നൈജീരിയ: വടക്കുപടിഞ്ഞാറൻ നൈജീരിയയിലെ കടുന സംസ്ഥാനത്ത് സായുധ സംഘം നടത്തിയ ക്രൂരമായ ആക്രമണത്തിൽ എട്ട് കുട്ടികളടക്കം 30 പേർ കൊല്ലപ്പെട്ടു. തിങ്കളാഴ്ച പുലർച്ചെയോടെയായിരുന്നു രാജ്യത്തെ ഞെട്ടിച്ച ഈ ദാരുണ സംഭവം നടന്നത്. കൗരു പ്രാദേശിക ഭരണമേഖലയിലെ നരിഡോൺ ഗ്രാമത്തിലേക്ക് അർദ്ധരാത്രിയോടെ ഇരച്ചെത്തിയ അക്രമിസംഘം ഉറങ്ങിക്കിടന്ന ഗ്രാമവാസികൾക്കു നേരെ യാതൊരു ദയവുമില്ലാതെ വെടിയുതിർക്കുകയായിരുന്നു. വെടിവെപ്പിന് പുറമെ ചിലരെ കഴുത്തറുത്ത് കൊലപ്പെടുത്തിയതായും നാട്ടുകാർ വ്യക്തമാക്കി.
കൊല്ലപ്പെട്ടവരിൽ ഏറെയും സ്ത്രീകളും കുട്ടികളും വയോധികരുമാണ്. ആക്രമണത്തിൽ എട്ട് കുട്ടികൾ തൽക്ഷണം കൊല്ലപ്പെടുകയും നാല് പേർക്ക് ഗുരുതരമായി പരിക്കേൽക്കുകയും ചെയ്തിട്ടുണ്ട്. വെടിവെപ്പും കൊലപാതകങ്ങളും നടത്തിയ അക്രമികൾ ഗ്രാമത്തിലെ നിരവധി വീടുകൾക്ക് തീയിട്ട ശേഷമാണ് സംഭവസ്ഥലത്തു നിന്നും കടന്നുകളഞ്ഞത്. എന്നാൽ, ഇത്രയും വലിയൊരു അതിക്രമം നടന്ന് മണിക്കൂറുകൾക്കു ശേഷമാണ് സുരക്ഷാ ഉദ്യോഗസ്ഥർ സ്ഥലത്തെത്തിയതെന്ന് നാട്ടുകാർ കടുത്ത അമർഷത്തോടെ ആരോപിച്ചു.
നൈജീരിയയുടെ വടക്കുപടിഞ്ഞാറൻ, വടക്കുമധ്യ ഭാഗങ്ങളിൽ സായുധ സംഘങ്ങളുടെയും ക്രിമിനൽ ഗ്രൂപ്പുകളുടെയും സമാനമായ ആക്രമണങ്ങൾ വലിയൊരു സുരക്ഷാ ഭീഷണിയാണ് ഉയർത്തിക്കൊണ്ടിരിക്കുന്നത്. ഈ കൂട്ടക്കൊലയുടെ ഉത്തരവാദിത്തം ഇതുവരെ ഒരു സംഘടനയും ഏറ്റെടുത്തിട്ടില്ല. സംഭവത്തിൽ കൂടുതൽ വിവരങ്ങൾ ഉടൻ ലഭ്യമാക്കുമെന്ന് കടുന സംസ്ഥാന പൊലീസ് വക്താവ് മൻസൂർ ഹസൻ അറിയിച്ചു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള് സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.