്പള്ളി എന്നിവരോടൊപ്പം അതിഥികളായി എത്തിയ നൂറ്റി അന്‍പത് വൈദികരേയും കേരള തനിമയുടെ പാരമ്പര്യം ഉണര്‍ത്തുന്ന താലപ്പൊലിയും മുത്തുക്കുടകളും ചെണ്ട വാദ്യങ്ങളുടേയും അകമ്പടിയോടെ ചുവപ്പ് പരവതാനിയിലൂടെ നൈറ്റ് ഓഫ് കൊളംബസിന്റെ ഗാര്‍ഡ് ഓഫ് ഓണര്‍ ഏറ്റുവാങ്ങി ദേവാലയത്തിലേക്ക് ഘോഷ യാത്രയായി ആനയിച്ചു.
തുടര്‍ന്ന് ചിക്കാഗോ രൂപതാധ്യക്ഷന്‍ ബിഷപ്പ് മാര്‍ ജോയ് ആലപ്പാട്ടിന്റെ മുഖ്യ കാര്‍മ്മികത്വത്തില്‍ മൂന്ന് ബിഷപ്പുമാരുടെ സഹ കാര്‍മ്മികത്വത്തിലും 150 ളം വൈദികരും ചേര്‍ന്ന് മലയാളത്തില്‍ ഭക്തി നിര്‍ഭരമായി വിശുദ്ധ ബലിയും തിരുകര്‍മ്മങ്ങളും അര്‍പ്പിച്ചത് വിശ്വാസ സമൂഹത്തിന് അനിര്‍വചനീയമായ ഒരു ദൈവീകാനുഭ സന്ധ്യയായി മാറുകയായിരുന്നു.
തുടര്‍ന്ന് അത്താഴ വിരുന്നും അതോടനുബന്ധിച്ച് നടന്ന പൊതു സമ്മേളനത്തില്‍ ബിഷപ്പ് ജോയ് ആലപ്പാട്ട് അധ്യക്ഷത വഹിച്ചു. ആര്‍ച്ച് ബിഷപ്പ് തോമസ് വെന്‍സ്‌കി, കൊയ്‌നോനിയയുടെ ഔപചാരികമായ ഉല്‍ഘാടനം നിര്‍വഹിച്ചു. മലയാളി കത്തോലിക്ക വൈദിക സമൂഹം അമേരിക്കന്‍ സമൂഹത്തിന് ചെയ്തു വരുന്ന ശുശ്രൂഷകളേയും, സേവനങ്ങളേയും അദേഹം പ്രകീര്‍ത്തിക്കുകയും പ്രശംസിക്കുകയും ചെയ്തു.
ബിഷപ്പ് വില്യം എ വിക്കിന്റെ പ്രചോദനാത്മക സന്ദേശത്തില്‍ കേരള വൈദികരുടെ തീക്ഷ്ണമായ മിഷിനറി പ്രവര്‍ത്തനങ്ങളെക്കുറിച്ചും പ്രവാസി വിശ്വാസ മൂഹത്തിന്റെ ക്രൈസ്തവ സാക്ഷ്യത്തെ കുറിച്ചും ഒന്നുമില്ലായ്മകളില്‍ നിന്ന് കുറഞ്ഞ സമയം കൊണ്ട് അമേരിക്കയില്‍ സീറോ മലബാര്‍ സഭയുടെ വളര്‍ച്ചയും വിശ്വാസാധിഷ്ഠിതമായ ക്രൈസ്തവ കുടുംബ ജീവിതത്തെ കുറിച്ചും അഭിനന്ദനങ്ങള്‍ നേര്‍ന്നു സംസാരിച്ചു.
ഇന്ത്യക്ക് വെളിയില്‍ സീറോ മലബാര്‍ സഭക്ക് ആദ്യമായി ഒരു രൂപത ചിക്കാഗോയില്‍ സ്ഥാപിക്കപ്പെടുകയും അതിന്റെ പ്രഥമ ബിഷപ്പാകുകയും ചെയ്ത ബിഷപ്പ് മാര്‍ ജേക്കബ് അങ്ങാടിയത്തിന് അദേഹത്തിന്റെ എപ്പിസ്‌കോപ്പല്‍ ഓര്‍ഡിനേഷന്റെ സില്‍വര്‍ ജൂബിലി ആശംസകള്‍ അര്‍പ്പിക്കുകയും ബിഷപ്പ് ജോയ് ആലപ്പാട്ട് പൊന്നാട അണിയിച്ച് ആദരിക്കുകയും ജൂബിലി കേക്ക് മുറിച്ച് പങ്കുവെക്കുകയും ചെയ്തു.
