പാരമ്പര്യത്തിന്റെ തിരിനാളം വീണ്ടും; ലിയോ പാപ്പയുടെ 'മൊസ്സെറ്റ' വസ്ത്രധാരണം ചർച്ചയാകുന്നു

വത്തിക്കാൻ സിറ്റി: കത്തോലിക്കാ സഭയുടെ പാരമ്പര്യ വസ്ത്രധാരണരീതികളിലൊന്നായ 'മൊസ്സെറ്റ' വീണ്ടും ലോകശ്രദ്ധ നേടുന്നു. ലിയോ പതിനാലാമൻ പാപ്പ തന്റെ സ്പെയിൻ സന്ദർശനത്തിനിടെ ധരിച്ച ഈ പരമ്പരാഗത മേലങ്കിയാണ് ശ്രദ്ധാകേന്ദ്രമായത്. കഴിഞ്ഞ ഏതാനും വർഷങ്ങളായി പൊതുവേദികളിൽ അപൂർവമായി മാത്രം കണ്ടിരുന്ന ഈ വസ്ത്രം പുതിയ പാപ്പയുടെ ഔദ്യോഗിക ചടങ്ങുകളിലൂടെ വീണ്ടും സജീവ ചർച്ചാ വിഷയമായിരിക്കുകയാണ്.

സെന്റ് പീറ്റേഴ്സ് ബസിലിക്കയുടെ ബാൽക്കണിയിൽ നിന്ന് ആദ്യമായി വിശ്വാസികളെ അഭിസംബോധന ചെയ്തപ്പോൾ തന്നെ ലിയോ പതിനാലാമൻ പാപ്പ മൊസ്സെറ്റ ധരിച്ചിരുന്നു. തുടർന്ന് ഔദ്യോഗിക കൂടിക്കാഴ്ചകളിലും പ്രധാന തിരുനാൾ സന്ദർഭങ്ങളിലുമെല്ലാം ഈ പരമ്പരാഗത വസ്ത്രം പാപ്പ ഉപയോഗിക്കുന്നതായി കാണപ്പെടുന്നു. സഭയുടെ ചരിത്രപരമായ പാരമ്പര്യങ്ങളോടുള്ള തുടർച്ചയുടെ പ്രതീകമായാണ് പലരും ഇതിനെ വിലയിരുത്തുന്നത്.

എന്താണ് മൊസ്സെറ്റ?

മാർപാപ്പമാർ, കർദിനാൾമാർ, ബിഷപ്പുമാർ തുടങ്ങിയ ഉന്നത സഭാധികാരികൾ ഔദ്യോഗിക വെള്ളക്കുപ്പായത്തിന് മുകളിൽ ചുമലിലൂടെ ധരിക്കുന്ന ചെറിയ മേലങ്കിയാണ് മൊസ്സെറ്റ. പതിനാലാം നൂറ്റാണ്ടിൽ അവിഞ്ഞോണിൽ പാപ്പമാർ താമസിച്ചിരുന്ന കാലഘട്ടത്തിലാണ് ഇതിന്റെ ഉപയോഗം വ്യാപകമായത്. പിന്നീട് ഇത് സഭയുടെ ഔദ്യോഗിക വസ്ത്രധാരണ പാരമ്പര്യത്തിന്റെ ഭാഗമായി മാറി.

സഭയിലെ ആത്മീയ ഉത്തരവാദിത്വത്തിന്റെയും ഔദ്യോഗിക പദവിയുടെയും പ്രതീകമായാണ് മൊസ്സെറ്റ കണക്കാക്കപ്പെടുന്നത്. ബിഷപ്പുമാർ സാധാരണയായി പർപ്പിൾ നിറത്തിലും കർദിനാൾമാർ ചുവപ്പ് നിറത്തിലും ഇത് ധരിക്കുന്നു. മാർപാപ്പമാർ വിവിധ അവസരങ്ങൾക്കനുസരിച്ച് വ്യത്യസ്ത രൂപങ്ങളിലുള്ള മൊസ്സെറ്റകൾ ഉപയോഗിക്കാറുണ്ട്.

2013 ൽ മാർപാപ്പയായ ഫ്രാൻസിസ് പാപ്പ ലളിതത്വത്തിന് പ്രത്യേക പ്രാധാന്യം നൽകിയിരുന്നു. അതിന്റെ ഭാഗമായി പൊതുപ്രത്യക്ഷതകളിൽ അദേഹം സാധാരണ വെള്ളക്കുപ്പായം ധരിക്കുന്ന രീതിയാണ് കൂടുതലായും പിന്തുടർന്നത്. സഭയുടെ ജനസാന്നിധ്യവും ലാളിത്യവും മുൻനിറുത്തുന്ന സമീപനമായാണ് അത് വിലയിരുത്തപ്പെട്ടത്.

അതേസമയം ലിയോ പതിനാലാമൻ പാപ്പ സഭയുടെ ദീർഘകാല പാരമ്പര്യങ്ങളും ദൃശ്യചിഹ്നങ്ങളും കൂടുതൽ പ്രാധാന്യത്തോടെ ഉപയോഗിക്കുന്ന ശൈലിയാണ് സ്വീകരിച്ചിരിക്കുന്നത്. അതിനാൽ മൊസ്സെറ്റയുടെ ഉപയോഗം ഒരു വ്യക്തിപരമായ വസ്ത്രധാരണ തിരഞ്ഞെടുപ്പിനപ്പുറം സഭയുടെ ചരിത്രപരമായ പൈതൃകത്തോടുള്ള ബന്ധത്തിന്റെ പ്രകടനമായും കാണപ്പെടുന്നു.

സഭയുടെ ചരിത്രത്തിൽ വിവിധ മാർപാപ്പമാർ തങ്ങളുടെ വ്യക്തിത്വത്തിനും ശുശ്രൂഷാ ദർശനത്തിനും അനുസരിച്ച് വ്യത്യസ്ത ശൈലികൾ സ്വീകരിച്ചിട്ടുണ്ടെങ്കിലും അവയൊക്കെയും സഭയുടെ ഒരേ ദൗത്യത്തെ സേവിക്കുന്ന വ്യത്യസ്ത ആവിഷ്കാരങ്ങളായാണ് കണക്കാക്കപ്പെടുന്നത്.