തിരുവനന്തപുരം: കാട്ടാനകള് ഉള്പ്പെടെയുള്ള വന്യജീവികളുടെ ആക്രമണം വീണ്ടും രൂക്ഷമായ സാഹചര്യത്തില് വനം വകുപ്പ് 500 പേരുടെ സ്പെഷ്യല് റിസര്വ് ഫോഴ്സ് രൂപീകരിക്കുന്നു. വനം മന്ത്രി ഷിബു ബേബി ജോണ് ഇതു സംബന്ധിച്ച് നിര്ദേശം നല്കി.
വന്യജീവികള് മൂലമുള്ള അപകട സാധ്യതകള് പരമാവധി ഒഴിവാക്കുന്നതിനും മനുഷ്യ-വന്യജീവി സംഘര്ഷങ്ങള് കൂടുതല് ഫലപ്രദമായി ലഘൂകരിക്കുന്നതിനുമായാണ് കാട്ടാനകളുടെ സാന്നിധ്യം പതിവായി അനുഭവപ്പെടുന്ന ഹോട്ട്സ്പോട്ടുകളില് അഞ്ച് പേര് വീതമുള്ള 100 ബാച്ചുകളായി സ്പെഷ്യല് റിസര്വ് ഫോഴ്സ് യൂണിറ്റുകള് രൂപീകരിക്കുന്നത്.
വന്യജീവി സാന്നിധ്യം അനുഭവപ്പെടുന്ന മേഖലകളെ സംബന്ധിച്ച് അറിവുള്ള ഗോത്രവര്ഗ വിഭാഗത്തില്പ്പെടുന്നവരും വനം വകുപ്പില് നിന്ന് വിരമിച്ച വിദഗ്ധരും പരിചയ സമ്പന്നരായ തദ്ദേശ വാസികളും സാങ്കേതിക പരിജ്ഞാനമുള്ളവരും ഉള്പ്പെടെയുള്ളവരാണ് സ്പെഷ്യല് റിസര്വ് ഫോഴ്സില് ഉണ്ടാവുക. ഈ യൂണിറ്റുകളെ സംസ്ഥാന വ്യാപകമായി വിന്യസിക്കും.
ആനകളുടെ സഞ്ചാര പഥങ്ങളും നീക്കങ്ങളും സദാ നിരീക്ഷിക്കുക, ജനവാസ മേഖലകളിലോ സമീപ പ്രദേശങ്ങളിലോ കാട്ടാനകളുടെ സാന്നിധ്യം അനുഭവപ്പെടുന്ന പക്ഷം കൃത്യമായ മുന്നറിയിപ്പ് സന്ദേശങ്ങള് നേരിട്ടും വിവിധ മാധ്യമങ്ങളിലൂടെയും നല്കുന്നതിലൂടെ ജനങ്ങളുടെ സുരക്ഷിതത്വം ഉറപ്പുവരുത്തുക എന്നിവയാണ് മുഖ്യ ലക്ഷ്യം.
വനാതിര്ത്തികളില് സ്ഥാപിച്ചിട്ടുള്ള സൗരോര്ജ വേലികള് ഉള്പ്പെടെയുള്ള വിവിധ വന്യജീവി പ്രതിരോധ സംവിധാനങ്ങളുടെ പ്രവര്ത്തന ക്ഷമത നിരന്തരം നിരീക്ഷിച്ച് ഉറപ്പു വരുത്തുക, ജനവാസമേഖലയോട് അടുത്തെത്തുന്ന കാട്ടാനകളെ സുരക്ഷിതമായി കാട്ടിലേക്ക് തുരത്തുന്ന ദൗത്യത്തില് ഏര്പ്പെട്ടിരിക്കുന്ന ആര്ആര്ടികള്ക്ക് വേണ്ട സഹായങ്ങളും പിന്തുണയും ലഭ്യമാക്കുക, മറ്റു സംഘര്ഷ ലഘൂകരണ പ്രവര്ത്തനങ്ങളില് പങ്കാളികളാവുക തുടങ്ങിയവയായും സ്പെഷ്യല് റിസര്വ് ഫോഴ്സിന്റെ പ്രധാന പ്രവര്ത്തനങ്ങളില്പ്പെടും.
സ്പെഷ്യല് റിസര്വ് ഫോഴ്സ് 24 മണിക്കൂറും സംഘര്ഷ ബാധിത മേഖലകളില് പട്രോളിങ് ഉള്പ്പെടെയുള്ള പ്രവര്ത്തനങ്ങളും നടത്തും.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള് സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.