പട്ന: പെണ്കുട്ടികള് പഠിക്കേണ്ടതില്ലെന്നും അവര് വീടിന്റെ നാല് ചുവരുകള്ക്കുള്ളില് കഴിയേണ്ടവരാണെന്നും ബിഹാര് വിദ്യാഭ്യാസ മന്ത്രി മിഥിലേഷ് തിവാരി. പെണ്കുട്ടികള് വീട്ടിലിരിക്കുന്നതാണ് ഭംഗിയെന്നും തെരുവിലിറങ്ങുന്നത് നല്ലതല്ലെന്നുമാണ് മിഥിലേഷ് തിവാരി മാധ്യമങ്ങളോട് പറഞ്ഞത്.
'എന്താണ് വിദ്യാഭ്യാസത്തിന്റെ ആവശ്യകത? പെണ്കുട്ടികള്ക്ക് എന്തിനാണ് വിദ്യാഭ്യാസം? നമ്മുടെ വീടുകളിലെ പെണ്മക്കളാണ് നമ്മുടെ ശക്തിയും സമൃദ്ധിയുടെ അടിത്തറയും. നരേന്ദ്ര മോഡിജീ സ്ത്രീ ശാക്തീകരണത്തിനായി നിലകൊളളുമ്പോള് പെണ്മക്കള് എന്തിനാണ് തെരുവിലിറങ്ങുന്നത്? അതിന്റെ ആവശ്യമെന്താണ്?'- എന്നാണ് മിഥിലേഷ് തിവാരിയുടെ ചോദ്യം.
വിദ്യാഭ്യാസം പെണ്കുട്ടികളുടെ അവകാശമാണെന്ന് ഒരു റിപ്പോര്ട്ടര് വാദിച്ചപ്പോള്, 'പെണ്കുട്ടികള്ക്ക് അവരുടെ അവകാശങ്ങള് സ്വയമേവ ലഭിക്കും' എന്നായിരുന്നു ബിഹാറിലെ വിദ്യാഭ്യാസ മന്ത്രിയുടെ മറുപടി.
അതേസമയം മിഥിലേഷ് തിവാരിയുടെ വിവാദ പ്രസ്താവനയ്ക്കെതിരെ വ്യാപക വിമര്ശനമാണ് ഉയരുന്നത്. ബിഹാര് സാക്ഷരതാ നിരക്കില് ആദ്യമേ തന്നെ പിന്നിലാണെന്നും അതിനിടയ്ക്ക് ജനസംഖ്യയുടെ പകുതിയിലേറെ ആളുകളെ അടുക്കളയിലേക്ക് തിരിച്ചയയ്ക്കുന്നതാണോ നിങ്ങളുടെ മാസ്റ്റര് പ്ലാന് എന്നുമാണ് ഒരു എക്സ് ഉപയോക്താവ് ചോദിച്ചത്.
ബിഹാര് വിദ്യാഭ്യാസ മേഖലയിലേക്ക് ഒരു ഇതിഹാസത്തെയും സ്ത്രീ ശാക്തീകരണത്തിന് പറ്റിയ പാര്ട്ടിയെയുമാണ് തിരഞ്ഞെടുത്തത് എന്ന് മറ്റൊരാള് പരിഹസിച്ചു. ഇന്ത്യയെ നശിപ്പിക്കാന് പാകിസ്ഥാനോ ചൈനയോ പോലുളള ശത്രു രാജ്യങ്ങളുടെ ആവശ്യമില്ലെന്നും ഇന്ത്യയ്ക്കുളളില് നിന്നു തന്നെ ഇന്ത്യയെ നശിപ്പിക്കുകയാണെന്നും മറ്റൊരാള് കുറിച്ചു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള് സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.