ഹൈദരാബാദ്: ഐഐടി ഹൈദരാബാദിന്റെ പ്ലേസ്മെന്റ് ചരിത്രത്തില് റെക്കോര്ഡ് നേട്ടം കൊയ്ത് 21 കാരന്. കമ്പ്യൂട്ടര് സയന്സ് ആന്ഡ് എന്ജിനീയറിങ് വിഭാഗത്തിലെ ഫൈനല് ഇയര് വിദ്യാര്ഥിയായ എഡ്വേര്ഡ് നാഥന് വര്ഗീസ് ആഗോള ട്രേഡിങ് കമ്പനിയായ ഓപ്റ്റിവറില് നിന്ന് 2.5 കോടിയുടെ വാര്ഷിക പാക്കേജ് സ്വന്തമാക്കിയിരിക്കുകയാണ്.
2008 ല് സ്ഥാപിതമായ ഐഐടി ഹൈദരാബാദില് ഇതുവരെ ലഭിച്ച ഏറ്റവും ഉയര്ന്ന പ്ലേസ്മെന്റ് ഓഫറാണിത്. നെതര്ലാന്ഡ്സ് ആസ്ഥാനമായ ഓപ്റ്റിവറിലെ സമ്മര് ഇന്റേണ്ഷിപ്പിനിടെ കാഴ്ചവെച്ച പ്രകടനമാണ് എഡ്വേര്ഡിന് റെക്കോര്ഡ് നേട്ടത്തിന് വഴി ഒരുക്കിയത്. ഇന്റേണ്ഷിപ്പിന് പിന്നാലെ തന്നെ കമ്പനി പ്രീ-പ്ലേസ്മെന്റ് ഓഫറും നല്കി. 2026 ജൂലൈയില് സോഫ്റ്റ്വെയര് എന്ജിനീയറായി ജോലിയില് പ്രവേശിക്കാം.
കൗതുകകരമായ കാര്യം സീസണിലെ എഡ്വേര്ഡിന്റെ ആദ്യ ഇന്റര്വ്യൂ വഴിയാണ് ഇത്ര വലിയ ഓഫര് ലഭിച്ചത് എന്നതാണ്. മുമ്പ് ഐഐടി ഹൈദരാബാദില് ലഭിച്ച ഏറ്റവും ഉയര്ന്ന പാക്കേജ് ഏകദേശം 1.1 കോടി മാത്രമായിരുന്നു. പുതിയ ഓഫര് ഇരട്ടിയിലേറെയാണ്.
ഹൈദരാബാദ് സ്വദേശിയായ എഡ്വേര്ഡ് സ്കൂള് വിദ്യാഭ്യാസം പൂര്ത്തിയാക്കിയത് ബംഗളൂരുവിലാണ്. ജെഇഇ മെയിന്, അഡ്വാന്സ്ഡ് പരീക്ഷകളില് മികച്ച റാങ്കുകള് നേടിയ ശേഷമാണ് ഐഐടി ഹൈദരാബാദിലേക്ക് എത്തുന്നത്. അക്കാഡമിക് മികവിനൊപ്പം, ഇന്സ്റ്റിറ്റ്യൂട്ടിലെ ഓഫീസ് ഓഫ് കരിയര് സര്വീസസിന്റെ തലവനായും പ്രവര്ത്തിച്ചിട്ടുണ്ട്. ഇന്റേണ്ഷിപ്പുകളും പ്ലേസ്മെന്റുകളും കൈകാര്യം ചെയ്യുന്ന ടീമുകള്ക്ക് നേതൃത്വം നല്കിയ അനുഭവവും എഡ്വേര്ഡിനുണ്ട്.
കടുത്ത മത്സരവും ആഗോള സാമ്പത്തിക അനിശ്ചിതത്വങ്ങളും നിലനില്ക്കുന്ന സമയത്താണ് റെക്കോര്ഡ് ഓഫര്. ഐഐടി ഹൈദരാബാദിന് മാത്രമല്ല രാജ്യത്തെ മുഴുവന് ടെക് ക്യാമ്പസുകള്ക്കും പ്രചോദനമാകുന്ന നേട്ടമാണ് എഡ്വേര്ഡ് നാഥന് വര്ഗീസിന്റേത്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള് സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.