തിരുവനന്തപുരം: സംസ്ഥാനത്ത് റോഡപകടങ്ങള് ഗണ്യമായി കൂടുന്ന സാഹചര്യത്തില് സുരക്ഷിതമായ ഡ്രൈവിങ് സംസ്കാരം വളര്ത്തിയെടുക്കുന്നതിന് ഡ്രൈവിങ് ലൈസന്സ് നടപടികളില് മാറ്റം വരുത്തുന്നു. ഇതിന്റെ ഭാഗമായി ലൈസന്സ് ലഭിക്കുന്നതിനായി പുതിയൊരു പരീക്ഷ കൂടി ഉള്പ്പെടുത്തി ഗതാഗത കമ്മീഷണര് ഉത്തരവിറക്കി.
ഡ്രൈവിങിനിടെ റോഡില് പെട്ടെന്നുണ്ടാകുന്ന അപകട സാധ്യതകളും തടസങ്ങളും കൃത്യമായി മനസിലാക്കി അതിനനുസരിച്ച് സുരക്ഷിതമായി വാഹനം നിയന്ത്രിക്കാന് പ്രാപ്തരാക്കുന്ന ഹസാര്ഡ് പെര്സെപ്ഷന് പരിശീലനമാണ് പുതിയതായി ഏര്പ്പെടുത്തുന്നത്. ഡിസംബര് ഒന്നു മുതല് പുതിയ സംവിധാനം പ്രാബല്യത്തില് വരുമെന്ന് ഉത്തരവിലുണ്ട്.
ലേണേഴ്സ് ലൈസന്സ് ടെസ്റ്റിന് ശേഷമാണ് ഹസാര്ഡ് പെര്സെപ്ഷന് പരീക്ഷ. കമ്പ്യൂട്ടര് മുഖേന നടത്തുന്ന ഈ ടെസ്റ്റില് റോഡിലെ അപകട സാധ്യതകള് തിരിച്ചറിയാനുള്ള ശേഷിയാണ് വിലയിരുത്തുക.
പുതിയ മാറ്റമനുസരിച്ച് ഡിസംബര് ഒന്നു മുതല് ലേണേഴ്സ് ടെസ്റ്റ്, ഹസാര്ഡ് പെര്സെപ്ഷന് ടെസ്റ്റ്, ഗ്രൗണ്ട് ടെസ്റ്റ്, റോഡ് ടെസ്റ്റ് എന്നിങ്ങനെ നാല് ഘട്ടങ്ങളായിട്ടായിരിക്കും ഡ്രൈവിങ് ടെസ്റ്റ് നടക്കുക.
അംഗീകൃത ഡ്രൈവിങ് സ്കൂളുകള് അടുത്ത മൂന്ന് മാസത്തിനകം അപേക്ഷകര്ക്ക് ഹസാര്ഡ് പെര്സെപ്ഷന് പരിശീലനം നല്കുന്നതിനുള്ള സൗകര്യങ്ങള് ഒരുക്കണമെന്ന് നിര്ദേശിച്ചിട്ടുണ്ട്. റോഡപകടങ്ങള് കുറയ്ക്കുന്നതിനും ലൈസന്സ് നല്കുന്നതിലെ ഗുണനിലവാരം അന്താരാഷ്ട്ര തലത്തിലേക്ക് ഉയര്ത്തുന്നതിനുമാണ് മോട്ടോര് വാഹന വകുപ്പിന്റെ ഈ പുതിയ തീരുമാനം.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള് സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.