പൊതുസമ്മേളനത്തില്‍ സീറോ മലബാര്‍ മേജര്‍ ആര്‍ച്ച് ബിഷപ്പ് മാര്‍ റാഫേല്‍ തട്ടില്‍, കര്‍ദിനാള്‍ മാര്‍ ജോര്‍ജ് ആലഞ്ചേരി ക്നാനായ വികാരി ജനറല്‍ ഫാ. തോമസ് മുളവനാല്‍, ഇന്ത്യന്‍ കോണ്‍സില്‍ ജനറല്‍ അറ്റ്ലാന്റാ രമേശ് ബാബു ലക്ഷ്മണ്‍ തുടങ്ങിയവരുടെ ആശംസാ സന്ദേശം എല്‍ഇഡി സ്‌ക്രീനില്‍ പ്രദര്‍ശിപ്പിച്ചു. ചിക്കാഗോ സീറോ മലബാര്‍ സഭയുടെ കഴിഞ്ഞ 25 വര്‍ഷത്തെ ശ്രദ്ധേയമായ വളര്‍ച്ചയേയും നേട്ടങ്ങളേയും കുറിച്ചുള്ള ഡോക്യൂമെന്ററി പ്രദര്‍ശന വേദിയില്‍ അവതരിപ്പിച്ചു.
രൂപതയുടെ സില്‍വര്‍ ജൂബിലിയോടനുബന്ധിച്ച് നടത്തിയ ഈ വൈദിക സമ്മേളനം 'കൊയ്‌നോനിയ 2025' വെറുമൊരു ആഘോഷമല്ല, അത് ഭാവിയിലെ സഭയുടെ ദൗത്യങ്ങള്‍ക്ക് ആലോചന പകരുന്ന ആത്മീയ പ്രചോദന കേന്ദ്രമായി, സഹജീവിതത്തിന്റെ, സേവനത്തിന്റെ, ആത്മീയ ബന്ധത്തിന്റെ പ്രതീകമായി സഭയുടെ ദൗത്യങ്ങള്‍ക്ക് വഴികാട്ടിയും, ദിശാസൂചികയുമായും മാറുമെന്ന് പ്രത്യാശിക്കുന്നതായി മാര്‍ ജോയ് ആലപ്പാട്ട് അഭിപ്രായപ്പെട്ടു.
2026 ജൂലൈ ഒന്‍പത് മുതല്‍ 12 വരെ തിയതികളില്‍ ചിക്കാഗോയില്‍വച്ച് നടത്തപ്പെടുന്ന സീറോ മലബാര്‍ രൂപതാ സില്‍വര്‍ ജൂബിലി കണ്‍വെന്‍ഷന്റെ കിക്ക് ഓഫ് വേദിയില്‍ നടത്തപ്പെട്ടു. സില്‍വര്‍ ജൂബിലി കണ്‍വെന്‍ഷന്‍ ഗാനം പാടി പൊതുസമ്മേളനം സമാപിച്ചു. തുടര്‍ന്ന് മയാമി ഔവര്‍ ലേഡി ഓഫ് ഹെല്‍ത്ത് ഫൊറോന ദേവാലയത്തിലെ പ്രതിഭാധനരായ നൂറ്റി ഇരുപത്തിയഞ്ചോളം കലാകാരന്മാര്‍ ചേര്‍ന്ന് അവതരിപ്പിച്ച സ്റ്റേജ് ഷോ 'പാവനം' ഈ കലാസന്ധ്യയെ ഏറ്റവും ആകര്‍ഷകമാക്കി.
പൊതു സമ്മേളനത്തില്‍ 'കൊയ്‌നോനിയ 2025' ചെയര്‍മാനും ഔവര്‍ ലേഡി ഓഫ് ഹെല്‍ത്ത് വികാരിയുമായ ഫാ. ജോര്‍ജ് ഇളമ്പാശേരി ആമുഖ പ്രസംഗവും വികാരി ജനറലും പ്രീസ്റ്റ് ഗാദറിങ് സഹ രക്ഷാധികാരിയുമായ വികാരി ജനറല്‍ ഫാ. ജോണ്‍ മേലേപ്പുറം സ്വാഗതവും ജനറല്‍ കണ്‍വീനര്‍ ജോഷി ജോസഫ് കൃതജ്ഞതയും അര്‍പ്പിച്ചു. ദീപാ ദീപു പരിപാടികളുടെ എംസിയുമായിരുന്നു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.